ខេត្តកណ្ដាល ៖ បុរសម្នាក់មានទំនាស់ក្នុងគ្រួសារ ហើយដោយសារការរស់នៅមិនចុះសម្រុងនឹងគ្នាជាមួយប្រពន្ធនោះ ជនរងគ្រោះក៏បានសម្រេចចិត្តចុះចេញទៅរស់នៅផ្ទះក្មួយស្រីអស់រយៈពេល១០ឆ្នាំកន្លងមកហើយ ។ មិនតែប៉ុណ្ណោះ ចាប់តាំងពីពេលបែកបាក់គ្រួសារមក ធ្វើឱ្យជនរងគ្រោះផឹកស្រា និងបានប៉ុនប៉ងបញ្ចប់ជីវិតដោយការធ្វើអត្តឃាតជាច្រើនដងមកហើយ…
ខេត្តកណ្ដាល ៖ បុរសម្នាក់មានទំនាស់ក្នុងគ្រួសារ ហើយដោយសារការរស់នៅមិនចុះសម្រុងនឹងគ្នាជាមួយប្រពន្ធនោះ ជនរងគ្រោះក៏បានសម្រេចចិត្តចុះចេញទៅរស់នៅផ្ទះក្មួយស្រីអស់រយៈពេល១០ឆ្នាំកន្លងមកហើយ ។ មិនតែប៉ុណ្ណោះ ចាប់តាំងពីពេលបែកបាក់គ្រួសារមក ធ្វើឱ្យជនរងគ្រោះផឹកស្រា និងបានប៉ុនប៉ងបញ្ចប់ជីវិតដោយការធ្វើអត្តឃាតជាច្រើនដងមកហើយ ប៉ុន្តែមិនបានសម្រេចឡើយ ដោយសារបានក្មួយស្រី និងអ្នកផ្ទះជួយទាន់ពេល ។ លុះដល់ពេលចុងក្រោយនេះ ជនរងគ្រោះបានយកខ្សែអង្រឹងចងកនៅលើដើមចន្ទន៍ បណ្ដាលឲ្យស្លាប់តែម្ដង។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលឡើងកាលពីវេលាម៉ោង៦និង១០នាទីព្រឹកថ្ងៃទី១១ ខែមិថុនា ឆ្នាំ២០១៩ នៅលើដើមចន្ទន៍ខាងក្រោយផ្ទះក្មួយស្រីរបស់ជនរងគ្រោះ ស្ថិតនៅក្នុងភូមិបឹងថ្នល់ ឃុំម្កាក់ ស្រុកអង្គស្នួល ខេត្តកណ្តាល។
ជនរងគ្រោះដែលស្លាប់ឈ្មោះមុត នាង ភេទប្រុស អាយុ៤៤ឆ្នាំ មុខរបរកសិករ ស្នាក់នៅជាមួយក្មួយស្រីនៅភូមិឃុំកើតហេតុ។
តាមប្រភពពីស្ត្រីឈ្មោះ មុត សៅនី អាយុ៣២ឆ្នាំ មុខរបរកម្មការនីរោងចក្រកាត់ដេរ ដែលត្រូវជាក្មួយរបស់ជនរងគ្រោះបាននិយាយថា ជនរងគ្រោះដែលត្រូវជាពូរបស់គាត់មានប្រពន្ធនិងកូនម្នាក់ ប៉ុន្តែទាំងប្រពន្ធនិងជនរងគ្រោះរស់នៅមិនចុះសម្រុងនឹងគ្នាឡើយ ហើយជនរងគ្រោះក៏បានសម្រេចចិត្តរស់នៅបែកគ្នាបណ្ដោះអាសន្ន។ ក្រោយពេលការបែកបាក់គ្នារួចមក ជនរងគ្រោះបានមកស្នាក់នៅជាមួយគាត់ ចំណែកប្រពន្ធនិងកូននៅផ្ទះផ្សេង ហើយដោយសារតែការចង់ចាញ់ចង់ឈ្នះគ្នាទៅវិញទៅមក ទើបធ្វើឱ្យការរស់នៅបែកគ្នានោះអូសបន្លាយរហូតអស់រយៈពេល១០ឆ្នាំកន្លងមកហើយ។
តាមប្រភពដដែលបានបន្តថា បន្ទាប់មកជនរងគ្រោះបានយកស្រាធ្វើជាត្រីមុខផឹកស្រវឹងរាល់ថ្ងៃ ហើយពេលស្រវឹងម្ដងៗតែងតែជេរបញ្ចោរអ្នកផ្ទះជាបន្តបន្ទាប់ មិនតែប៉ុណ្ណោះបានព្យាយាមធ្វើអត្តឃាតដោយចងកសម្លាប់ខ្លួនជាច្រើនដងមកហើយ ប៉ុន្តែត្រូវបានគាត់និងអ្នកផ្ទះជួយទាន់ ។ ដោយឡែកនៅយប់ថ្ងៃទី១០ ខែមិថុនា គាត់និងក្រុមគ្រួសារបានដេកលង់លក់មិនបានដឹងថាជនរងគ្រោះសម្លាប់ខ្លួននោះឡើយ រហូតដល់ព្រឹកឡើង ក្រោយភ្ញាក់ពីដេក គាត់ក៏បើកទ្វារចេញក្រៅ ស្រាប់តែប្រទះឃើញជនរងគ្រោះចង.កនៅលើដើមចន្ទន៍ក្រោយផ្ទះស្លាប់បាត់ទៅហើយ ។ ពេលនោះគាត់ភ័យខ្លាំងណាស់ ក៏រត់ទៅហៅម្ដាយ និងបងប្អូនឲ្យទៅជួយមើល ក៏បង្កការភ្ញាក់ផ្អើលទាំងព្រឹកនិងនាំគ្នាស្រាយខ្សែទម្លាក់ជនរងគ្រោះចុះមកក្រោមភ្លាមៗផងដែរ ក្រែងអាចសង្គ្រោះបាន ប៉ុន្តែហួសពេលទៅហើយព្រោះមិនបានដឹងថា ជនរងគ្រោះចងកស្លាប់តាំងពីពេលណានោះឡើយ។
តាមប្រភពពីនគរបាលបាននិយាយថា ក្រោយពេលទទួលបានដំណឹងខាងលើនោះភ្លាម កម្លាំងនគរបាលប៉ុស្តិ៍រដ្ឋបាលម្កាក់និងនគរបាលព្រហ្មទណ្ឌស្រុក ព្រមទាំងនគរបាលផ្នែកពិនិត្យវិភាគកន្លែងកើតហេតុស្រុកអង្គស្នួល។ មន្ត្រីក្រុមប្រឹក្សាឃុំ លោកគ្រូពេទ្យ លោកមេភូមិ និងសាច់ញាតិនៃសពបានពិនិត្យ និងធ្វើកោសល្យវិច័យរកឃើញថា ជនរងគ្រោះពិតជាធ្វើអត្តឃាតដោយសារចងកសម្លាប់ខ្លួនប្រាកដមែន បន្ទាប់មកសមត្ថកិច្ចក៏បានប្រគល់សពជនរងគ្រោះឱ្យទៅក្រុមគ្រួសារសាច់ញាតិដើម្បីចាត់ចែធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ