មនុស្សខ្លះយល់ថា ក្មេងដែលដេកស្រមុក ជាក្មេងដែលដេកលក់ស្កប់ស្កល់ ផ្ទុយទៅវិញការស្រមុកជារោគសញ្ញា ដែលមានពាក់ព័ន្ធទៅនឹងផ្លូវដង្ហើមយ៉ាងពិតប្រាកដ ។ ទាក់ទងប្រការនេះ លោកវេជ្ជបណ្ឌិត ហុង សុខឃាង ឯកទេសជំងឺកុមារ នៃមន្ទីរពេទ្យកុមារជាតិ បានប្រាប់កោះសន្តិភាពឱ្យដឹងថា ក្មេងដែលដេកស្រមុកបង្ហាញពីរោគសញ្ញាត្បៀតផ្លូវដង្ហើម ។ មូលហេតុការស្រមុកនេះ ត្រូវបានចែកចេញជាពីរ ៖
១-ត្បៀតផ្លូវដង្ហើម ៖ ច្រមុះជាផ្នែកមួយដ៏សំខាន់សម្រាប់ស្រូបយកអុកស៊ីសែន ។ នៅក្នុងច្រមុះមានរន្ធបន្តរហូតដល់ដង្ហើម ។ មូលហេតុដែលក្មេងដេកស្រមុកបណ្តាលមកពីសាច់នៅក្នុងច្រមុះរីកមាឌ ធ្វើឱ្យត្បៀតរន្ធផ្លូវដង្ហើម ។ ក្មេងដែលដេកស្រមុក មានប្រហែលជា៧០ទៅ៨០ភាគរយ នៅពេលធំទៅក៏បាត់ស្រមុកដោយឯងៗ ជាធម្មតាមានអាយុចាប់ពី១២ឆ្នាំទ្បើងទៅ ។ ចំពោះក្មេងដេកស្រមុកនេះក៏អាចបណ្តាលមកពីការរលាក និងប្រតិកម្មជាមួយរបស់អ្វីមួយ ដែលធ្វើឱ្យរលាកហើយក្រហមនៅខាងក្នុងនៃសាច់ច្រមុះផងដែរ ។
២-អាការៈមិនដកដង្ហើមពេលក្មេងដេកលក់៖ កុមារមួយចំនួនកាលណាដេកស្រមុកយូៗទៅ ភ្លេចដកដង្ហើម ។ កុមារមិនដកដង្ហើមធ្វើឱ្យខ្វះអុកស៊ីសែន ជាហេតុធ្វើឱ្យកុមារភ្ញាក់ហើយស្រែកយំ ដែលពេលខ្លះបានឮសំទ្បេងក្អក ឬឈ្លក់ក៏មាន ។ ឪពុកម្តាយមិនសូវជាមានការចាប់អារម្មណ៍ប៉ុន្មានទេចំពោះបញ្ហានេះ ។
ឪពុកម្តាយគប្បីកត់សម្គាល់ថា ការដេកស្រមុករបស់កូនជារោគសញ្ញាដែលបង្ហាញពីសុខភាពរបស់កូនមានបញ្ហា ។ នៅពេលកូនរបស់លោកអ្នកគេង ឮសំទ្បេងស្រមុកខុសប្លែកពីធម្មតា ត្រូវពិនិត្យទៅលើចលនាបរិវេណក្បាលពោះ និងទ្រូងក្រែងមានចង្វាក់មិនប្រក្រតីណាមួយដូចជា មិនដកដង្ហើមពី៤ទៅ៥វិនាទី ជួនកាលអាចមិនដកដង្ហើមរហូតដល់១នាទីក៏មានដែរ នេះដោយសារតែកង្វះអុកស៊ីសែន ធ្វើឱ្យកុមារដេកមិនស្ងប់ ហើយស្រែកយំតែម្តង ។ ជួនកាល កុមារអាចក្អក ឬក្អែច្រើន ហើយភ្ញាក់កណ្តាលយប់ជាច្រើនដង ដោយសារតែត្បៀតផ្លូវដង្ហើម ។
លោកអ្នកត្រូវចង់ចាំថា ក្មេងដែលមានអាយុចាប់ពី១២ឆ្នាំទ្បើងទៅ នៅតែដេកស្រមុកមិនបាត់ ដោយសារតែត្បៀតផ្លូវដង្ហើម រលាកច្រមុះរ៉ាំរៃ ។ ក្មេងដែលមានសភាពបែបនេះ មានផលប៉ះពាល់ដល់ការលូតលាស់មិនដូចក្មេងដទៃ ។ ធ្វើឱ្យក្រអូមមាត់ប៉ោងខ្លាំង ទម្រង់មុខស្រួច ធ្មេញចង្អៀតដុះមកមិនបានស្មើ ។ ក្មេងប្រភេទនេះ មិនសូវលូតកម្ពស់បានល្អទេ រាងល្អិត រៀនមិនពូកែ ដោយសារប៉ះពាល់ចង្វាក់បេះដូង រួមទាំងសុខភាពខួរក្បាលផងដែរ ៕
ចែករំលែកព័តមាននេះ