រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា ការហូបនំបញ្ចុកនៅថ្ងៃទី៩ ខែ មិថុនាខាងមុខនេះ មិនមែនជាថ្ងៃឆ្ពោះទៅរកការចរចាផ្នែកនយោបាយឡើយ…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា ការហូបនំបញ្ចុកនៅថ្ងៃទី៩ ខែ មិថុនាខាងមុខនេះ មិនមែនជាថ្ងៃឆ្ពោះទៅរកការចរចាផ្នែកនយោបាយឡើយ ។ ការឡើងរបស់ប្រមុខរាជរដ្ឋាភិបាលនេះ គឺបន្ទាប់ពីអតីត មន្ត្រីជាន់ខ្ពស់គណបក្សប្រឆាំង ចង់ឃើញមានការចរចានយោបាយនៅថ្ងៃហូបនំបញ្ចុក ។
ថ្លែងក្នុងពិធីប្រគល់គល់សញ្ញាបត្រដល់និស្សិតផ្នែកសុខាភិបាល មកពីសាកលវិទ្យាល័យពុទ្ធិសាស្ត្រ នៅថ្ងៃទី៦ ខែមិថុនា ឆ្នាំ២០១៩ សម្ដេចតេជោបញ្ជាក់ថា នៅថ្ងៃទី៩ មិថុនា ជាថ្ងៃពលរដ្ឋខ្មែរហូបនំបញ្ចុកទូទាំងប្រទេស ។ កុំរង់ចាំដល់ថ្ងៃទី៩ មិថុនា បើពលរដ្ឋឃ្លានពេលណា ហូបពេលហ្នឹងទៅ ។ ដូច្នេះការហូបនំបញ្ចុកនេះ ក៏ជំរុញឲ្យពលរដ្ឋខ្មែរប្រើប្រាស់លទ្ធផលក្នុងស្រុក ដើម្បីឲ្យជីវិភាពរបស់ពលរដ្ឋកាន់តែធូរធារផងដែរ។
សម្ដេចតេជោថ្លែងថា «សង្ឃឹមថា ចលនានំបញ្ចុកសាមគ្គីជាតិ ឯកភាពជាតិនេះ នឹងធ្វើឲ្យការលាបពណ៌គ្នា ឬក៏អាចនិយាយទៅម្ខាងថា នឹងជំរុញឲ្យមានចលនាដើម្បីប្រើរបស់ខ្មែរ ហើយប្រហែលជាលើកនេះបំបែកឯតទគ្គកម្ម ពិភពលោកតែម្ដង» ។ សម្ដេចបន្ថែមថា ការហូបនំបញ្ចុកនៅថ្ងៃទី៩ ខែមិថុនាខាងមុខ គឺមិនមែនចរចានយោបាយឡើយ ប៉ុន្តែជារឿងទទួលទាននំបញ្ចុករួមគ្នា ដើម្បីពង្រឹងសាមគ្គីភាព មិត្តភាព និងឯកភាពខ្មែរតែប៉ុណ្ណោះ ដោយមិនរើសអើងគណបក្សនយោបាយណាមួយឡើយ គឺអាចហូបរួមគ្នាបាន
សម្ដេចតេជោគូសបញ្ជាក់ថា «តែសូមកុំយកបញ្ហាដែលខ្ញុំនិយាយនេះ ធ្វើជាការវិភាគអ្វី ផ្សេងក្រៅពីរឿងស៊ីនំបញ្ចុក ព្រោះអ្នកខ្លះគិតថា វាជាជំហានដល់ការចរចានយោបាយស្អីៗ ។ សូមកុំភ័ន្តច្រឡំ ខ្ញុំនិយាយរឿងនំបញ្ចុកសុទ្ធសាធ និងសាមគ្គីភាព ឯកភាពជាតិ តាមរយៈនៃការទទួលទាននំបញ្ចុកថ្ងៃ៩ មិថុនា នេះតែម្ដង» ។
សម្តេចតេជោ ថ្លែងទៀតថា នំបញ្ចុកជារបស់ជាតិ មិនមែនជារបស់បក្សនយោបាយណាមួយនោះទេ គឺជាអត្តសញ្ញាណជាតិ មិនមែនជាបញ្ហាបំបែកបំបាក់ជាតិឡើយ តែនំបញ្ចុកគឺជាការឯកភាពជាតិ គឺជាសាមគ្គីទៅវិញទេ ដូច្នេះនំបញ្ចុកកុំក្លាយទៅជាបញ្ហានយោបាយឲ្យសោះ។ឆ្លៀតឱកាសនោះ សម្តេចតេជោក៏បានអំពាវនាវឲ្យសមាជិកសមាជិកាគណបក្ស និងពលរដ្ឋទូទាំងប្រទេស ហូបនំបញ្ចុកទាំងអស់គ្នា នៅថ្ងៃទី៩ ខែមិថុនា ជាពិសេសនៅតាមវត្តអារាម និងរៀបចំចង្ហាន់នំបញ្ចុកប្រគេនព្រះសង្ឃ ។ ចំណែកខ្មែរអ៊ិស្លាម និងខាងវិហារគ្រិស្ទសាសនាវិញ ក៏សូមអញ្ជើញហូបនំបញ្ចុកទាំងអស់គ្នាដែរ ។
សម្តេចតេជោបានអរគុណទុកជាមុន ដល់ម្ចាស់ផ្ទះជួលកម្មករ និងរោងចក្រ ដែលនឹងរៀបចំនំបញ្ចុកសម្រាប់កម្មករកម្មការិនី ហូបជុំគ្នាមួយពេលឲ្យបានសប្បាយនៅថ្ងៃទី៩ ខែមិថុនា ដែល បង្ហាញពីសេចក្តីស្រឡាញ់ និងសាមគ្គីភាព រវាងម្ចាស់ផ្ទះជួលនិងកម្មករកម្មការិនី និងជាមួយ ម្ចាស់រោងចក្រសហគ្រាសផងដែរ ។ដើម្បីអនាម័យក្នុងការហូបនំបញ្ចុកនេះ សម្តេចតេជោបានឲ្យក្រសួងសុខាភិបាល ចុះពិនិត្យឲ្យបានដិតដល់ ព្រោះខ្លាចមានការពុលនំបញ្ចុកដែរ ។ ដូច្នេះក្រសួងសុខាភិបាលត្រូវតាមដាន ដើម្បីជៀសវាងការបន្ទោសគ្នាទៅវិញ ទៅមក ។ ជួនកាលបើមានករណីពុលមែននោះ ពិតជាមកស្តីបន្ទោសសម្តេចហើយ ។
សម្តេចតេជោ បានលើកឡើងថា ការធ្វើឲ្យមានថ្ងៃហូបនំបញ្ចុកនេះក៏ជាការជំរុញឲ្យគាំទ្រចំពោះផលិតផលដែលផលិតនៅក្នុងស្រុកផងដែរ ។ «អីុចឹងទេ ជំរុញផលិតផលក្នុងស្រុក !ខ្ញុំនិយាយដោយស្មោះ ខ្ញុំសរសើរឡាវណាស់ទោះបីជាពីជំនាន់ឆ្នាំ១៩៧៩ រហូតមកដល់ពេលនេះគឺ៤០ឆ្នាំក្រោយ ឡាវមិនដែលចោលបាយដំណើប ហូបជាមួយឡាប គាត់មិនដែលចោលទេ ។
អីុចឹងទេ យើងលេងអាហ្នឹងមើល៍ ។ ឥឡូវខ្ញុំ ដាក់បណ្តើរៗហើយ ក្នុងការទទួលភ្ញៀវអន្តរជាតិដូចជា អាម៉ុក សម្លកកូរ … ហើយថ្ងៃក្រោយដាក់សម្លម្ជូរ… ហើយថ្ងៃក្រោយដាក់នំបញ្ចុក»។ការលើករបស់សម្ដេចតេជោ ហ៊ុន សែន ដែលថា ការហូបនំបញ្ចុកនៅថ្ងៃទី៩ ខែមិថុនា ឆ្នាំ២០១៩ ខាងមុខ មិនមែនជាជំហានឆ្ពោះទៅរកការចរចាផ្នែកនយោបាយ គឺបន្ទាប់ពីលោក អេង ឆៃអ៊ាង មន្ដ្រីជាន់ខ្ពស់អតីតគណបក្សសង្គ្រោះជាតិ ថាការហូបនំបញ្ចុកនេះអាចនឹងបង្រួបបង្រួមជាតិបាន ។
លោក អេង ឆៃអ៊ាង បានសរសេរនៅលើបណ្ដាញសង្គមហ្វេសប៊ុកនាពេលថ្មីៗនេះថា «ប្រសិនបើសម្ដេចតេជោ និងលោក សម រង្ស៊ី អង្គុយទទួលទាននំបញ្ចុកជាមួយគ្នានោះ ទិវានំបញ្ចុកនឹងក្លាយជាទិវាផ្សះផ្សា និងបង្រួបបង្រួមជាតិ។អ្នកនយោបាយ គ្មានសត្រូវឬមិត្តនឹងគ្នាមួយជីវិតឡើយ!» ៕
ចែករំលែកព័តមាននេះ