រាជធានីភ្នំពេញ ៖ សម្តេចតេជោនាយករដ្ឋមន្ត្រីហ៊ុន សែន បានហៅទិវាហូបនំបញ្ចុក ថ្ងៃ៩ មិថុនា គឺជាការស្រឡាញ់ជាតិមាតុភូមិក្រោមម្លប់សន្តិភាព ដែលខិតខំកសាងដោយលំបាកបំផុត ។ ការលើកឡើងរបស់សម្តេចតេជោផ្ទុយពីរការលើកឡើងរបស់អតីតមេបក្សប្រឆាំងថា ការហូបនំបញ្ចុក គឺជាការសង្គ្រោះជាតិ ។
សម្តេចតេជោហ៊ុន សែន បានសរសេរលើបណ្តាញសង្គមដោយបានអរគុណបងប្អូនខ្មែរ ដែលរស់នៅឯបរទេស ដែលបានចូលរួមហូបនំបញ្ចុកជាមួយក្រុមគ្រួសារ និងសហគមខ្មែរ នៅតាមបណ្តារដ្ឋ និងតាមទីក្រុងនានា ដើម្បីបង្ហាញពីសាមគ្គីភាព មិត្តភាព និងការស្រឡាញ់រាប់អានរវាងខ្មែរ ទោះបីបងប្អូនកូនក្មួយបានទៅរស់នៅឯបរទេសហើយក្តី ។ សម្តេចបញ្ជាក់ថា ៖«យើងចងចាំទិវាហូបនំបញ្ចុកថ្ងៃនេះ ដើម្បីពង្រឹងស្មារតីសាមគី្គភាព រួបរួមឯកភាពជាតិ និងការស្រឡាញ់ជាតិមាតុប្រទេស នៅក្រោមម្លប់សន្តិភាពដែលយើងបានមកដោយលំបាកបំផុត» ។
ជាមួយគ្នានោះដែរសម្តេចក៏បានអរគុណបងប្អូនជនរួមជាតិសមាជិកសមាជិការគណបក្ស មន្ត្រីរាជការ អាជ្ញាធរ សមត្ថកិច្ច កូនក្មួយយុវជន ម្ចាស់ក្រុមហ៊ុន សមាគម និងសប្បុរស ជនទាំងអស់ ដែលបានរៀបចំហូបនំបញ្ចុកជួបជុំគ្នា ជាមហាគ្រួសារខ្មែរ ។ សម្តេចក៏បានគូសបញ្ជាក់ថា ៖«នៅពេលដែលយើងហូបនំបញ្ចុក គឺយើងនឹកទៅដល់មិត្តភាព សាមគ្គីភាព ការស្រឡាញ់រាប់អាន និងឯកភាពជាតិយើងនៅក្រោមម្លប់សន្តិភាព និងការអភិវឌ្ឍន៍» ។ នៅក្នុងសំណេរដដែលសម្តេចក៏បានជូនពរបងប្អូនសុខសប្បាយនឹងបន្តជួយទិញ ជួយហូបនំបញ្ចុកខ្មែរ និងបន្តចូលរួមជួយលើកតម្កើងគុណភាពម្ហូបអាហារ និងនំចំណីរបស់ប្រទេសយើងនៅគ្រប់ទីកន្លែងផងដែរ ។
សូមជម្រាបថា ការលើកឡើងរបស់ប្រមុខរាជរដ្ឋាភិបាលនេះ បន្ទាប់ពីប្រទេសកម្ពុជាបានបើកទិវាហូបនំបញ្ចុកនៅទូទាំងប្រទេស កាលពីថ្ងៃទី៩ ខែមិថុនាកន្លងមក ។ ការហូបនំបញ្ចុកនេះមានទាំងសកម្មជនអតីតបក្សប្រឆាំង និងសកម្មជនគាំទ្រគណបក្សកាន់អំណាច ព្រមទាំង សកម្មជនបក្សនយោបាយមួយចំនួនផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ