ខេត្តបាត់ដំបង ៖ សាកសពដែលគេសម្លាប់ហើយដឹកយកទៅចោះចោលក្នុងទឹកស្រះមួយកន្លែង នៅស្រុកមោងប្ញស្សីនោះ ត្រូវបានគេស្គាល់អត្តសញ្ញាហើយ តែមិនមែនជាអំពើឃាតកម្មទេ គឺជាអំពើប្លន់សម្លាប់ ។ នេះបើតាមលោកឧត្តមសេនីយត្រី ជេត…
ខេត្តបាត់ដំបង ៖ សាកសពដែលគេសម្លាប់ហើយដឹកយកទៅចោះចោលក្នុងទឹកស្រះមួយកន្លែង នៅស្រុកមោងប្ញស្សីនោះ ត្រូវបានគេស្គាល់អត្តសញ្ញាហើយ តែមិនមែនជាអំពើឃាតកម្មទេ គឺជាអំពើប្លន់សម្លាប់ ។ នេះបើតាមលោកឧត្តមសេនីយត្រី ជេត វណ្ណនី ស្នងការរងខេត្ត ដែលបានថ្លែងប្រាប់កោះសន្តិភាពនៅព្រឹកថ្ងៃទី០៨ មិថុនា នេះ តាមទូរស័ព្ទ ។ គួររំលឹកថា៖ មិនដឹងជាអ្វីពិតប្រាកដ?…តែសង្ស័យឃាតកម្មដឹកសពទម្លាក់ចោលទីនេះ
លោកជេត វណ្ណនី បានឲ្យដឹងថា ជនរងគ្រោះមានឈ្មោះម៉ិល សុខុម អាយុ២២ឆ្នាំ ជាកម្មករ រស់នៅភូមិប្រឡាយស្តៅ ឃុំតាលាស់ ស្រុកមោងប្ញស្សី ។ លោកស្នងការរងបានបញ្ជាក់ថា ក្រោយពីបានធ្វើការស្រាវជ្រាវនាប៉ុន្មានម៉ោង ក្រោយពីប្រទះឃើញសាកសពជនរងគ្រោះខាងលើនេះ និងបន្ទាប់ពីស្វែងរកឃើញសាច់ញាតិ និងទទួលបានការបំភ្លឺខ្លះៗពីក្រុមគ្រួសារ ទើបកម្លាំងជំនាញធ្វើការសន្និដ្ឋានថា ការស្លាប់របស់យុវជនរូបនេះ មិនមែនជាអំពើឃាតកម្មទេ វាគឺជាអំពើសម្លាប់ប្លន់យកម៉ូតូនិងទូរស័ព្ទដៃរបស់ជនរងគ្រោះ ហើយជនដៃដល់គឺជាមនុស្សស្គាល់គ្នាយ៉ាងជិតស្និទ្ធទៀតផង ។
លោកមិុល ផាន់ណាវុធ ដែលជាឪពុកជនរងគ្រោះបាននិយាយថា កូនប្រុសគាត់បានបាត់ដំណឹងមិនឃើញត្រឡប់មកផ្ទះវិញ តាំងកាលថ្ងៃទី០៤ មិថុនា ពេលដែលទៅលេងផ្ទះមិត្តភក្តិរបស់គេ ឈ្មោះប៊ិន នៅភូមិរកាឈ្មោល ឃុំគារ (កន្លែងកើតហេតុ) សូម្បីទូរស័ព្ទក៍ហៅមិនចូលដែរ ។ លោកនិយាយថា ជាមួយនឹងការបាត់ដំណឹងនេះ គាត់បានស្វែងរកកូនរហូតនៅតែគ្មានដំណឹង លុះនៅរសៀលថ្ងៃទី០៧ មិថុនា ក៏ឃើញសារ ព័ត៌ មាននានាផ្សាយពីការប្រទះឃើញសាកសព ដែលមានភិនភាគដូចកូនប្រុសគាត់ក៏នាំគ្នាទៅមើល ស្រាប់តែជាកូនប្រុសគាត់មែន ទើបមានការភ្ញាក់ផ្អើល និងគួរឲ្យតក់ស្លុតបំផុត។
សូមបញ្ជាក់ដែរថា កាលពីព្រឹកថ្ងៃទីថ្ងៃទី០៧ មិថុនា អ្នកភូមិបានប្រទះឃើញសាកសពបុរសម្នាក់ត្រូវគេសម្លាប់រួចយកទៅបោះចោលនៅក្នុងស្រះទឹកមួយកន្លែងនៅចំណុចព្រៃពពេល ស្ថិតក្នុងភូមិរកាឈ្មោល ឃុំគារ ស្រុកមោងប្ញស្សី ។ សាកសពនោះ មិនត្រូវបានគេស្គាល់អត្តសញ្ញាណនោះទេ ហើយមានស្នាមរឹតកនិងស្នាមចាក់នឹងកាំបិតត្រង់កទៀតផង ។
ក្រោយពីធ្វើការពិនិត្យជំហានដំបូង សមត្ថកិច្ចបានសន្និដ្ឋានជាបឋមថា ការស្លាប់របស់ជនរងគ្រោះ គឺអាចជាអំពើឃាតកម្ម ដែលជនដៃដល់បានសម្លាប់នៅកន្លែងផ្សេងរួចដឹកជនរងគ្រោះទៅបោះចោលក្នុងទឹកស្រះខាងលើនេះ។ ប៉ុន្តែបន្ទាប់កម្លាំងជំនាញបានធ្វើការស្រាវជ្រាវនាប៉ុន្មានម៉ោងក្រោយមក ទើបរកក្រុមគ្រួសារឃើញនិងស្គាល់អត្តសញ្ញាណជនរងគ្រោះ ហើយថែមទាំងធ្លាយព័ត៌មានជាក់លាក់ថា ការស្លាប់របស់ជនរងគ្រោះឈ្មោះ ម៉ិល សុខុម នេះ មិនមែនជាអំពើឃាតកម្មទេ វាជាអំពើ«ប្លន់សម្លាប់»។
ជុំវិញអំពើប្លន់សម្លាប់នេះ លោកជេតវណ្ណនី ស្នងការរងខេត្ត បានបញ្ជាក់ថា ជនរងគ្រោះត្រូវជនដៃដល់សម្លាប់រួចប្លន់យកម៉ូតូមួយគ្រឿងម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៦ និងទូរស័ព្ទមួយគ្រឿង ។ លោកបានបន្ថែមថា ជនដៃដល់អាចមានបក្សពួកលើសពីម្នាក់ ហើយពេលនេះ យើងអាចកំណត់បានមុខសញ្ញាជនសង្ស័យខ្លះៗហើយ ដែលកម្លាំងជំនាញកំពុងប្រតិបត្តិការ ៕ (សម្រួលដោយ៖ ស្រីណា)
ចែករំលែកព័តមាននេះ