ខេត្តមណ្ឌលគិរី ៖ តម្លៃដីធ្លីនៅក្នុងភូមិសាស្ត្រស្រុកអូររាំង កំពុងឡើងថ្លៃលឿនដូចព្រួញ ក្រោយពេលអាជ្ញា ធរខេត្ត សហការជាមួយក្រុមមន្ត្រីអាកាសចរណ៍ស៊ីវិល ចុះកំណត់ព្រំដីនិងសិក្សាបន្ថែម ដើម្បីឈានដល់ការអភិវឌ្ឍអាកាសយានដ្ឋានលើផ្ទៃដីទំហំជាង៣០០ហិកតា ស្ថិតក្នុងភូមិពូហ្សាម…
ខេត្តមណ្ឌលគិរី ៖ តម្លៃដីធ្លីនៅក្នុងភូមិសាស្ត្រស្រុកអូររាំង កំពុងឡើងថ្លៃលឿនដូចព្រួញ ក្រោយពេលអាជ្ញា ធរខេត្ត សហការជាមួយក្រុមមន្ត្រីអាកាសចរណ៍ស៊ីវិល ចុះកំណត់ព្រំដីនិងសិក្សាបន្ថែម ដើម្បីឈានដល់ការអភិវឌ្ឍអាកាសយានដ្ឋានលើផ្ទៃដីទំហំជាង៣០០ហិកតា ស្ថិតក្នុងភូមិពូហ្សាម ឃុំសែនមនោរម្យ ស្រុកអូររាំង ។
លោក សៀក មុន្នី អភិបាលស្រុកអូររាំងបានឲ្យដឹងថា កាលពីពេលថ្មីៗនេះ ប្រតិភូរបស់អាកាស ចរណ៍ស៊ីវិល បានទៅពិនិត្យទីតាំងជាក់ស្តែង ដែលបានកំណត់តាំងពីយូរមកហើយសម្រាប់អភិវឌ្ឍន៍ទៅជាព្រលានយន្តហោះ ។ ដោយសារនៅទីតាំងនេះត្រូវអភិវឌ្ឍន៍ មានគម្រោងច្រើន ដូច្នេះផ្ទៃដីដែលទុកសម្រាប់ធ្វើព្រលានមានទំហំធំរាប់រយហិកតា ពោលគឺមានការសង់ហេដ្ឋារចនាសម្ព័ន្ឋជាច្រើនបន្ថែមទៀត ។
លោក ស្វាយ សំអ៊ាង អភិបាលខេត្ត ថ្លែងថា«គម្រោងសាងសង់ព្រលានយន្តហោះនេះ គឺគ្រាន់តែខាងខេត្តនិងអាកាសចរណ៍ស៊ីវិលសហការគ្នា ដើម្បីរៀបចំទីតាំងដីទុកសម្រាប់កសាងព្រលានយន្តហោះ ។ នេះជាគម្រោងមួយដែលខេត្តបានរកដីទុក ប៉ុន្តែពាក់ព័ន្ធនឹងគម្រោងសាងសង់ យើងនៅមិនទាន់ប្រាកដថា តើត្រូវសាងសង់នៅពេលឆាប់ៗនេះ ឬក៏ទៅអនាគតខាងមុខ ពោលគឺមិនទាន់កំណត់ថា យ៉ាងណានោះទេ…ដោយសារឥឡូវនេះយើងក៏មិនទាន់មានថវិកា ឬដៃគូសម្រាប់សាងសង់ព្រលាននេះ ។
ប៉ុន្តែជាការសំខាន់ យើងត្រូវត្រៀមដីបម្រុងទុក ចៀសវាងគ្មានទីតាំងនៅពេលដែលគម្រោងត្រូវចាប់ផ្តើមយើងមានដីបម្រុងទុក ។ លោកអភិបាលខេត្តបញ្ជាក់ថា បើយើងមិនធ្វើអុីចឹងទេ យើងអត់មានទីតាំងសម្រាប់សាងសង់ទេ ដូច្នេះហើយបានជាអាជ្ញាធរខិតខំការពារដី ទុករហូតទំហំជាង៣០០ហិកតា» ។
ទោះជាយ៉ាងណា គេនៅមិនទាន់ដឹងថា គម្រោងសាងសង់ព្រលានយន្តហោះថ្មីនេះ នឹងចាប់ផ្តើមសាងសង់ពិតប្រាកដនៅពេលណាទេ តែមន្ត្រីអាជ្ញាធរមូលដ្ឋានបានសម្តែងសុទិដ្ឋិនិយមថា បើគម្រោងព្រលានយន្ត ហោះត្រូវបានសាងសង់រួចរាល់ វាបានហុចផលយ៉ាងច្រើនដល់ប្រជាពលរដ្ឋនៅតំបន់នោះ ជាពិសេសវានឹងបម្រើផលប្រយោជន៍លើវិស័យទេសចរណ៍បានប្រសើរជាងមុន ។
ចំពោះវិស័យដីធ្លីវិញគេសង្កេតឃើញថា មានឈ្មួញគ្រាក់ៗរាប់រយនាក់មកពីទីក្រុង ជាពិសេសថៅកែខ្លះស្កាត់តាំងពីខេត្តព្រះសីហនុ សម្រុកទៅរកទិញដីនៅតំបន់ស្រុកអូររាំង ។ ដីដែលមានហាងឆេងជាងគេនៅតំបន់នេះ គឺដីនៅឃុំដាក់ដាំ និងឃុំសែនមនោរម្យ ដែលកាលពីមុនឆ្នាំ២០១៨ ដីនៅទីនេះតាមបណ្តោយផ្លូវ ជាតិមានតម្លៃប្រមាណត្រឹម៥០០ដុល្លារទៅ៧០០ដុល្លារប៉ុណ្ណោះក្នុងមួយម៉ែត្រ ។ ចំណែកដីប្រភេទចម្ការមានតម្លៃចន្លោះពី១.៥០០ដុល្លារទៅ៣.០០០ដុល្លារ ក្នុងមួយហិកតា តែចាប់ពីដើមឆ្នាំ២០១៩ រហូតមកដល់បច្ចុប្បន ្នដីទាំងនោះបានកើនតម្លៃទ្វេមួយជាដប់ ។
ក្រុមអ្នកគួកជេដីនៅខេត្តមណ្ឌលគិរី បានឲ្យដឹងថា ដីនៅស្រុកអូររាំងសព្វថ្ងៃដែលនៅជាប់ផ្លូវជាតិមានតម្លៃចាប់ពី១.៥០០ដុល្លារទៅ ៣.៥០០ដុល្លារឬថ្លៃជាងនេះ ទៅតាមទីតាំងជាក់ស្តែង ។ រីឯដីភ្នំឬប្រភេទចម្ការធំៗបានកើនឡើងរហូតដល់៥.០០០ដុល្លារ ទៅរាប់ម៉ឺនដុល្លារក្នុងមួយហិកតា ដោយសារមាននាយទុនទិញទុកលក់បន្ត ។ ចំណែកអ្នកខ្លះទៀតទិញប្រភេទដីមានភ្នំឬទឹកអូរ សម្រាប់សង់ជារីសត ទើបធ្វើឲ្យតម្លៃដីនៅតំបន់នេះឡើងថ្លៃនឹកស្មានមិនដល់ ។
សូមរំឭកថា ខេត្តមណ្ឌលគិរីបានបាត់បង់ព្រលានយន្តហោះដែលមានតាំងពីកាលបង្កើតខេត្តនេះដំបូង ក្រោយពីរាជរដ្ឋាភិបាលសម្រេចយកព្រលានចាស់ធ្វើជាសួនឧទ្យានជាតិមុនដំបូងគេនៅប្រទេសកម្ពុជា ដែលមានទីតាំងនៅកណ្តាលក្រុងសែនមនោរម្យ ជិតរង្វង់មូលគោព្រៃ ៕ (សម្រួលដោយ៖ ស្រីណា)
ចែករំលែកព័តមាននេះ