ខេត្តបាត់ដំបង៖ ប្រភពព័ត៌មានបានឱ្យដឹងថា សាកសពបុរសម្នាក់ដែលមានស្នាមកាំបិតចាក់ត្រង់.កផង ត្រូវគេប្រទះឃើញនៅក្បែរមាត់ស្រះទឹកមួយកន្លែង នៅព្រឹកថ្ងៃទី០៧ មិថុនា ត្រង់ចំណុចព្រៃពពេល ស្ថិតក្នុងភូមិរកាឈ្មោល ឃុំគារ ស្រុកមោងប្ញស្សី ដែលគេសង្ស័យជាអំពើឃាតកម្មពីកន្លែងផ្សេង ហើយយកសពមកទម្លាក់ចោល ។
សេចក្ដីរាយការណ៍បឋមបានឲ្យដឹងទៀតថា គេមិនទាន់ស្គាល់សាវតាសាកសពបុរសនោះនៅឡើយទេ តែមានវ័យប្រហែល៣០ឆ្មាំ ពាក់អាវយឺត និងស្លៀកខោលីអូ ។ ប៉ុន្តែអ្នកភូមិបានប្រទះឃើញស្លាប់នៅក្បែរមាត់ទឹកស្រះ ដែលទំនងត្រូវគេសម្លាប់ពីកន្លែងណាមួយ រួចយកសពទៅបោះចោលនៅក្នុងស្រះទឹកនេះ។ ប្រភពដដែលថា សាកសពមានស្នាមរបួសនៅត្រង់.ក ដែលជាស្នាមប្រើខ្សែរឹតផង និងស្នាមកាំបិតចាក់
ផង។
បើតាសមត្ថកិច្ចដែលចុះទៅកាន់កន្លែងកើតហេតុ បានបង្ហើបឲ្យដឹងថា បុរសនោះអាចត្រូវឃាតករប្រើខ្សែរឹត.កសម្លាប់ ហើយថែមទាំងប្រើកាំបិតចាក់ត្រង់.កចំនួន២កាំបិតបន្ថែមទៀតផង ។ នៅក្បែរនោះ គេរកឃើញអង្រឹងមួយដែលរុំបោះចោល ដែលគេសង្ស័យថា ក្រោយពេលសម្លាប់ឃាតករបានយកអង្រឹងនោះរុំសាកសព រួចដឹកឬសែងយកទៅបោះចោលក្នុងស្រះទឹកនោះ ។
ទោះជាយ៉ាងណា ពេលនេះ មន្ត្រីជំនាញកំពុងពិនិត្យមើលសាកសពនិងកន្លែងកើតហេតុ។ ប៉ុន្តែសមត្ថកិច្ចជំនាញមិនទាន់អាចកំណត់មុខសញ្ញាជនសង្ស័យបាននៅឡើយទេ ដោយគ្រាន់តែសន្និដ្ឋានបឋមថា អាចជាអំពើឃាតកម្ម រីឯជនដៃដល់អាចមានបក្សពួកលើសពីម្នាក់ ហើយពេលនេះ មន្ត្រីជំនាញកំពុងធ្វើការស៊ើបអង្កេតលើករណីនេះ ។ (សម្រួលដោយ៖ ស្រីណា)
ចែករំលែកព័តមាននេះ