រាជធានីភ្នំពេញ ៖ អង្គការការពារកុមារ(CPU) និងក្រុមមន្ត្រីជំនាញឯកទេសអន្តរជាតិ បានរៀបចំសិក្ខា សាលាបណ្តុះបណ្តាលដល់មន្ត្រីនគរបាលកម្ពុជា កងរាជអាវុធហត្ថ និងព្រះរាជអាជ្ញាសរុបចំនួន៥៩រូប ស្តីពីការស៊ើបអង្កេតបទល្មើសឃាតកម្មប្រឆាំងនឹងកុមារលើកដំបូង ដើម្បីពង្រឹងសមត្ថភាពដល់មន្ត្រីនគរបាលនៅកម្ពុជារយៈពេល៦ថ្ងៃ ពីថ្ងៃទី១០ដល់ថ្ងៃទី១៥ ខែមិថុនា នៅសណ្ឋាគារកាំបូឌីយ៉ាណា ។
សិក្ខាសាលានេះ មានគោលបំណងបណ្ដុះបណ្ដាលមន្ត្រីជំនាញអនុវត្តច្បាប់ក្នុងស្រុកជាច្រើននាក់ ព្រមទាំងមន្ត្រីឯកទេសអន្តរជាតិមួយចំនួន ដែលមានការពាក់ព័ន្ធនៅក្នុងការសើុបអង្កេតបទល្មើសឃាតកម្ម ដោយមានគ្រូបង្រៀនមកពីបរទេសដែលមានបទពិសោធន៍ខ្ពស់ ក្នុងការស៊ើបអង្កេតប្រឆាំងបទល្មើសឧក្រិដ្ឋនានាប្រឆាំងកុមារ ។
ថ្លែងក្នុងសិក្ខាសាលានេះ លោកឧត្តមសេ នីយ៍ឯក អុិន ប៉ូរ៉ា អគ្គស្នងការរងនគរបាលជាតិ ទទួលផែនកណ្តាលយុត្តិធម៌ បានថ្លែងថា អង្គភាពការពារកុមារ(CPU) បានបើកសិក្ខាសាលារយៈ ពេល៦ថ្ងៃបណ្ដុះបណ្ដាលផ្នែកស៊ើបអង្កេតឃាតកម្មដល់មន្ត្រីអនុវត្តច្បាប់កម្ពុជា ។
លោកបញ្ជាក់ថា «ឃាតកម្មលើកុមារមិនមានការកើនឡើងទេគឺថយចុះ» ប៉ុន្តែសម្រាប់ឃាតកម្មនៅខេត្តព្រះសីហនុមានលក្ខណៈឃោរឃៅ ។ មិនថាករណីនេះទេ បទឧក្រិដ្ឋដទៃទៀត ត្រូវបានអគ្គស្នងការនគរ បាលជាតិលោកនាយឧត្តម សេនីយ៍ នេត សារឿន ដាក់បទបញ្ជាឲ្យមានការទប់ស្កាត និងកុំឲ្យមានការកើតឡើងបែបនេះទៀត ។
លោកអគ្គស្នងការរងបន្តថា «កងកម្លាំងនគរបាលជាតិ បង្ក្រាបបទល្មើសឃាតកម្មលើកុមារបានជាង៨០% តែសកម្មភាពប្លន់សម្លាប់ទ្រង់ ទ្រាយធំមិនមានកើតឡើងច្រើនទេ» ។ លោកបានកត់សម្គាល់ថា អំឡុងទសវត្សរ៍ឆ្នាំ១៩៨៣ដល់ឆ្នាំ១៩៨៦ មិនមានឧក្រិដ្ឋកម្មធំៗកើតឡើងនៅកម្ពុជាទេ សូម្បីតែការឆក់ប្លន់ក៏គ្មានដែរ ។
បទឧក្រិដ្ឋបានកើតឡើងនៅពេលដែលសង្គមមានការវិវត្តឡើង ។ ក្នុងរយៈពេល៦ថ្ងៃនៃសិក្ខាសាលានេះ លោកសូមឲ្យសិក្ខាកាមទាំងអស់ខិតខំយកចិត្តទុកចំពោះការសិក្សានេះ ធ្វើយ៉ាងណាឲ្យសភាពការណ៍បទ ល្មើសឧក្រិដ្ឋថយចុះ ។ សកម្មភាពប្លន់ប្រដាប់អាវុធមានការថយចុះ តែបទល្មើសឃាតកម្មរំលោភសម្លាប់កើនឡើង ។
លោកបានថ្លែងផ្តាំផ្ញើដល់សិក្ខាកាមដែលបានចូលរួម ត្រូវយកចិត្តទុកដាក់ចំពោះការសិក្សានេះ ដើម្បីយកទៅអនុវត្តជាក់ស្តែងក្នុងការស៊ើបអង្កេតប្រឆាំងករណីមនុស្សឃាតនៅក្នុងប្រទេសកម្ពុជា ។ ជាក់ស្តែង ករណីរំលោភសម្លាប់កាលពីថ្ងៃទី២៩ ខែឧសភា កម្លាំងនគរបាលបានស្រាវជ្រាវតាមចាប់ជនល្មើសដែលរត់ពីខេត្តព្រះសីហនុទៅដល់ខេត្តកំពង់ចាម ខេត្តស្វាយរៀង និងចាប់បាននៅខេត្តព្រៃវែង ។
លោកអគ្គស្នងការរងបន្តថា ឃាតកម្មមួយចំនួនមានភាពសាវហាវ ព្រោះជនល្មើសមានពាក់ព័ន្ធនឹងគ្រឿងស្រវឹង រួចប្រព្រឹត្តបទល្មើស ។ សមត្ថកិច្ចបានពន្យល់ប្រជាពលរដ្ឋ ដើម្បីឲ្យយល់ដឹងពីបញ្ហាសង្គម ឬករណីខ្លះទៀតហិង្សាក្នុងគ្រួសារជាដើម ។លោក James McCabe នាយកប្រតិបត្តិអង្គការការពារកុមារ ថ្លែងថា «យើងមានភ័ព្វសំណាងណាស់ ដែលមានបុគ្គលិកមានជំនាញឯកទេសទាំងនេះបានមកដល់ប្រទេសកម្ពុជា ដោយនាំមកនូវបទពិសោធន៍ជាច្រើនឆ្នាំផ្នែកស៊ើបអង្កេតលើបទល្មើសឃាតកម្ម» ។
លោក James McCabe លើកឡើងថា គិតចាប់តាំងពីខែមករា ឆ្នាំ២០១៣ មកដល់បច្ចុប្បន្នមានសំណុំ រឿងជាង១.៤០០ករណី ត្រូវបានបង្ក្រាបហើយជនល្មើសត្រូវបានចោទប្រកាន់ពាក់ព័ន្ធនឹងករណីឃាតកម្ម ។ ក្នុងនោះមានជនសង្ស័យប្រមាណ៨៩%ត្រូវបានចាប់ខ្លួន និងត្រូវតុលាការផ្តន្ទាទោសដាក់ពន្ធនាគារយ៉ាងធ្ងន់ ។
លោក James McCabe បានបញ្ជាក់ថា សិក្ខាសាលានេះ នឹងក្លាយទៅជាកាលានុវត្តភាពដ៏ពិសេសមួយសម្រាប់អ្នកចូលរួមទាំងអស់ឲ្យទទួលបាននូវចំណេះដឹង និងបទពិសោធន៍ជាក់ស្ដែង ពីមន្ត្រីជំនាញឯកទេសអន្តរជាតិទាំងឡាយ ស្ដីអំពីបច្ចេកទេស និងវិធីសាស្ត្រផ្សេងៗដែលគេបានប្រើប្រាស់ក្នុងការស៊ើបអង្កេតបទល្មើសមនុស្សឃាតនាសម័យទំនើបនេះ ។
គួរបញ្ជាក់ថា សិក្ខាកាមចូលរួមចំនួន៥៩រូបនេះគឺមកពី អយ្យការសាលាឧទ្ធរណ៍៤រូប អគ្គព្រះរាជអាជ្ញារង២រូប ព្រះរាជអាជ្ញា២រូប នាយកដ្ឋាននៃក្រសួងមហាផ្ទៃ៤រូប នាយកដ្ឋានបច្ចេកទេសនៃក្រសួងមហាផ្ទៃ៤រួប កងរាជអាវុធហត្ថរាជធានីភ្នំពេញ៤រូប និងស្នងការដ្ឋាននគរបាលរាជធានី-ខេត្ត៤២រូប ៕
ចែករំលែកព័តមាននេះ