រាជធានីភ្នំពេញ ៖ ព្រឹកថ្ងៃអង្គារ ទី២៩ មីនា ២០១១ នេះ កម្មករកាត់ដេរជាង១ពាន់នាក់ បម្រើការងារនៅរោងចក្រតាកហ្វាត ស្ថិតក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ បន្តអង្គុយជួបជុំគ្នាក្នុងរោងចក្ររង់ចាំដំណោះស្រាយ បន្ទាប់ពីពួកគេបានបដិសេធមិនទទួលយកប្រាក់បំណាច់ឆ្នាំ ប្រាក់អតីតភាពការងារក្នុងម្នាក់ៗសរុប១៨០ដុល្លារ ដែលថៅកែរោងចក្របានដោះស្រាយកាលពីថ្ងៃចន្ទម្សិលមិញនោះរួចមក ។ ទោះជាយ៉ាងណា ការប្រមូលផ្តុំអង្គុយរង់ចាំដំណោះស្រាយនាពេលនេះគឺពុំមានលក្ខណៈទ្រង់ទ្រាយធំដូចកាលពីថ្ងៃម្សិលមិញនោះទេ ។
ប្រភពពីកម្មករបានឱ្យកោះសន្តិភាពដឹងនាព្រឹកថ្ងៃទី២៩ មីនា នេះថា ថ្ងៃនេះមេធាវី និងថៅកែរោងចក្រនឹងបន្តជួបនិយាយគ្នាពីបញ្ហាប្រាក់នេះ ។ គួរបញ្ជាក់ថា បន្ទាប់ពីតវ៉ាពុំទទួលបានលទ្ធផលចាប់តាំងពីថ្ងៃទី១៦ មីនា នោះរួចមក កាលពីព្រឹកថ្ងៃចន្ទម្សិលមិញកម្មករ-កម្មការិនីជាង១ពាន់នាក់នៅរោងចក្រតាកហ្វាតខាងលើបានឯកភាពគ្នាសម្រេចធ្វើបាតុកម្មបិទផ្លូវជាតិលេខ២ ប្រយោជន៍ដើម្បីទាមទារឱ្យថៅកែរោងចក្រដោះស្រាយនូវប្រាក់បំណាច់ឆ្នាំ ប្រាក់អតីតភាពការងារ និងប្រាក់ឧបត្ថម្ភផ្សេងៗទៀតទៅតាមច្បាប់ការងារ ក្រោយពេលដែលរោងចក្រនេះបានបិទដំណើរការចង្វាក់ផលិតកម្មកាលពីថ្ងៃទី១៦ មីនា កន្លងមកនោះ ។
ប៉ុន្តែការបិទផ្លូវបង្កឱ្យមានការកកស្ទះចរាចរណ៍បានប្រមាណ៣០នាទី សមត្ថកិច្ចចម្រុះមានប៉ូលិស-ប៉េអឹមប្រមាណ៣០០នាក់ ប្រដាប់ដោយដំបងឆក់ ខែល បានធ្វើការបំបែក និងរុញច្រានកម្មករដើម្បីបើកផ្លូវជាតិលេខ២ឡើងវិញ ។ ក្នុងពេលនោះ ក្រុមកម្មករបានស្រែកចំអកទៅកាន់សមត្ថកិច្ចថា ពួកគេតវ៉ាចំពោះការកឹបកេង និងការកេងប្រវ័ញ្ចពីសំណាក់ថៅកែរោងចក្រក្នុងនាមពួកគេជាកម្មករស្លូតត្រង់តែប៉ុណ្ណោះ ហេតុអ្វីសមត្ថកិច្ចមិនជួយអន្តរាគមន៍ឈឺឆ្អាលដល់ពួកគេ បែរជាមកគាបសង្កត់ពួកគេនោះថែមទៀតទៅវិញ ៕
ចែករំលែកព័តមាននេះ