រាជធានីភ្នំពេញ ៖ នំបញ្ចុកនឹងឡើងថ្លៃខ្ពស់ និងមានហាងឆេងនា២ថ្ងៃខាងមុខនេះ បន្ទាប់ពីសម្តេចតេជោហ៊ុន សែន ប្រកាសយ៉ាងឱឡារិកថា យកថ្ងៃទី៩ ខែមិថុនា ជាថ្ងៃហូបនំបញ្ចុកសាមគ្គីជាតិ…
រាជធានីភ្នំពេញ ៖ នំបញ្ចុកនឹងឡើងថ្លៃខ្ពស់ និងមានហាងឆេងនា២ថ្ងៃខាងមុខនេះ បន្ទាប់ពីសម្តេចតេជោហ៊ុន សែន ប្រកាសយ៉ាងឱឡារិកថា យកថ្ងៃទី៩ ខែមិថុនា ជាថ្ងៃហូបនំបញ្ចុកសាមគ្គីជាតិ ។
ស្របពេលនេះដែរ សិប្បកម្មផលិត និងអ្នកធ្វើនំបញ្ចុកលក់នៅតាមតំបន់មួយចំនួនមិនអាចធ្វើទាន់តាមតម្រូវការបរិភោគនោះទេ ដោយសារការផលិតកម្មនៅមានកំរិត។ ទោះបីជាយ៉ាងណា អ្នកផលិតនំបញ្ចុកលក់នឹងបង្កើនពេលវេលាដើម្បីធ្វើនំបញ្ចុកនៅពេលយប់រហូតដល់ភ្លឺទៅតាមលទ្ធភាពដែលអាចធ្វើបាន ។
ដោយឡែកនៅសិប្បកម្មផលិតនំបញ្ចុកខ្នាតតូច និងអ្នកធ្វើនំបញ្ចុកលក់ជាច្រើនគ្រួសារនៅក្នុងភូមិគ្រូស សង្កាត់សំរោង ខណ្ឌព្រែកព្នៅ ក៍បានត្រៀមផលិតនំបញ្ចុកប្រមាណ១០០តោន ដើម្បីសម្រាប់ការកម្មង់អោយអតិថិជនយកទៅបរិភោគនៅថ្ងៃទី៩ ខែមិថុនា ឆ្នាំ២០១៩ ដែលជាថ្ងៃហូបនំបញ្ចុកសាមគ្គីជាតិ។
ទន្ទឹមនោះ នៅព្រឹកថ្ងៃទី៧ ខែមិថុនា នេះតាមការណែនាំរបស់លោករដ្ឋមន្ត្រីសុខភិបាល លោកវេជ្ជបណ្ឌិតវាល ច័ន្ទដារិទ្ធ អនុប្រធានការិយាល័យសុវត្ថិភាពចំណីអាហារទទួលបន្ទុក អធិការកិច្ចសុវត្ថិភាពចំណីអាហាររបស់នាយកដ្ឋាន សថចំណីអាហារ បរិក្ខារពេទ្យ និងគ្រឿង សំអាង នៃក្រសួងសុខាភិបាលដល់អ្នកផលិត ធ្វើយ៉ាងណាអនុវត្តន៍គោលការណ៍អនាម័យល្អ ។
នៅក្នុងឱកាសនោះដែរ ក៏បានការចូលរួមពីមន្ទីរសុខាភិបាលស្រុកប្រតិបត្តិខាងជើង និងមណ្ឌលសុខភាពផងដែរ។
លោក ហុក ឌន ភេទប្រុស អាយុ៥២ឆ្នាំ ជាអ្នកធ្វើនំបញ្ចុកលក់ បានអោយដឹងថា នំបញ្ចុកបានលក់ដាច់ ហើយមានគេមកកុំម្ម៉ង់ច្រើនសម្រាប់យកទៅហូបនៅថ្ងៃអាទិត្យ ទី៩ ខែមិថុនា ខាងមុខនេះ តែគាត់មិនហ៊ានទទួល ព្រោះអត់មានកម្មករសម្រាប់ធ្វើទៅអោយតាមតម្រូវការ ។ ជាទូទៅ គាត់និងក្រុមគ្រួសារបានធ្វើនំបញ្ចុកលក់ដោយដៃបានប្រមាណ៩០០គីឡូក្រាម តែពេលនេះ គាត់ទទួលធ្វើសើសបន្តិចបន្តួចប៉ុណ្ណោះ ។
ដោយឡែក លោកស្រី បូណាវី ដែលជាអ្នកធ្វើនំបញ្ចុកលក់ដែរនោះបានអោយដឹងថា ជាទូទៅ គាត់បានផលិតបានប្រមាណ៨០០គីឡូក្រាម ដើម្បីបោះអោយម៉ូយនៅតាមផ្សារ តែសម្រាប់ថ្ងៃទី៩ ខែមិថុនា មានគេមកកុំម្ម៉ង់ច្រើនតែមិនហ៊ានទទួល គឺទទួលលើសតែប្រមាណជាង៤០០ទៅ៥០០គីឡូក្រាមទៀតប៉ុណ្ណោះ ព្រោះបារម្ភធ្វើមិនទាន់ គឺយើងធ្វើទៅតាមលទ្ធភាព ។ ក្រៅពីនោះ មានសិប្បកម្មគេជាច្រើនទៀតដែលមានម៉ាស៊ីន ស្វ័យប្រវត្តិ បានទទួលកុំម្ម៉ង់ច្រើន ដែលខ្លះប្រមាណ១០ទៅ២០តោន ។ អាជីវករលក់នំបញ្ចុកផ្សារជម្ពូវ័នម្នាក់បានអោយដឹងដែរថា គាត់ត្រូវបានម៉ូតូមកកុំម្ម៉ង់នំបញ្ចុកជាច្រើនផងដែរ។
លោក ចៅ វាសនា ប្រធានភូមិគ្រួស និងជាអ្នករកស៊ីផលិតនំបញ្ចុកលក់ បានអោយដឹងថា ជាទូទៅគាត់បានផលិតនំបញ្ចុកលក់ទៅលើទីផ្សារក្នុងមូយថ្ងៃ ប្រមាណ៨០០ទៅ៩០០គីឡូក្រាម តែសម្រាប់ថ្ងៃទី៩ មិថុនា គាត់បានទទួលធ្វើនំបញ្ចុកដែលគេមកកុំម្ម៉ង់ឡើងដល់ប្រមាណ៥តោន។
លោកមេភូមិ ក៏បានបញ្ជាក់ថា នៅក្នុងភូមិគ្រួសបានត្រៀមធ្វើនំបញ្ចុកប្រមាណជា១០០តោន ដើម្បីលក់អោយម៉ូយតាមការកុំម្ម៉ង់សម្រាប់យកទៅបរិភោគនៅថ្ងៃទី៩ ខែមិថុនា ដែលជាថ្ងៃហូបនំបញ្ចុកសាមគ្គីជាតិ៕ (កែសម្រួលដោយ ៖ ធីតា)
ចែករំលែកព័តមាននេះ