រាជធានីភ្នំពេញ ៖ បុរសសង្ស័យជាជនវិកលចរិតមិនស្គាល់អត្តសញ្ញាណម្នាក់ដែលកន្លងមកតែងតែដើរតាមផ្លូវគ្មានគោលដៅនោះ ស្រាប់តែពេលនេះត្រូវបានអ្នកភូមិប្រទះឃើញស្លាប់អណ្តែតក្នុងទឹកស្រះទៅវិញ ហើយមិនទាន់ត្រូវបានគេដឹងថា គាត់ស្លាប់ដោយសារតែមូលហេតុអ្វីនៅឡើយ ដែលហេតុការណ៍នោះបានបង្កឲ្យមានការភ្ញាក់ផ្អើល កាលពីវេលា៩ព្រឹក ថ្ងៃទី០៩ ខែមិថុនា ឆ្នាំ២០១៩ នៅក្នុងបរិវេណក្លឹបវាយកូនហ្គោល រ៉ូយ៉ាល់ភ្នំពេញ ស្ថិតនៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
អ្នកភូមិបាននិយាយថា បុរសដែលស្លាប់នោះមិនមានអ្នកស្គាល់ឡើយ គាត់មានអាយុប្រហែលជាង៣០ឆ្នាំ ហើយសង្ស័យជា ជនវិកលចរឹត ដោយកន្លងមកតែងតែឃើញគាត់ដើរតាមផ្លូវនិយាយម្នាក់ឯង ជួនកាលស្រាតគ្មានសម្លៀកបំពាក់អស់ ដើរតែខ្លួនទទេក៏មានដែរ ។ ដោយឡែករយៈពេល២ទៅ៣ថ្ងៃចុងក្រោយនេះ បាត់មិនឃើញគាត់ដើរ ហើយក៏គ្មាននរណាចាប់អារម្មណ៍ដឹងថា គាត់ទៅណាមកណាដែរ លុះដល់ពេលនេះស្រាប់តែប្រទះឃើញស្លាប់អណ្ដែតទឹកស្រះបែបនេះតែម្ដង ហើយក៏មិនទាន់ដឹងថា ស្លាប់ដោយសារអ្វីឡើយ ។
ប្រភពដដែលបានបន្តថា នៅមុនពេលមានការភ្ញាក់ផ្អើលគាត់បានដើរទៅមើលបង្កៃនៅទីនោះហើយពេលក្រឡេកទៅមើលស្រះទឹកនោះស្ទើរមិនគួរឲ្យជឿលើភ្នែករបស់គាត់ទាល់តែសោះព្រោះបានប្រទះឃើញសាកសពអណ្ដែតទឹកទាំងព្រឹក ។ ភ្លាមៗនោះគាត់បានស្រែកប្រាប់អ្នកជិតខាងនាំគ្នាទៅចោមរោមមើល ហើយបានស្គាល់ថា ជាបុរសវិកលចរឹត បន្ទាប់មកបានរាយការណ៍ជូននគរបាលចុះទៅពិនិត្យមើលជាក់ស្ដែង និងស្រាវជ្រាវរកសាច់ញាតិ ។
នគរបាលបាននិយាយថា ក្រោយទទួលបានដំណឹងនោះភ្លាមកម្លាំងនគរបាលបានចុះទៅកាន់កន្លែងកើតហេតុ ដើម្បីពិនិត្យហើយបានឃើញសាកសពបុរសអណ្ដែតទឹកផ្កាប់មុខ ហើយគ្មានសម្លៀកបំពាក់ជាប់ខ្លួនឡើយ គឺស្រាតននលគកតែម្ដង ។ ដែលតាមការសន្និដ្ឋានជំហ៊ានដំបូងសង្ស័យបុរសនោះចុះងូតទឹក ឬដើរក្បែរស្រះហើយរអិលជើងធ្លាក់ចូលទៅ បណ្ដាលឲ្យលង់ស្លាប់បែបនេះ បន្ទាប់មកបានដឹកយកទៅធ្វើបុណ្យនៅវត្តតិក្ខបញ្ញោ ស្ថិតនៅក្នុងភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យនោះដែរ ៕ កែសម្រួលដោយ ៖ សុឃាក់
ចែករំលែកព័តមាននេះ