ប្រទេសចិន ៖ អាជ្ញាធរក្រុងហុងកុងកាលពីថ្ងៃទី១២ មិថុនា បានពន្យារពេល ពិនិត្យគម្រោងច្បាប់ដ៏ចម្រូងចម្រាស់ ដែលសំដៅអនុញ្ញាតឲ្យធ្វើបត្យាប័នទៅកាន់ចិនដីគោក ខណៈបាតុករច្រើនសិបពាន់នាក់ បានលើកគ្នារាំងខ្ទប់វិថីសំខាន់ៗនាកណ្ដាលទីក្រុងនោះ ដើម្បីតវ៉ាប្រឆាំងគម្រោងច្បាប់នេះ។
ពួកបាតុករច្រើនពាន់នាក់ស្លៀកពាក់ឯកសណ្ឋានពណ៌ខ្មៅភាគច្រើនជាយុវជន បានលើកគ្នាឡោមព័ទ្ធអគាររដ្ឋាភិបាលនានា ក្នុងកណ្ដាលក្រុងហុងកុង ដើម្បីទាមទារឲ្យដកគម្រោងច្បាប់នោះដែលគាំទ្រដោយក្រុងប៉េកាំងចេញ។ ចរាចរណ៍ត្រូវស្ទះចំណែកតម្លៃភាគហ៊ុនក្នុងទីតាំងហិរញ្ញវត្ថុអន្តរជាតិសំខាន់នេះ បានធ្លាក់ចុះជាង១,៥%។ ចំណែកសហគ្រាសក្រុងហុងកុងជាច្រើនក៏ប្រកាសពីបំណងរបស់ពួកគេបិទទ្វារ ដើម្បីចូលរួមតវ៉ាដែរ។ កងកម្លាំងប៉ូលិសដែលដាក់ពង្រាយនាឱកាសនោះ ភាគច្រើនពាក់ម៉ាស់ មួកកាស់និងពាក់វ៉ែនតាការពារ ពុំមានច្រើនដូចពួកអ្នកតវ៉ាឡើយ។
បាតុករទាំងនេះប្រមូលផ្ដុំគ្នាដើម្បីតាមដាន ការពិនិត្យបន្តគម្រោងច្បាប់ដោយក្រុមប្រឹក្សាសភា ជាសភាក្រុងហុងកុង។ ប៉ុន្តែខណៈពួកបាតុករលើកគ្នាមកច្រើន ប្រធានសភាគ្របដណ្ដប់ដោយបណ្ដាមនុស្សស្និទ្ធចិនដីគោកបានប្រកាសថា ការបន្តពិនិត្យគម្រោងច្បាប់នេះត្រូវពន្យារពេលទៅធ្វើ្វើនាពេលក្រោយ។
ដូចកាលពេលមានចលនាស្និទ្ធលទ្ធិប្រជាធិបតេយ្យកាលពីឆ្នាំ២០១៤ ដែលធ្វើឲ្យរាំងស្ទះក្នុងសង្កាត់ជាច្រើន រយៈពេលដល់ជាង២ខែ ពួកបាតុករលើកនេះបានលើកគ្នា រាំងខ្ទប់វិថីសំខាន់ៗនាកណ្ដាលក្រុងដោយប្រើរបាំងដែក។ យោងតាមទូរទស្សន៍RTHKថា បាតុករមួយចំនួនរហូតដល់គាស់កាយថ្មលើចិញ្ចើមថ្នល់ និងយករថយន្តពួកគេមកចតកណ្ដាលមហាវិថីមួយ។ ប៉ូលិសដែលការពារសភាបានប្រើឧស្ម័នម្រេចធ្វើឲ្យក្រហាយភ្នែកនិងកាណុងបាញ់ទឹក ប្រឆាំងពួកបាតុករ ហើយក៏លើកផងដែរប៉ង់កាតព្រមានថា ពួកគេត្រៀមប្រើកម្លាំងក្នុងករណីមានការរុលទៅមុខរបស់បាតុករ។
ក្រុងហុងកុងកាលពីថ្ងៃទី៩មិថុនាជាទីលាននៃមហាបាតុកម្មធំមួយ ពុំដែលមានចាប់តាំងពីការប្រគល់ដែនដីនោះទៅឲ្យចិនវិញពីឆ្នាំ១៩៩៧មក ដោយតាមពួកអ្នករៀបចំថា មានមនុស្សចូលរួមដល់ទៅជាង១លាននាក់។ ប៉ុន្តែការលើកគ្នាធ្វើបាតុកម្មធំបែបនេះ ក្នុងទីក្រុងមានប្រជាជន៧លាននាក់នោះ ពុំបានធ្វើឲ្យប្រមុខរដ្ឋាភិបាលក្រុងនោះ លោកស្រីCARRIE LAMដកថយឡើយ។ លោកស្រីបានបដិសេធការដកចេញជាយថាហេតុគម្រោងច្បាប់នោះ។ លោកស្រីក៏ព្រមានផងដែរចំពោះពួកប្រឆាំងកុំឲ្យប្រើសកម្មភាពរ៉ាឌីកាល់ឬជ្រុលនិយម។
គម្រោងច្បាប់ត្រូវបានរិះគន់ដោយបណ្ដាប្រទេសលោកខាងលិចដែលបារម្ភថា អាចចាប់បញ្ជូនទៅតុលាការចិនបណ្ដាអ្នកប្រឆាំងខាងនយោបាយ និងនាំឲ្យមានការប៉ះពាល់ដល់សេរីភាព៕ (កែសម្រួលដោយ ៖ បុប្ផា)
ចែករំលែកព័តមាននេះ