រាជធានីភ្នំពេញ៖ ស្នេហារវាងទឹម រដ្ឋា និងសង្សារអាមេរិក មានរយៈពេលយូរដែរមកហើយ ។ ខុសពីពេលកន្លងមកស្រីស្អាតរដ្ឋា មិនព្រមទម្លាយរឿងរៀបការទេ ដោយពេលនេះនាងបានបង្ហើបពីរឿងរៀបការ ។
កញ្ញាទឹម រដ្ឋា កាលពីពេល ថ្មីៗកន្លងមកនិយាយថា «ឃើញអ្នកសិល្បៈចូលរោងការព្រោងព្រាតនាងខ្ញុំចង់រៀបការខ្លាំងណាស់ ។ដោយសារមួយរយៈនេះទាំងនាងខ្ញុំ និងគូស្នេហ៍ជាប់រវល់ជាមួយការងារខ្លាំងពេកដកឃ្លាមិនរួច ទើបត្រូវពន្យារពេលរៀបការម្ដងហើយម្ដងទៀត។ តែមិនយូរនោះទេនាងខ្ញុំ និងគូស្នេហ៍នឹងចូលរោងការជាមួយគ្នាក្នុងពេល ឆាប់ៗនេះហើយ»។
អំឡុងពេលនេះលោក Jovany ជាគូស្នេហ៍បានសួរនាំមិត្តភក្ដិមួយចំនួនដែលជាជនជាតិខ្មែរអំពីទំនៀមទម្លាប់ប្រពៃណីចូលរោងការរបស់ជនជាតិខ្មែរ មុនលោកឲ្យចាស់ទុំមកចូលស្ដីដណ្ដឹងទឹម រដ្ឋា ដើម្បីចូលរោងជ័យនាពេលខាងមុខ ។
ជាមួយអារម្មណ៍រំភើបរីករាយកញ្ញាទឹម រដ្ឋា និយាយថា៖«ឃើញគេការខ្ញុំចង់ការដែរតើ ហើយគូស្នេហ៍ខ្ញុំគាត់ក៏ចង់រៀបការជាមួយខ្ញុំក្នុងពេល ឆាប់ៗផងដែរ ។ មិនយូរទេប្រហែល២ឆ្នាំទៀតយើងនឹងចូលរោងការជាមួយគ្នាហើយ។ ណាមួយខ្ញុំក៏បានទៅជួបប៉ាម៉ាក់គាត់រួចដែរលោកទាំងពីរស្រឡាញ់ពេញចិត្តខ្ញុំខ្លាំងណាស់»។
គូស្នេហ៍របស់ទឹម រដ្ឋា គឺជាស្ថាបនិកក្រុមហ៊ុន CMS Property Management និងមានក្រុមហ៊ុន២ទៀត ក្នុងនោះមានវេបសាយផ្ទាល់ខ្លួនមួយកំពុងតែដំណើរយ៉ាងរលូន មានឈ្មោះថា Way home ។
ចាប់តាំងពីក្លាយជាតារាសម្តែងមក ស្រីស្អាតរាងស្តើងខ្ពស់ទឹម រដ្ឋាបានឆ្លងកាត់ការសម្តែងជាតួអង្គសុភាពបានតែម្តងគត់ក្នុងចំណោមសាច់រឿងដែលថតជិត២០រឿង ។ នាងត្រូវអ្នកដឹកនាំរឿងជ្រើសឲ្យសម្តែងតែតួអង្គបែបកាចប្រើទឹកមុខមាំ បើវាយតប់ទៀតនោះនាងរឹតតែចូលចិត្ត ។
តារាសម្ដែង និងជាតារាម៉ូដែលកញ្ញាទឹម រដ្ឋា បានទទួលតំណែងជាតួអង្គថ្មីមួយទៀតក្នុងរឿង«ភ្លើងគំនុំ» របស់ស្ថានីយទូរទស្ស៍ប៉ុស្ថិ៍លេខ៥ ។ ក្នុងខ្សែភាពយន្តថ្មីនេះផលិតករតម្រូវឱ្យនាងសម្ដែងជាតួឆ្នាស និងចិត្តអាក្រក់ជាងបណ្ដារឿង មុនៗ ។ រដ្ឋាបញ្ជាក់ថានាងមិនបារម្ភខ្លាចទស្សនិកជនស្អប់ទេសម្រាប់តួអង្គកាច ៕ (កែសម្រួលដោយ ៖ បុប្ផា)
ចែករំលែកព័តមាននេះ