រាជធានីភ្នំពេញ ៖ រដ្ឋសភាបានជំរុញឲ្យស្ថាប័នពាក់ព័ន្ធខិតខំដោះស្រាយផលប៉ះពាល់នៃការប្រើប្រាស់ថ្នាំជក់នៅកម្ពុជាឲ្យមានប្រសិទ្ធិខ្ពស់ក្នុងការទប់ស្កាត់ជំងឺមួយចំនួន ដែលបណ្តាលមកពីការប្រើប្រាស់ថ្នាំជក់ ។ ថ្លែងក្នុងសិក្ខាសាលាស្តីពី «ភាពជាអ្នកដឹកនាំក្នុងការត្រួតពិនិត្យការអនុវត្តន៍ច្បាប់ និងលិខិតបទដ្ឋានគតិយុត្តិនានាស្តីពីការត្រួតពិនិត្យផលិតផលថ្នាំជក់» លោក ងួន ញ៉ិល អនុប្រធានទី១ រដ្ឋសភាបានលើកឡើងថា ទោះបីជាថ្នាំជក់មិនមែនកើតមានតែនៅប្រទេសកម្ពុជាយើងក៏ដោយ ប៉ុន្តែវាជាបញ្ហាចម្បងដែលកើតមាននៅក្នងប្រទេសយើង និងបណ្តាប្រទេសនានាជាច្រើននៅលើសកលលោក ។
លោកបញ្ជាក់ថា បច្ចុប្បន្ននេះបញ្ហានេះបានកំពុងបង្កឲ្យមាននូវផលវិបាក និងបានប៉ះពាល់ យ៉ាងខ្លាំងដល់សុខភាពអាយុជីវិតគ្រួសារសង្គម សេដ្ឋកិច្ច និងប្រទេសជាតិទាំងមូលដែលក្នុងនោះមានជាអាទិ៍កើតជំងឺមិនឆ្លងធ្ងន់ធ្ងរ ដូចជា ជំងឺសរសៃឈាមបេះដូង ជំងឺមហារីក (មាត់ស្បូន ថ្លើម សួត ក្រពះ សុដន់) ជំងឺផ្លូវដង្កើម និងជំងឺទឹកនោមផ្អែម ។ លោកអនុប្រធានទី១ រដ្ឋសភាក៏បានលើកឡើងថា ទាក់ទង និងជំងឺដែលបណ្តាលមកពីការប្រើប្រាស់ថ្នាំជក់វិញ រាជរដ្ឋាភិបាលក៏បានដាក់ចេញជាបន្តបន្ទាប់នូវលិខិតបទដ្ឋានគតិយុត្តផ្សេងៗដូចជា ច្បាប់ស្តីពីការត្រួតពិនិត្យថ្នាំជក់ អនុក្រឹត្យស្តីពីការបោះពុម្ភសារព្រមានសុខភាពជាភាសាខ្មែរ និងជារូបភាពលើកញ្ចប់ផលិតផលថ្នាំជក់ ប្រកាសស្តីពីវិធានការចំពោះការដាក់តាំងបង្ហាញកញ្ចប់ថ្នាំជក់នៅកន្លែងធ្វើការ ឬកន្លែងសាធារណៈ ប្រកាសស្តីពីស្លាកបម្រាមនៃការហាមជក់ ឬការបង្ហុយផ្សែងផលិតផលថ្នាំជក់ ព្រមទាំងសកម្មភាព អប់រំផ្សេងៗ ទៀតដល់ប្រជាជនឲ្យជៀងវាងឲ្យផុតពីការប្រើប្រាស់ថ្នាំជក់ជាដើម ។
ក្នុងសិក្ខាសាលានោះដែរលោកអនុប្រធានទី១បានលើកឡើងតាងនាមសម្តេចហេង សំរិនប្រធានរដ្ឋសភា លោកអនុប្រធានទី១ រដ្ឋសភាជំរុញឲ្យមានការដោះស្រាយចំពោះផលប៉ះពាល់នៃការប្រើប្រាស់ថ្នាំជក់ដូចជា ៖លើកទឹកចិត្តឲ្យមានការសហការកាន់តែប្រសើរថែមទៀត រវាងគណៈកម្មការទី៨ នៃព្រឹទ្ធសភា រដ្ឋសភា និងក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ ជាពិសេសគណៈកម្មាធិការត្រួតពិនិត្យផលិតផលថ្នាំជក់ ។ ស្នើក្រសួងសេដ្ឋកិច្ច និងហិរញ្ញវត្ថុសហការ ដើម្បីពង្រឹងការអនុវត្តច្បាប់ ជាពិសេសការតម្លើងពន្ធលើផលិតផលថ្នាំជក់ ។ ជម្រុញ និងលើកកម្ពស់កិច្ចសហការរវាងក្រសួងសេដ្ឋកិច្ច និងហិរញ្ញវត្ថុជាមួយនឹងក្រសួងសុខាភិបាល ក្នុងការរៀបចំបង្កើតឱ្យមានមូលនិធិត្រួតពិនិត្យថ្នាំជក់ ។ ពង្រីកទំហំការបោះពុម្ពរូបភាព និងសារព្រមានសុខភាពជាភាសាខ្មែរលើកញ្ចប់បារី ។ ជំរុញរៀបចំបង្កើតឱ្យមានអនុក្រឹត្យ ស្តីពីការគ្រប់គ្រង និងការត្រួតពិនិត្យការលក់រាយការចែកចាយ និងការលក់ដុំផលិតផលថ្នាំជក់ (មាត្រា១៤ ជំពូកទី៥ ស្តីពីការចែកចាយ និងការកំណត់ទីតាំងទីកន្លែងលក់ផលិតផលថ្នាំជក់ ) ។
លោកក៏បានបញ្ជាក់ថា ៖«ជាមួយនឹងការកាត់បន្ថយនូវអតិភាពនៃថ្នាំជក់ និងការប្រើប្រាស់ថ្នាំជក់ នៅក្នុងព្រះរាជាណាចក្រកម្ពុជា ដើម្បីលើកកម្ពស់សុខភាពរបស់ប្រជាពលរដ្ឋខ្មែរ យើងក៏ត្រូវយកចិត្តទុកដាក់ខ្ពស់ផងដែរ ចំពោះការបំផុសនូវចលនាហាត់ប្រាណ ដើម្បីសុខភាពដល់ប្រជាជនគ្រប់រូប ការពង្រីកបន្ថែមនូវចំនួនមណ្ឌលសុខភាពឲ្យបានពាសពេញផ្ទៃប្រទេសយកចិត្តទុកដាក់បន្ថែមលើការត្រួតពិនិត្យគុណភាពឱសថនៅតាមឱសថស្ថាននានាព្រមទាំងការលើកកម្ពស់បន្ថែមនូវក្រមសីលធម៌វិជ្ជាជីវៈរបស់គ្រូពេទ្យ ម្យ៉ាងទៀតយើងក៏ត្រូវយកចិត្តទុកដា ក់បន្ថែមលើការលើកកម្ពស់សុខភាពផ្លូវចិត្តរបស់ប្រជាពលរដ្ឋយើងផងដែរ» ៕កែសម្រួលដោយ ៖សុឃាក់
ចែករំលែកព័តមាននេះ