ខេត្តបាត់ដំបង ៖ ប្រតិភូកងកម្លាំងបូព៌ាកងទ័ពភូមិភាគទី១ ប្រទេសថៃ បានដឹកនាំកម្លាំងចំនួន១៧នាក់ ដឹកនាំដោយលោកឧត្តមសេនីយ៍ត្រី ពិយ៉ាក់ផុង គ្លីនផាន់ មេបញ្ជាការកងកម្លាំងបូព៌ា (កងរក្សាព្រះអង្គ)…
ខេត្តបាត់ដំបង ៖ ប្រតិភូកងកម្លាំងបូព៌ាកងទ័ពភូមិភាគទី១ ប្រទេសថៃ បានដឹកនាំកម្លាំងចំនួន១៧នាក់ ដឹកនាំដោយលោកឧត្តមសេនីយ៍ត្រី ពិយ៉ាក់ផុង គ្លីនផាន់ មេបញ្ជាការកងកម្លាំងបូព៌ា (កងរក្សាព្រះអង្គ) ចូលមកកម្ពុជា តាមច្រកព្រំដែនប៉ោយប៉ែត មកខេត្តបាត់ដំបងនៅវេលាព្រឹកម៉ោង១០និង៣០នាទី ថ្ងៃទី០៦ ខែមិថុនា ឆ្នាំ២០១៩ ដើម្បីសម្តែងការគួរសម ដើម្បីពង្រឹងសម្ព័ន្ធមេត្រីភាព នៅទីបញ្ជាការយោធភូមិភាគទី៥ ។
មានលោកឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ លោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ លោកឧត្តមសេនីយ៍ទោ ច័ន្ទ រដ្ឋា មេបញ្ជាការរងទទួលបន្ទុកការងារព្រំដែន ព្រមទាំងមេបញ្ជាការតំបន់១ មេបញ្ជាការកងពលលេខ៥១ និងការិយាល័យបានចូលរួមប្រមាណ២០នាក់ទទួលស្វាគមន៍ ។
លោកឧត្តមសេនីយ៍ឯក ឯក សំអូន ភាគីកម្ពុជាបានថ្លែងថា រាល់សកម្មភាពកន្លងមក ដែលយើងតែងតែរួមសហប្រតិបត្តិការរួមគ្នាជាមួយភាគីថៃ គឺសំខាន់រក្សាសន្តិសុខ និងសុខសន្តិភាពតាមព្រំដែន ជូនប្រជាជនទាំងសងខាងឲ្យទទួលបានក្តីសុខ និងជីវភាពធូរធារដូចៗគ្នា សំខាន់ពង្រឹងសន្តិសុខបន្ថែមទៀត លើការទប់ស្កាត់រាល់បទល្មើសនានាដែលកើតមានឆ្លងកាត់ប្រទេសទៅវិញទៅមក ។
លោកឧត្តមសេនីយ៍ឯក បានបន្ថែមទៀតថា យើងបានរួមសហការពង្រឹងបន្ថែមអនុវត្តន៍តាមអនុស្សារណៈ MOUក្នុងកិច្ចប្រជុំគណកម្មាធិការថ្នាក់ភូមិភាគដែលបនាចាប់ដៃគ្នាជាច្រើនឆ្នាំកន្លងមកនេះ គឺទទួលបានលទ្ធផលល្អប្រសើរ ហើយកំពុងត្រៀមយកលទ្ធផលលើកទី២៦ (RBC 26) ដើម្បីរៀបចំជួបគ្នាប្រជុំលើកទី២៧ ជាមួយបន្ថែមទៀតនាពេលឆាប់ខាងមុខនេះនៅក្នុងប្រទេសថៃ ដែលត្រូវទទួលធ្វើជាម្ចាស់ផ្ទះ ហើយកន្លងទៅថ្មីៗនេះសម្តេចនាយករដ្ឋមន្ត្រីតេជោហ៊ុន សែន បានជួបគ្នានៅប៉ោយប៉ែតជាមួយនាយករដ្ឋមន្ត្រីថៃប្រាយោទ ច័ន្ទអូចា ដើម្បីជំរុញការបើកច្រកបន្ថែម និងជួយប្រគល់ក្បាលរថភ្លើង និងទូដឹកអ្នកដំណើរជួយដល់កម្ពុជាបន្ថែមទៀតផង ។
លោកឧត្តមសេនីយ៍ត្រី ពិយ៉ាក់ផុង គ្លីនផាន់ មេបញ្ជាការកងកម្លាំងបូព៌ា ភាគីថៃបានឆ្លើយតបវិញថា លោកទើបតែឡើងកាន់តំណែងកាលពីខែតុលាកន្លងមកនេះ ដោយមានភារកិច្ចជាប់រវល់ខ្លាំងក្នុងកិច្ចការព្រះមហាក្សត្រថៃ មិនបានមកជួបគ្នាដោយត្រូវពន្យាពេលទើបតែពេលនេះ តំណាងឲ្យលោកមេបញ្ជាការកងទ័ពភូមិភាគទី១ ប្រទេសថៃផង បានពាំនាំការនឹករលឹក និងរួមគ្នាបន្តកិច្ចសហប្រតិបត្តការរួមគ្នាជាបន្តទៅទៀត ហើយក៏សូមជូនពរលោកមេបញ្ជាការយោធភូមិភាគទី៥ ដែលបានឡើងកាន់តំណែងថ្មីនេះ សូមប្រកបដោយជោគជ័យជំនះទាំងអស់គ្នា ៕
ចែករំលែកព័តមាននេះ