រាជធានីភ្នំពេញ ៖ ស្របពេលរាជរដ្ឋាភិបាលផ្តល់ដីសម្បទានសេដ្ឋកិច្ចទៅដល់ក្រុមហ៊ុនសម្រាប់ដាំដុះកសិផលផ្សេងៗធ្វើការកែច្នៃនាំចេញ ឬផ្គង់ផ្គង់ក្នុងស្រុកនៅមួយរយៈចុងក្រោយនេះ គេសង្កេតឃើញតែងតែកើតមាននៅជម្លោះឬវិវាទរវាងពលរដ្ឋនិងក្រុមហ៊ុន។ តួយ៉ាងនៅខេត្តកោះកុង, កំពង់ស្ពឺ, ព្រះវិហារ និងខេត្តឧត្តរមានជ័យ កើតមានឡើងជម្លោះដីសម្បទានសេដ្ឋកិច្ចដំណាំអំពៅផលិតស្ករសម្រាប់ការនាំចេញ ។
ទន្ទឹមនឹងជម្លោះដីធ្លីកើតមាននៅក្នុងបណ្តាខេត្តខាងលើនេះគេក៏សង្កេតឃើញ ខាងក្រសួងជំនាញចុះធ្វើការសម្របសម្រួលឬផ្តល់ភាពត្រឹមត្រូវជូនពលរដ្ឋរងផលប៉ះពាល់ពិតប្រាកដឱ្យទទួលបានប្រយោជន៍ត្រលប់មកវិញ ។
ងតាមរបាយការណ៍ចុងក្រោយស្តីពី «វឌ្ឍនភាពនៃការងារដីធ្លី» របស់ក្រសួងរៀបចំដែនដីនគរូបនីយកម្មនិងសំណង់ចេញផ្សាយកាលថ្មីៗនេះបានឱ្យដឹងថាការដោះស្រាយវិវាទពាក់ព័ន្ធនឹងដីសម្បទានសេដ្ឋកិច្ចដំណាំអំពៅផលិតស្ករសនាំចេញមានក្រុមហ៊ុនពាក់ព័ន្ធជាង១០ស្ថិតនៅក្នុងខេត្តខេត្តកោះកុង, កំពង់ស្ពឺ, ព្រះវិហារ និងខេត្តឧត្តរមានជ័យ ។ ប្រភពដដែលបានបញ្ជាក់ថា ៖ ១)-ខេត្តកោះកុង វិវាទដីសម្បទានសេដ្ឋកិច្ចដំណាំអំពៅផលិតស្ករស នាំចេញនៅខេត្តកោះកុង ពាក់ព័ន្ធនឹងក្រុមហ៊ុនចំនួន៣ មានក្រុមហ៊ុន Koh Kong Plantation, Koh Kong Sugar Industry, និងក្រុមហ៊ុន ហេងហ៊ុយ អភិវឌ្ឍន៍។ ការដោះស្រាយវិវាទបានបញ្ចប់ជាស្ថាពរជូនប្រជាពលរដ្ឋដែលពាក់ព័ន្ធទាំង៩៨៦គ្រួសារក្នុងនោះពលរដ្ឋ១៧៥គ្រួសារទទួលបានដីទំហំ៣ហិកតា និងថវិកា២.៥០០ដុល្លារក្នុងមួយគ្រួសារ។ ទី២)- ខេត្តកំពង់ស្ពឺមានក្រុមហ៊ុនចំនួន៣ មានការពាក់ព័ន្ធនឹងវិវាទដីសម្បទានសេដ្ឋកិច្ចដំណាំអំពៅផលិតស្ករសនាំចេញមានដូចជា ក្រុមហ៊ុន ភ្នំពេញស៊ូហ្គើរ (Phnom Penh Sugar), កំពង់ស្ពឺស៊ូហ្គើរ (Kompong Speu Sugar) និង កំពង់ស្ពឺផ្លេនថេសិន (Kompong Speu Plantation) ។
ក្រុមការងារទទួលបានសលាកបត្រចំនួនជាង៣ពាន់សលាកបត្រ។ គិតមកត្រឹមខែឧសភាឆ្នាំ២០១៩ បានដោះស្រាយបញ្ចប់បាន២០៣គ្រួសារជាមួយនេះបានសម្របសម្រួលរួចជាមួយពលរដ្ឋចំនួន៤០គ្រួសារ និងកំពុងសម្របសម្រួលជាមួយភាគីក្រុមហ៊ុន ។ចំពោះសលាកបត្រ ដែលនៅសេសសល់ក្រុមការងារកំពុងបន្តពិនិត្យសិក្សា ។
ចំណែកខេត្តទី៣ គឺខេត្តព្រះវិហារ មានក្រុមហ៊ុនចំនួន៥ មានការពាក់ព័ន្ធនឹងវិវាទដីសម្បទានសេដ្ឋកិច្ចដំណាំអំពៅផលិតស្ករសនាំចេញហើយប្រជាពលរដ្ឋចំនួន២៨៧គ្រួសារ បានមកបំពេញសលាកបត្រ ពាក់ព័ន្ធនឹងដីទំហំជាងង១,៦ពាន់ហិកតា ។
ក្រសួងបានធ្វើការសម្របសម្រួលបញ្ចប់វិវាទចំនួន៥៧សលាកបត្រនិងច្រោនចោលចំនួន២៣០សលាកបត្រ និង៤-ខេត្តឧត្តរមានជ័យ មានក្រុមហ៊ុនសម្បទានដីសេដ្ឋកិច្ចដំណាំអំពៅផលិតស្ករសនាំចេញចំនួន៣ និងបានប្រគល់ដីជូនរដ្ឋវិញតាមលិខិតលេខ២៨៣ សជណ របស់ទីស្តីការគណៈរដ្ឋមន្ត្រី។ការដោះស្រាយបានបញ្ចប់ជាស្ថាពរ ជូនប្រជាពលរដ្ឋដែលពាក់ព័ន្ថចំនួន៤១២គ្រួសារ ដោយផ្តល់ជូនដីសម្បទានសង្គមកិច្ចទំហំជាង១ពាន់ហិកតា ក្នុងនោះទំហំ៨២៤ហិកតាសម្រាប់បែងចែកឡូត៍និងទំហំជាង២០៤ហិកតាសម្រាប់ហេដ្ឋារចនាសម្ព័ន្ធផ្សេងៗ។
លោក វ៉ា វីរៈ នាយកក្រុមហ៊ុន Century 21 Fortuna Investment បានយល់ឃើញថានៅក្នុងរយៈពេលចុងក្រោយនេះឃើញថារាជរដ្ឋាភិបាលមានការប្រយ័ត្នប្រយែង ហើយតែងតែព្យាយាមដោះស្រាយទៅលើជម្លោះនោះបានច្រើន។ លោកបានលើកឡើងថា «បើសិនក្នុងករណីជម្លោះដីធ្លីកើនឡើងមានច្រើន យើងដឹងហើយថាប្រជាពលរដ្ឋពួកគាត់មិនសប្បាយចិត្ត ហើយគាត់តែងតែរករឿងនេះរឿងនោះ ធ្វើឱ្យរាជរដ្ឋាភិបាលចំណាយទាំងពេលវេលានិងធនធានទៅលើការដោះស្រាយជម្លោះ។ ជម្លោះនេះតូច ឬធំវាមិនល្អប៉ុន្មាននោះទេ វាអាចធ្វើឱ្យប៉ះពាល់ដល់មុខមាត់ ឬកិត្តិយស់របស់ប្រទេស។ តែផ្ទុយមកវិញបើមិនសិនរាជរដ្ឋាភិបាលមានយន្តការ ឬការការពារជម្លោះមានប្រសិទ្ធភាពខ្ពស់ វានឹងជួយកាត់បន្ថយនូវទំនាស់នៅតុលាការ ឬកាត់បន្ថយបញ្ហាផ្សេងៗទៀតបានច្រើនវាបង្ហាញឱ្យឃើញពីការរីកចម្រើនមួយនៅក្នុងសង្គម ប្រជាពលរដ្ឋរស់នៅប្រកបដោយភាពសុខសាន្ត» ៕ កែសម្រួលដោយ ៖សុឃាក់
ចែករំលែកព័តមាននេះ