កាលពីពេលថ្មីៗនេះ លោក អ៊ុក សំអឿន តំណាងអោយព្រះសង្ឃ គណៈកម្មការវត្ដខ្មែរ និងបងប្អូនខ្មែរនៅប្រទេសស្វីស បាននាំយកបច្ច័យដែលបានមកពីបុណ្យផ្កាសាមគ្គីនៅប្រទេសស្វីស យកមកប្រគេនព្រះសង្ឃព្រះនាម មាច សោភ័ណ្ឌ ចៅអធិការវត្ដមេព្រីង ដែលស្ថិតនៅឃុំមេព្រីង ស្រុកបាធាយ ខេត្ដកំពង់ចាម ដោយមានការចូលរួមពីឯកឧត្ដម អ៊ុច បូរិទ្ធ រដ្ឋលេខាធិការក្រសួងការបរទេស និងលោក ជា បូរ៉ាត អធិការ និងជាជំនួយការឯកឧត្ដមឧបនាយករដ្ឋមន្ដ្រី ហោ ណាំហុង ផងដែរ ។
សូមរំលឹកផងដែរថា កាលពីថ្ងៃទី១០ ខែតុលា ឆ្នាំ២០០៩ គណៈកម្មការវត្ដខ្មែរ និងបងប្អូនខ្មែរនៅប្រទេសស្វីស ដែលមានរាយនាមដូចខាងក្រោម ៖
១-ព្រះតេជគុណ ថាំង ពិសិដ្ឋ ចៅអធិការវត្ដខ្មែរនៅប្រទេសស្វីស
២-ព្រះតេជគុណ សៀន សេដ្ឋា
៣-ឯកឧត្ដម ស៊ុន ស៊ួន ឯកអគ្គរាជទូត និងតំណាងអចិន្ដ្រៃយ៍នៃព្រះរាជាណាចក្រកម្ពុជាប្រចាំំ អ.ស.ប
៤-លោក អ៊ុក សំអឿន
៥-លោក ប៉ិច ដឿង
៦-លោក ឡុក ហ៊ុត
បានមូលមតិគ្នាជាឯកច្ឆ័ន្ទផ្ដួចផ្ដើមធ្វើបុណ្យផ្កាសាមគ្គីនៅប្រទេសស្វីស ថ្ងៃទី១០ ខែតុលា ឆ្នាំ២០០៩ ដើម្បីប្រមូលបច្ច័យយកមកកសាងវត្ដមេព្រីង ស្ថិតនៅឃុំមេព្រីង ស្រុកបាធាយ ខេត្ដកំពង់ចាម ។
ក្រោយពីបានទទួលបានបច្ច័យពីលោក អ៊ុក សំអឿន ព្រះតេជគុណ មាច សោភ័ណ្ឌ ចៅអធិការវត្ដមេព្រីង បានថ្លែងអំណរគុណយ៉ាងជ្រាលជ្រៅដល់លោក អ៊ុក សំអឿន ព្រមទាំងព្រះសង្ឃ គណកម្មការវត្ដខ្មែរ និងបងប្អូនខ្មែរនៅប្រទេសស្វីស និងសូមជូនពរ សូមឱ្យព្រះសង្ឃ គណកម្មការវត្ដខ្មែរ និងបងប្អូនខ្មែរនៅប្រទេសស្វីសទាំងអស់ ជួបប្រទះតែនិងពុទ្ធពរទាំង៥ប្រការ គឺ អាយុ វណ្ណៈ សុខៈ ពលៈ និងបដិភាណៈ កុំបីឃ្លាងឃ្លៀតឡើយ ។
ចែករំលែកព័តមាននេះ