ខេត្តព្រះសីហនុ ៖ បច្ចុប្បន្ន តម្លៃដីនៅក្រុងព្រះសីហនុ បានហក់ឡើងយ៉ាងខ្ពស់មិននឹកស្មានដល់ បន្ទាប់ពីការហូរចូលនៃក្រុមអ្នកជំនួញចិន ។ ស្របពេលដែលតម្លៃដីធ្លីឡើងខ្ពស់កប់ពពកនេះ ទើបកាលពីប៉ុន្មានខែមុនកើតមានជម្លោះរវាងកូននិងម្តាយ ដែលដោយសារតែដី១ដុំហ៊ានដេញម្តាយឲ្យចេញពីដីនោះ តាមអំណាចដីការក្សាការពារដែលចេញដោយតុលាការ ។ ឥឡូវនេះ បញ្ហាដីសាលាបឋមសិក្សា ហ៊ុន សែន ក្រុងព្រះស ហនុ ស្ថិតក្នុងភូមិ៣ សង្កាត់លេខ៣ ក្រុងព្រះសីហនុ ត្រូវបានមតិមហាជន ក៏ដូចជាមន្ត្រីរាជការអះអាងថា កំពុងមានការឃុបឃិតគ្នាជាលក្ខណៈប្រព័ន្ធពុះច្រៀកដីសាលាចែកគ្នា ។
ប្រភពដដែលបានសង្ស័យដែរថា ចំពោះភាពមិនប្រក្រតីនេះប្រហែលជាមានការឃុបឃិតគ្នាតាំងពីមន្ទីរអប់រំ យុវជន និងកីឡា នាយកសាលា រួមជាមួយលោកគ្រូអ្នកគ្រូ ទើបមានការបែងចែកដីឡូត៍របស់សាលារៀនដែលជាដីរបស់រដ្ឋយ៉ាងអនាធិបតេយ្យ ។ បើតាមឋានានុក្រមការងារ លោកគ្រូអ្នកគ្រូនៅក្រោមការគ្រប់គ្រងរបស់លោកនាយក ឯលោកនាយកនៅក្រោមការគ្រប់គ្រងរបស់ប្រធានការិយាល័យអប់រំ និង ប្រធានមន្ទីរ ។ ចុះហេតុអី្វ បានជាបណ្តោយឲ្យមានការបោះបង្គោលរបងចែកគ្នាបែបនេះ ព្រោះ
ទីតាំងដីនៅចម្ងាយពីមន្ទីអប់រំខេត្តមិនដល់២០០ម៉ែត្រផង ហេតុអី្វក៏មិនមានការចុះមកហាមឃាត់ បែរជាបណ្តោយឲ្យលោកគ្រូអ្នកគ្រូបោះបង្គោលជាឡូត៍ ធ្វើរបងលួសបន្លា និងសាងសង់ផ្ទះបែបនេះទៅវិញ ?
ជុំវិញករណីខាងលើនេះ លោកនាយកសាលាបានបដិសេធថា លោកពុំមានការឃុបឃិតនោះឡើយ ហើយលោកក៏បានណែនាំដល់លោកគ្រូអ្នកគ្រូទាំងអស់នោះឲ្យបញ្ឈប់សកម្មភាពបែបនេះ ព្រោះថាដីនេះជាដីរបស់រដ្ឋមិនអាចឲ្យទៅបុគ្គលណាបានឡើយ ។ ជាមួយនេះ លោកក៏បានធ្វើរបាយការណ៍ជូនទៅមន្ទីរអប់រំ យុវជន និងកីឡា ក៏ដូចជាអាជ្ញាធរក្រុង ខេត្ត ដើម្បីជូនជ្រាបអស់ហើយដែរ។ ជុំវិញបាតុភាពនេះ លោក កែវ ឡាយ ប្រធានមន្ទីរអប់រំ យុវជន និងកីឡាខេត្ត បានលើកឡើងរថា ករណីនេះលោកគ្រូអ្នកគ្រូចំនួន៤២នាក់បានស្នើសុំមកមន្ទីរ ដើម្បីសុំដីរបស់សាលាបឋមសិក្សា ហ៊ុន សែន ក្រុងនេះ តែលោកមិនអនុញ្ញាតទេ ព្រោះជាដីរបស់សាលានិងជាដីរបស់រដ្ឋ មិនអាចឲ្យបានទេ ។
ជុំវិញបញ្ហានេះដែរ លោក យន្ត មីន អភិបាលខេត្ត បានទៅមកពិនិត្យទីតាំងជាក់ស្ដែង និងពន្យល់ណែនាំដល់លោកគ្រូអ្នកគ្រូដែលមានបំណងស្នើសុំចង់បានដីរបស់សាលានោះ គឺលោកមិនអនុញ្ញាតទេព្រោះជាដីជាប់ក្នុងបញ្ជីសារពើភ័ណ្ឌរបស់រដ្ឋ គ្រប់គ្រងដោយមន្ទីរអប់រំ យុវជននិងកីឡា ។ ប៉ុន្តែ ទោះបីមានការបដិសេធការស្នើសុំរបស់លោកគ្រូអ្នកគ្រូទាំង៤២នាក់ តាំងពីនាយកសាលា និងប្រធានមន្ទីរអប់រំ យុវជន និងកីឡា រហូតដល់អាជ្ញាធរខេត្តយ៉ាងណាក៏ដោយ ក៏ឃើញថា នៅទីតាំងដីនោះកំពុងបន្តមានការរំលោភធ្វើជាកម្មសិទ្ធិផ្ទាល់ខ្លួន និងធ្វើសកម្មភាពដូចជា សាងសង់ផ្ទះ និងបែងចែកជាឡូត៍ៗ ដោយមិនមាន
ការខ្លាចញញើតសមត្ថកិច្ចក៏ដូចជាអាជ្ញាធរនោះឡើយ ។
សរុបសេចក្ដីមក សកម្មភាពចាប់ដីរបស់លោកគ្រូអ្នកគ្រូនេះ បើអាជ្ញាធរនៅតែបណ្ដែតបណ្ដោយមិនមានការដោះស្រាយទេ ធ្វើឲ្យមតិមហាជនក៏ដូចជាលោកគ្រូអ្នកគ្រូនៅសាលាផ្សេងទៀត ក៏អាចនឹងមានការរំលោភបំពានយកដីរបស់សាលាដូចសាលាបឋមសិក្សា ហ៊ុន សែនក្រុងនេះជាមិនខាន ព្រោះថាដីរបស់សាលាមានទីធ្លាធំទូលាយស្ទើរតែគ្រប់ទីកន្លែង ។ ដូចនេះ បើអាជ្ញាធរនិងសមត្ថកិច្ចមិនមានវិធានការទប់ស្កាត់ទេ នឹងជួបបញ្ហានៅសាលាផ្សេងៗទៀតជាក់ជាមិនខាន៕
ចែករំលែកព័តមាននេះ