រាជធានីភ្នំពេញ ៖ តារាសម្តែងជើងចាស់ បានបង្ហាញនូវចំណាប់អារម្មណ៍ និងការសន្សំចិត្តស្រឡាញ់មកជាយូរនូវសម្លៀកបំពាក់កំប្លេនាសម័យកាលអាណានិគមបារាំង ដែលត្រូវបានប្រទានដោយព្រះរាមបុប្ធាទេវី។
ជាមួយនឹងចិត្តស្រឡាញ់ ដោយមិនអាចកាត់ថ្លៃបាននេះ តារាសម្តែងចាស់វស្សារូបនេះក៏តែងតែបង្ហាញសម្លៀកបំពាក់មួយឈុតនេះស្ទើរមិនដាច់ នៅពេលដែលលោកមានឱកាសបានសម្តែងបង្ហាញពីសម័យកាលអាណានិគមនិយមបារាំង។
លោក ទេព រិនដារ៉ូ បានបញ្ជាក់ថា ខ្ញុំចូលចិត្តសំលៀកបំពាក់មួយកំប្លេនេះណាស់ ព្រោះជាម៉ូតសម័យបារាំងដែលសម្តេចព្រះរាមបុប្ផា ទេវី ប្រទានឱ្យកាលពីថតបទចំរៀងមួយថ្វាយសម្តេចឪនៅលើភ្នំបូកគោ។
លោកបញ្ជាក់ថា ឱ្យតែមានកម្មវិធី ឬសាច់រឿងណាដែលពាក់ព័ន្ធនឹងសម័យកាលនោះ ខ្ញុំតែងតែយកមកពាក់ជារឿយៗ ជាពិសេសក្នុងពេលថ្មីៗកន្លងមកនេះ ខ្ញុំយកមកប្រើក្នុងបទចំរៀងរបស់ប្អូនស្រី ឈួន សុវណ្ណឆៃ ក្នុងបទ« បូរីជូឡុង» ដែលឃើញមានការទាក់ទាញគាំទ្រពីសំណាក់ទស្សនិកជនយ៉ាងច្រើនផងដែរ ។
តារាសម្តែងលោក ទេព រិនដារ៉ូ គឺជាតារាសម្តែងមួយរូបដែលឈរតំណែងបានយូរជាងគេក្នុងចំណោមតារារួមជំនាន់ជាមួយលោកតាំងពីទស្សវត្សន៍ឆ្នាំ៩០។ តារារូបនេះ នៅតែមានទីផ្សារខ្ពស់ដដែល ក្នុងវិស័យសិល្បៈខ្មែរនាពេលបច្ចុប្បន្ន ដោយលោកបានបង្ហាញវត្តមានសម្តែងជាបន្តបន្ទាប់ បើទោះបីជាពេលនេះ វ័យរបស់លោករាងជ្រេបន្តិចក្តី។
ជាមួយនឹងបទពិសោធន៍ទេពកោសល្យសម្តែង និងការគោរពពេលវេលាបានល្អ លោក ទេព រិនដារ៉ូ តែងតែត្រូវបានផ្តល់ឱកាសម្តែងក្នុងខ្សែភាពយន្តជាបន្តបន្ទាប់ស្ទើរតែគ្រប់ផលិតកម្ម បើទោះបីភាគច្រើន លោកតែងទទួលបានតំណែងជាតួឪពុកក៏ដោយ៕ (កែសម្រួលដោយ ៖ បុប្ផា)
ចែករំលែកព័តមាននេះ