រាជធានីភ្នំពេញ ៖ អ្នកប្រដាល់ជើងខ្លាំងវ័យក្មេងកម្ពុជាពីររូបត្រូវបានគេរៀបចំឱ្យជួបប្រកួតដណ្ដើមប្រាក់លានជាមួយកីឡាករថៃនៅលើសង្វៀនទូរទស្សន៍ស៊ីអិនស៊ី នាថ្ងៃសៅរ៍ ទី៨ មិថុនា ស្អែកនេះហើយ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះអាចសម្រេចគោលដៅ របស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបនាពេលនេះហាក់មានវិជ្ជាគុនខ្លាំងមិនធម្មតាបែបហ្នឹងនោះ ។
សមាសភាពកីឡាករដែលឡើងប្រកួត ដណ្ដើមប្រាក់លាននៅវេលាស្អែកនេះរួមមាន អេលីត ចំរើន មកពីក្លិបឆ្មាសសែនសុខគុនខ្មែរ ប្រកួតជាមួយកីឡាករថៃឈ្មោះ សេកសាន់ ប៉េឡេបូរីរ៉ាំ ក្នុងប្រភេទទម្ងន់៥៧គីឡូក្រាម និងកូយ ឡាយ មកពីក្លិបកងពលតូចទ័ពពិសេសឆត្រយោង៩១១ ប្រកួតជាមួយកីឡាករថៃឈ្មោះភីតងិនថង ប្រានសងហុក ក្នុងប្រភេទទម្ងន់៦០គីឡូក្រាម។
បើតាមមន្ត្រីគណៈកម្មការរៀបចំការប្រកួតឱ្យដឹងថា កីឡាករថៃទាំងពីរនាក់នេះធ្លាប់មកប្រកួតនៅលើសង្វៀនស្រុកខ្មែរជាច្រើនលើករួចមកហើយ ។ ជាពិសេសកីឡាករថៃ សេកសាន់ ប៉េឡេបូរីរ៉ាំ តែម្ដង គ្រាន់តែគេមិនធ្លាប់ជួបប្រកួតជាមួយ អេលីត ចំរើន ប៉ុណ្ណោះ។
កីឡាករថៃម្នាក់នេះ មានផ្លែប្រយុទ្ធល្អ ទាំងស្នៀត កែងនិងជង្គង់ឡើងទៅអាចប្រើការបានយ៉ាងស្ទាត់ជំនាញ ។ ប៉ុន្តែលោក ស៊ន អេលីត ដែលជាគ្រូបង្វឹករបស់អេលីត ចំរើន បានអះអាងថា កូនសិស្សរបស់លោក ក៏មិនអន់នោះដែរ ព្រោះមួយរយៈមកនេះគេខិតខំប្រឹងប្រែងហ្វឹកហាត់ខ្លាំងណាស់ ធ្វើឱ្យលោកមានជំនឿចិត្តច្រើនក្នុងការដណ្ដើមយកប្រាក់លានជាមួយកីឡាករថៃ។
ចំណែក កូយ ឡាយ ដែលត្រូវជួបប្រកួតជាមួយ ភីតងិនថង ប្រានសងហុក លើកនេះវិញក៏មានជំនឿចិត្តក្នុងការយកឈ្នះកីឡាករថៃដូចគ្នា ។ កូយ ឡាយ ជាអ្នកប្រដាល់ មួយរូបដែលមានបទពិសោធន៍ប្រកួតនៅលើសង្វៀនយ៉ាងជោកជាំ ដូច្នេះគេមិនបណ្ដោយឱ្យប្រាក់លានធ្លាក់ទៅក្នុងកណ្ដាប់ដៃកីឡាករថៃបានដោយស្រួលទេ ។ ទោះបីយ៉ាងណា កីឡាករថៃជាដៃគូប្រកួតត្រូវបានគេទទួលស្គាល់ថាជាអ្នកប្រដាល់ជើងខ្លាំងមួយរូបដែលមានល្បិចប្រយុទ្ធយ៉ាងក្រាស់ក្រែល ។ សម្រាប់ការឈានជើងចូលមកប្រកួតនៅលើសង្វៀនស្រុកខ្មែរជាច្រើនលើកមកនេះ ចាញ់ភាគតិចណាស់ ។ ដូច្នេះគូនេះមិនអាចមើលស្រាលលើខាងណាបានឡើយ ខ្លាំងប៉ះខ្លាំងចាំមើលអ្នកណាក្លាយជាម្ចាស់ប្រាក់លានលើកនេះ។
ក្រៅពីគូដណ្ដើមប្រាក់លាននៅមានគូមិត្តភាពជាច្រើនគូទៀតដូចជា កីឡាករសេក ចៅជូត មកពីក្លិបអង្គរមានជ័យខេត្តសៀមរាប ប្រកួតជាមួយកីឡាករ សូត្រ ខេវិន មកពីក្លិបបក្សីស្លាបដែក ។ កីឡាករ ឌុន រ៉ាយ៉ា មកពីក្លិបអេភូថងកីឡា ប្រកួតជាមួយកីឡាករ ផុន សុខវិបុលមកពីក្លិបតាព្រហ្មមានជ័យ និងកីឡាករ ឡុង វណ្ណា មកពីក្លិបសាលវ័ន្តកីឡា ប្រកួតជាមួយកីឡាករ សាយ ស៊ីផេង មកពីក្លិបឃ្លាំងមឿងកីឡា ៕ (កែសម្រួលដោយ ៖ បុប្ផា)
ចែករំលែកព័តមាននេះ