រាជធានីភ្នំពេញ ៖ ក្នុងពិធីប្រកាសចូលកាន់តំណែងក្រុមប្រឹក្សារាជធានីភ្នំពេញអាណត្តិទី៣ ដែលបានប្រារព្ធធ្វើនៅសាលារាជធានីភ្នំពេញ កាលពីព្រឹកថ្ងៃទី១២ ខែមិថុនា សម្តេចក្រឡាហោម ស ខេង ឧបនាយករដ្ឋ មន្ត្រី រដ្ឋមន្ត្រីក្រសួងមហាផ្ទៃបានប្រកាសថា នៅឆ្នាំ២០១៩នេះ ត្រូវតែបញ្ចប់ការចែកចាយនិងប្រើប្រាស់គ្រឿងញៀននៅតាមខារ៉ាអូខេ និងក្លិបកម្សាន្ត ពីព្រោះជាការទទួលខុសត្រូវធំធេង និងធ្ងន់ធ្ងរណាស់ចំពោះមុខប្រវត្តិសាស្ត្ររបស់យើងទាំងអស់គ្នា ។ ដូចនេះ កងកម្លាំងសមត្ថកិច្ច និងអាជ្ញាធរពាក់ព័ន្ធទាំង២៥រាជ ធានី-ខេត្ត ត្រូវរួមគ្នាលុបបំបាត់បទល្មើសគ្រឿងញៀននៅក្នុងខារ៉ាអូខេ និងក្លិបកម្សាន្តឱ្យបាន ។ ជា មួយគ្នានេះ សម្តេចក្រឡាហោម ក៏បានហាមមិនឱ្យមានកម្លាំងនគរបាលទៅយាមនៅទីតាំងកាស៊ីណូ ខារ៉ាអូខេ និងក្លិបកម្សាន្ត ដែលសង្ស័យជាទីតាំងប្រព្រឹត្តគ្រឿងញៀននោះឡើយ ព្រោះបើកម្លាំងសមត្ថកិច្ចទៅយាមនៅទីនោះ គឺដូចទៅយាមកន្លែងគ្រឿងញៀនតែម្តង ។
វិធានការខាងលើ ក្រសួងមហាផ្ទៃធ្លាប់បានប្រកាសរួចមកហើយក្នុងការហាមប្រាមដល់កម្លាំងនគរបាល ដែលខ្លះទៅស៊ីឈ្នួលយាមតាមក្លិបរាត្រីនានា និងក្រសួងការពារជាតិក៏ធ្លាប់ហាមដល់កម្លាំងទាហាន និងកងរាជអាវុធហត្ថ ត្រូវដកខ្លួនចេញពីកងសន្តិសុខស៊ីឈ្នួលតាមទីតាំងកម្សាន្តនានាមាន ក្លិបរាត្រី កាស៊ីណូ និងខារ៉ាអូខេ តែផ្ទុយទៅវិញនៅតែមានអ្នកលួចទៅធ្វើជាកងសន្តិសុខ ។
សម្តេចក្រឡាហោម ក៏បានប្រកាសដែរថានឹងយកវិធានការបង្ក្រាបដូចនៅរាជធានីភ្នំពេញចំពោះក្លិបកម្សាន្តពាក់ព័ន្ធនឹងគ្រឿងញៀនទៅបង្ក្រាបនៅក្រុងព្រះសីហនុ ដែលកំពុងតែល្បីពីបញ្ហាជាច្រើន ក្នុងនោះ
ក៏ពាក់ព័ន្ធនឹងគ្រឿងញៀនដែរ ។
សម្តេចក្រឡាហោមបានរំឭកថា កុំឲ្យកម្លាំងសមត្ថកិច្ចទៅយាមនៅក្លិបកម្សាន្តព្រោះជារឿងខុសច្បាប់ ហើយពេលខ្លះក្លិបកម្សាន្តនោះប្រើប្រាស់គ្រឿងញៀនដែលបញ្ហានេះអាចនឹងប្រឈមផ្លូវច្បាប់ផងដែរ ។ សម្តេចក្រឡាហោមបញ្ជាក់ថា ៖ «យើងជាកងកម្លាំងដែលមានអាវុធ ហើយយកប្រាក់ខែរដ្ឋទៅយាមកន្លែងក្លិបគឺជារឿងមិនត្រូវទេ» ។
ទំនងជាគាំទ្រដល់ប្រតិបត្តិការបង្ក្រាបតាមក្លិបរាត្រីកន្លងមកនៅរាជធានីភ្នំពេញ សម្តេចក្រឡាហោមបញ្ជាក់ថា ៖ «ខ្ញុំនឹងសហការឬកំពុងតែផ្តើមគំនិតមួយថា អាចនឹងយកគំរូភ្នំពេញនេះទៅអនុវត្តនៅខេត្តព្រះសីហនុ ! យើងកំពុងសិក្សាព្រោះខេត្តនោះមានបញ្ហាកំពុងផ្ទុះឡើងយ៉ាងខ្លាំង» ។សម្តេចក្រឡាហោមបន្ថែមថា នេះជាបញ្ហាមួយដែលយើងកំពុងយកចិត្តទុកដាក់ និងរកវិធីដោះស្រាយបញ្ហាប្រឈមនេះ ។ វាជារឿងធម្មតាទេ គឺអ្វីដែលល្អយើងជំរុញវា ប៉ុន្តែអ្វីដែលមិនល្អយើងកំពុងដោះស្រាយ ។
ជាថ្មីម្តងទៀត សម្តេចក្រឡាហោម ស ខេង បានប្តេជ្ញាថា នៅឆ្នាំ២០១៩នេះ សម្តេចនឹងចាត់វិធានការបង្ក្រាបគ្រឿងញៀននៅតាមក្លិបកម្សាន្តឲ្យអស់ ។ សូមជម្រាបថា ការលើកឡើងរបស់សម្តេចក្រឡាហោម ស ខេង គឺបន្ទាប់ពីនៅក្រុងព្រះសីហនុ បានកើតមានបញ្ហាជាបន្តបន្ទាប់ដែលភាគច្រើន បង្កឡើងដោយជនជាតិចិន ៕ (សម្រួលដោយ៖ ស្រីណា)
ចែករំលែកព័តមាននេះ