សៀងហៃ ៖ យោងតាមភ្នាក់ងារសារព័ត៌មាន Reuters ដែលបានរាយការណ៍មកកាល ពីថ្ងៃទី៨ ខែមិថុនាកន្លងមកបានឲ្យដឹងថា ប្រទេសចិនកំពុងតែត្រៀមកាត់បន្ថយការនាំចេញបច្ចេកវិទ្យាមួយចំនួនទៅកាន់សហរដ្ឋអាមេរិក ។
ប្រសិនបើត្រូវបានអនុវត្តនោះវិធានការនេះបង្ហាញឲ្យឃើញថា ប្រទេសចិននឹងឆ្លើយតបនឹងការហាមឃាត់ដែលសហរដ្ឋអាមេរិកបានដាក់លើក្រុមហ៊ុនបច្ចេកវិទ្យា Huawei Technologies Co Ltd ព្រោះតែកង្វល់ទាក់ទិននឹងបញ្ហាសន្តិសុខជាតិ ។
លោក Hu Xijing ដែលជាប្រធានកែសម្រូលប្រចាំកាសែត Global Times របស់ប្រទេសចិនបាននិយាយលើ Twitter របស់លោកថា ប្រទេសចិនកំពុងតែកសាងវិធានការគ្រប់គ្រងមួយ ដើម្បីការពារបច្ចេកវិទ្យាសំខាន់ៗរបស់ប្រទេសចិន ។ លោកបានបន្ថែមថា« វាគឺជំហានដ៏សំខាន់ក្នុងការធ្វើឲ្យប្រព័ន្ធរបស់ខ្លួនកាន់តែល្អប្រសើរឡើង ហើយក៏ជាការឆ្លើយតបមួយទៅនឹងវិធានការអាមេរិកដែរ ។ ដែលត្រូវបានអនុវត្ត ការនាំចេញបច្ចេកវិទ្យាមួយចំនួនទៅកាន់សហរដ្ឋអាមេរិកនឹងស្ថិតក្រោមការគ្រប់គ្រង។»
លោកមិនបានប្រាប់ពីប្រភពនៃព័ត៌មាននេះលើ Twitter លោកឡើយ ។
សារព័ត៌មាន Global Times មិនមែនជាសារព័ត៌មានក្រោមគណបក្សកម្មុយនីស្តចិនជាផ្លូវការទេ ប៉ុន្តែទស្សនៈរបស់ពួកគេត្រូវបានចាត់ទុកថា តំណាងអ្នកដឹកនាំក្នុងប្រទេស ។
ក្នុងខណៈពេលដែលលោក Hu បានបង្ហោះលើ Twitter របស់លោកភ្នាក់ងារសារព័ត៌មាន Xinhua របស់រដ្ឋាភិបាលចិនបានរាយការណ៍មកថា គណៈកម្មាធិការជាតិអភិវឌ្ឍន៍ និងកែទម្រង់ (NDRC) នឹងរៀបចំការសិក្សាមួយ ដើម្បីបង្កើតប្រព័ន្ធបញ្ជីគ្រប់គ្រងសន្តិសុខបច្ចេកវិទ្យាជាតិ ។
ការប្រកាសទាំងនេះត្រូវបានលើកឡើងប៉ុន្មានសប្តាហ៍ បន្ទាប់ពីសហរដ្ឋអាមេរិកបានដាក់ក្រុមហ៊ុន Huawei ចូលក្នុងបញ្ជីខ្មៅដែលហាមឃាត់ក្រុមហ៊ុនអាមេរិកមិនឲ្យផ្គត់ផ្គង់ផលិតផល និងសេវាកម្មដល់ពួកគេ ។ មិនយូរប៉ុន្មាន ប្រទេសចិនបានប្រកាសថា ពួកគេនឹងចេញបញ្ជីឈ្មោះបុគ្គលបរទេសដែលមិនអាចទុកចិត្តបានដែរ ៕ កែសម្រួលដោយ ៖សុឃាក់
ចែករំលែកព័តមាននេះ