រាជធានីភ្នំពេញ ៖ ផលិតផលថ្នាំជក់បានបង្កើតហានិភ័យចម្បងបំផុតចំពោះអ្នកប្រើប្រាស់ គឺជំងឺមហារីកសួត និងមហារីកសេរីរាង្គផ្សេងៗទៀតដែលមនុស្សត្រូវចាកចេញពីការប្រើប្រាស់ផលិផលនេះ ។
លោកវេជ្ជបណ្ជិតអ៊ឹង ភីរុន រដ្ឋលេខាធិការក្រសួងសុខាភិបាល និងជាអនុប្រធានអចិន្ត្រៃយ៍គណៈកម្មាធិការត្រួតពិនិត្យផលិតផលថ្នាំជក់ ថ្លែងក្នុងសិក្ខាសាលាស្តីពី«ភាពជាអ្នកដឹកនាំក្នុងការត្រួតពិនិត្យការអនុវត្តន៍ច្បាប់ និងលិខិតបទដ្ឋានគតិយុត្តនានាស្តីពី ការត្រួតពិនិត្យផលិតផលថ្នាំជក់» នាព្រឹកថ្ងៃទី១១ ខែមិថុនា នៅវិមានរដ្ឋសភា យ៉ាងដូច្នេះថាការប្រើប្រាស់ផលិតផលថ្នាំជក់ធ្វើឱ្យមានផលប៉ះពាល់ដល់សុខភាពទាំងអ្នកជក់ និងអ្នកមិនជក់ដែលបានស្រូបផ្សែងបារីដោយអចេតនា ព្រមទាំងបានធ្វើឱ្យ ប៉ះពាល់ដល់សេដ្ឋកិច្ចជាតិសង្គម និងបរិស្ថានថែមទៀត ។
លោកបញ្ជាក់ថា ៖« ផលិតផលថ្នាំជក់ គឺជាកត្តាហានិភ័យចម្បងដែលបណ្តាលឱ្យកើតជំងឺមហារីកសួត និងមហារីកសរីរាង្គផ្សេងៗទៀតជំងឺបេះដូង និងសរសៃឈាម ជំងឺសួតរ៉ាំរ៉ៃ ជា ដើម» ។ ជាមួយគ្នានោះដែរលោករដ្ឋលេខាធិការក៏បានឲ្យដឹងថា តាមការស្រាវជ្រាវរបស់អង្គការសុខភាពពិភពលោក ការប្រើប្រាស់ថ្នាំជក់ ជាពិសេសការជក់បារី បណ្តាលឱ្យស្លាប់មនុស្ស លើពិភពលោកប្រមាណ៨.១ លាននាក់ជារៀងរាល់ឆ្នាំ ។
រីឯអ្នកមិនជក់បារីចំនួន៩សែននាក់បានស្លាប់ក្នុងមួយឆ្នាំដោយគ្រាន់តែស្រូបផ្សែងបារីពីគេ ។ ចំណែកនៅព្រះរាជាណាចក្រកម្ពុជាប្រជាពលរដ្ឋប្រើប្រាស់ថ្នាំជក់ប្រមាណ២លាននាក់ (ជក់បារីប្រមាណចំនួន១.៦ លាននាក់ និងចុកថ្នាំជក់ប្រមាណចំនួន៤សែននាក់) ។ លោករដ្ឋលេខាធិការក៏បានអះអាងថា ក្រសួងសុខាភិបាល និងគណៈកម្មាធិការត្រួតពិនិត្យផលិតផលថ្នាំជក់បាននឹងកំពុងធ្វើការយ៉ាងយកចិត្តទុកដាក់បំផុត ដើម្បីលើកកម្ពស់សុខុមាលភាពប្រជាជនកម្ពុជា និងជំរុញឱ្យមានការផ្តល់សេវាប្រកបដោយគុណភាពនឹងបានទៅដល់ប្រជាជនគ្រប់ទីកន្លែង ។ លោកបន្ថែមថា ទាក់ទងនឹងការការពារជំងឺដែលបណ្តាលមកពីការប្រើប្រាស់ផលិតផលថ្នាំជក់រាជរដ្ឋាភិបាលបានដាក់ចេញជាបន្តបន្ទាប់នូវច្បាប់ លិខិតបទដ្ឋានគតិយុត្តិផ្សេងៗផងដែរ ។
លោកបានបញ្ជាក់ «យើងមានមោទនភាពក្នុងការទទួលបានជោគជ័យក្នុងការទប់ស្កាត់ការប្រើប្រាស់ថ្នាំជក់នៅប្រទេសកម្ពុជា ។ ទន្ទឹមនឹងនេះបញ្ហាប្រឈមក្នុងការអនុវត្តការត្រួតពិនិត្យថ្នាំជក់ក៏មានដូចជា ការជ្រៀតជ្រែករបស់ឧស្សាហកម្មថ្នាំជក់ និងផលិតផលថ្នាំជក់ នៅតែជាបញ្ហាចម្បង ដោយឧស្សាហកម្មថ្នាំជក់នៅតែមានឥទ្ធិពលក្នុងការរារាំងវិធានការត្រួតពិនិត្យ ផលិតផលថ្នាំជក់តាមគ្រប់រូបភាព» ។ លោកបានបន្ថែមថា ទោះជាយ៉ាងនេះក្តីគណៈកម្មាធិការត្រួតពិនិត្យផលិតផលថ្នាំជក់ និងក្រសួងសុខាភិបាលបាននឹងកំពុងខិតខំបន្ថែមទៀត ដើម្បីជំរុញការកាត់បន្ថយការប្រើប្រាស់ថ្នាំជក់ឱ្យកាន់តែមានកម្រិតទាបជាបន្តបន្ទាប់ ។
ក្រសួងសុខាភិបាលមានមោទនភាពដោយបានរួមជាមួយស្ថាប័នពាក់ព័ន្ធ ជាពិសេសអាជ្ញាធរដែនដីដើម្បីជំរុញការអនុវត្តច្បាប់លិខិតបទដ្ឋានគតិយុត្តឲ្យមានប្រសិទ្ធភាព ។ ចំណែកលោក ស្រីឡោក ខេងប្រធានគណៈកម្មការទី៨នៃរដ្ឋសភាបានលើកឡើងថា ការកំណត់ពន្ធលើផលិតផលថ្នាំជក់នៅមានកម្រិតទាបបើធៀបនឹងប្រទេសជិតខាង ដែលយើងដឹងថាការតម្លើងពន្ធគឺចំណូលជាតិក៏ដោយចុះ។ ដោយឡែកកម្ពុជាក៏មិនទាន់មានមូលនិធិត្រួតពិនិត្យផលិតផលថ្នាំជក់ ដើម្បីពង្រឹងយន្តការផ្សព្វផ្សាយឱ្យបានទូលំទូលាយយន្តការការត្រួតពិនិត្យ យន្តការអធិការកិច្ច និងយន្តការផាកពិន័យ ។ យើងពិនិត្យឃើញថាថ្នាំជក់ គឺជាផលិតផលប្រើប្រាស់ស្រប ច្បាប់ដែលអាចបង្កគ្រោះថ្នាក់ដល់មនុស្សគ្រប់រូប ជាពិសេសមនុស្សពេញវ័យ-វ័យក្មេងដែលងាយរងនូវផលប៉ះពាល់ និងការជះឥទ្ធិពលផ្នែកសុខភាព-សុខមាលភាពសង្គម និងបរិស្ថាន ៕ កែសម្រួលដោយ ៖សុឃាក់
ចែករំលែកព័តមាននេះ