ខេត្តកំពង់ចាម ៖ ក្មេងប្រុសស្រីចំនួន៦នាក់ដើររើសគ្រាប់ស្វាយចន្ទីក្នុងចម្ការមួយកន្លែង ហើយក៏នាំគ្នាទៅងូតទឹករណ្តៅដី បណ្តាលឱ្យលង់ស្លាប់ចំនួន៤នាក់ ចំណែកក្មេង២នាក់ទៀតបានរួចផុតពីគ្រោះថ្នាក់ ។
ហេតុការណ៏ដ៏រន្ធត់នេះបានកើតឡើងកាលពីវេលាម៉ោង៨ព្រឹកថ្ងៃទី៨ មិថុនា ឆ្នាំ២០១៩ នៅចំណុចចំការស្វាយចន្ទីមួយកន្លែង ស្ថិតក្នុងភូមិបែងអន្លូង ឃុំអារក្សត្នោត ស្រុកស្ទឹងត្រង់ ។
លោកវរសេនីយ៏ឯក ប៉ាក ជាតិ អធិការនគរបាលស្រុកស្ទឹងត្រង់ប្រាប់ឲ្យដឹងថា ក្មេងរងគ្រោះដែលស្លាប់ទាំង៤នាក់ខាងលើរួមមាន ១-ឈ្មោះ ជុន លីតា ភេទស្រី អាយុ១២ឆ្នាំ ២-ឈ្មោះ ជុន ជូ ភេទប្រុស អាយុ១០ឆ្នាំ ៣-ឈ្មោះ រ៉េត ណូយ ភេទស្រី អាយុ១៣ឆ្នាំ និង៤-ឈ្មោះ ហង្ស ហ៊ី ភេទប្រុស អាយុ១១ឆ្នាំ ។ ក្មេងរងគ្រោះទាំង៤នាក់នេះមានទីលំនៅចំណុចគីឡូលេខ៦ ស្ថិតក្នុងភូមិបែកអន្លូង ។ ចំណែកក្មេង២នាក់ទៀតដែលរួចផុតពីគ្រោះថ្នាក់ ក្នុងនោះម្នាក់ឈ្មោះ ឆើង ឆៃលាង ភេទប្រុស អាយុ៨ឆ្នាំ និងម្នាក់ទៀតឈ្មោះ ប៊ិច ពី ភេទប្រុស អាយុ៦ឆ្នាំ ។
អធិការនគរបាលស្រុកស្ទឹងត្រង់បានប្រាប់បន្តថា នៅមុនពេលកើតហេតុ មានក្មេងប្រុសស្រីចំនួន៦នាក់ បាននាំគ្នាដើររើសគ្រាប់ស្វាយចន្ទីក្នុងចំការមួយកន្លែងស្ថិតនៅភូមិបែកអន្លូង ហើយក៏បាននាំគ្នាដើរទៅងូតទឹករណ្តៅដីសម្រាប់ទុកស្រោចដំណំដែលមានចំងាយប្រមាណ១៥០០ម៉ែត្រពីភូមិ បណ្តាលឱ្យលង់ជាបន្តបន្ទាប់ចំនួន៤នាក់ ។
អធិការនគរបាលស្រុកស្ទឹងត្រង់បានប្រាប់បន្តទៀតថា ចំណែកក្មេង២នាក់ទៀតដែលមិនបានលង់ទឹករណ្តៅដីនោះ ពេលឃើញក្មេងៗទាំង៤នាក់ដែលលង់ទឹករណ្តៅដីដោយផ្ទាល់នឹងភ្នែកបែបនេះ ក៏ប្រញាប់
រត់ទៅប្រាប់អ្នកភូមិ ហើយទំរាំតែអ្នកភូមិមកដល់ គឺអ្វីៗហួសពេលបាត់ទៅហើយ ។ លុះពេលអ្នកភូមិមកដល់កន្លែងកើតហេតុ ក៏នាំគ្នាចុះរាវរកទើបឃើញប្រទះសពក្មេងប្រុសស្រីទាំង៤នាក់ ធ្វើឱ្យឪពុកម្តាយទួញយំសោកឱបសពកូនៗមើលទៅគួរឱ្យសង្វេគ។
សពក្មេងរងគ្រោះទាំង៤នាក់ត្រូវបានពិនិត្យដោយក្រុមបច្ចេកទេសរបស់សមត្ថកិច្ច និងរកឃើញថា ក្មេងរងគ្រោះទាំង៤នាក់គឺពិតជាស្លាប់ដោយសារលង់ទឹករណ្តៅដីប្រាកដមែន រួចសមត្ថកិច្ចក៏បានប្រគល់សពឲ្យក្រុមគ្រួសារសាច់ញាតិដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ