ប្រទេសចិន ៖ ប្រទេសចិនកាលពីថ្ងៃទី៥ មិថុនា បានបាញ់សាកប្រកបដោយជោគជ័យនូវកាំជ្រួចមួយ ចេញពីទីតាំងបាញ់បង្ហោះចល័តក្នុងសមុទ្រលឿង នាដែនទឹកខេត្តសានដុង ដោយបញ្ជូនទៅកាន់ទីអវកាសនូវផ្កាយរណប២ សម្រាប់ពិសោធខាងបច្ចេកវិទ្យា ព្រមទាំងផ្កាយរណបពាណិជ្ជកម្ម៥ទៀត។
កាំជ្រួចLONGUE MARCHE-11ត្រូវបាញ់ចេញនាវេលាម៉ោង១២និង៦នាទីម៉ោងក្នុងស្រុក ចេញពីទីតាំងបាញ់បង្ហោះចល័តលើផ្ទៃសមុទ្រ។ នោះជាការបាញ់បង្ហោះកាំជ្រួចអវកាសលើកដំបូងរបស់ចិន ចេញពីលើផ្ទៃសមុទ្រហើយជាបេសកកម្មកាំជ្រួចបញ្ជូនប្រភេទLONGUE MARCHEលើកទី៣០៦។
ការបាញ់បង្ហោះកាំជ្រួចបញ្ជូនមួយចេញពីទីតាំងបាញ់បង្ហោះលើផ្ទៃសមុទ្រ មានផលប្រយោជន៍ច្រើន បើប្រៀបធៀបទៅនឹងការបាញ់បង្ហោះនៅលើដី។ បានន័យថាវាចំណាយប្រេងឥន្ធនៈនិងថាមពលតិច។ ចំណែកការធ្លាក់់បំណែកកាំជ្រួចក៏មានគ្រោះថ្នាក់តិចដែរ។
ម្យ៉ាងទៀតការបាញ់កាំជ្រួចក្នុងសមុទ្រ កាត់បន្ថយតម្លៃនៃការបាញ់បង្ហោះ ព្រមទាំងអាចឆ្លើយតបទៅនឹងសំណើនានាកាន់តែច្រើន ក្នុងការបាញ់បញ្ជូនផ្កាយរណប សម្រាប់បណ្ដាប្រទេស ដែលចូលរួមក្នុងការផ្ដួចផ្ដើមគំនិតផ្លូវសូត៕ (កែសម្រួលដោយ ៖ បុប្ផា)
ចែករំលែកព័តមាននេះ