រាជធានីភ្នំពេញ ៖ ខណៈដែលប្រជាពលរដ្ឋខ្មែរមួយចំនួនបានដឹងតិចតួចអំពីវត្តមានរបស់ផលិតផលដំណាប់ផ្លែឈើប្រកបដោយគុណភាពខ្ពស់ ផលិតក្នុងប្រទេសកម្ពុជាដោយវិនិយោគិនខ្មែរនោះ ផលិតផលដំណាប់ផ្លែឈើផលិតក្នុងស្រុករបស់ក្រុមហ៊ុន គីរីរម្យហ្វ៊ូដ ប្រដាក់សិន (Kirirom Food Production) កំពុងបង្ហាញភាពលេចធ្លោរបស់ខ្លួននិងទទួលបានការគាំទ្រនៅលើទីផ្សារអន្តរជាតិ ។
តើលោកអ្នកបានធ្លាប់បានដឹងអ្វីខ្លះអំពីផលិតផលដំណាប់ផ្លែឈើផលិតក្នុងស្រុកខ្មែរ? ក្រុមហ៊ុន គីរីរម្យហ្វ៊ូដ ប្រដាក់សិន គឺជាក្រុមហ៊ុនដែលវិនិយោគដោយកូនខ្មែរ តាមរយៈការ បោះទុនបង្កើតរោងចក្រផលិតដំណាប់ផ្លែឈើ ក្នុងគោលបំណងប្រែក្លាយកសិផលសំខាន់ៗមួយចំនួនដូចជា ស្វាយកែវរមៀត ខ្នុរ ម្នាស់ ល្ហុង ក៏ដូចជាចេកជាដើម ដែលពិបាករកទីផ្សារ ឬត្រូវបានឈ្មួញបន្ថោកតម្លៃក្នុងរដូវប្រមូលផល ទៅកែច្នៃទៅជាផ្លែឈើក្រៀម ឬដំណាប់ផ្លែឈើ ដើម្បីផ្គត់ផ្គង់ទីផ្សារក្រៅប្រទេសផង និងក្នុងស្រុកផង ។
ជាមួយមហិច្ឆតាក្នុងការណែនាំផលិតផលដំណាប់ផ្លែឈើលើឆាកអន្តរជាតិនោះ វិនិយោគិនខ្មែរ ម្ចាស់ ក្រុមហ៊ុន គីរីរម្យហ្វ៊ូដ ប្រដាក់សិន បានខិតខំប្រែក្លាយដំណាប់ផ្លែឈើខ្មែរ ឲ្យទៅជាម៉ាក់ផលិតផលផ្លែឈើដ៏ល្បីឈ្មោះ (world class) ដោយប្រើវិធីសាស្ត្រដាំដុះតាមបែបធម្មជាតិ ការផលិតប្រកបដោយអនាម័យ គុណភាពខ្ពស់ ការវិចខ្ចប់ត្រឹមត្រូវតាមស្តង់ដារ ព្រមទាំងរសជាតិធម្មជាតិ មិនលាយពណ៌ ឬបន្ថែមក្លិន ទើបធ្វើឲ្យវត្តមានរបស់ដំណាប់ផ្លែឈើខ្មែររបស់ ក្រុមហ៊ុន គីរីរម្យហ្វ៊ូដ ប្រដាក់សិន ទើបដណ្តើមបានចំណែកទីផ្សារជាច្រើនប្រទេសជុំវិញពិភពលោក ។
ដោយភាពជឿជាក់អំពីផលិតផលដែលចេញពីរោងចក្ររបស់ខ្លួនប្រកបដោយគុណភាព ក្រុមហ៊ុន បាននាំចេញនូវដំណាប់ផ្លែឈើខ្មែរ ទៅកាន់ទីផ្សារនៃបណ្តាប្រទេសមួយចំនួនដែលក្នុងនោះរួមមាន ៖ ប្រទេសអូស្ត្រាលី, ចិន, សាធារណរដ្ឋឆែក, ជប៉ុន, ហុងកុង, កូរ៉េ, ហ្វីលីពីន, តៃវ៉ាន់, ថៃ, ចក្រភពអង់គ្លេស, សហរដ្ឋអាមេរិក និងប្រទេសវៀតណាម ជាដើម ។
អ្វីដែលធ្វើឱ្យយើងចាប់អារម្មណ៍ខ្លាំងបំផុតនោះ គឺបច្ចុប្បន្នផលិតផលដ៏ល្បីឈ្មោះរបស់ក្រុមហ៊ុន Kirirom Food Production នេះក៏បានចែកចាយ និងដាក់លក់នៅក្នុងទីផ្សារប្រទេសកម្ពុជាផងដែរ ដោយទទួលបាននូវការគាំទ្រទាំងគុណភាព និងរសជាតិ ហើយដែលគេអាចរកទិញបាននៅតាមបណ្តាផ្សារទំនើប, មីនីម៉ាត និងតាមបណ្តាអ្នកចែកចាយនៅក្នុងប្រទេសផងដែរ ។
លើសពីនេះទៅទៀតក្រុមហ៊ុន Kirirom Food Production គឺជារោងចក្រផលិតដំណាប់ផ្លែឈើដំបូងគេបង្អស់ដែលទទូលបានស្ដង់ដាបញ្ជាក់ទៅលើគុណភាពនិងអនាយ័ ដោយទទួលស្គាល់ជាអន្តរជាតិជាច្រើនដូច ៖ វិញ្ញាបនបត្រ ស៥(5s) GMP HACCP ISO22000:2005 Kosher និងHalal និងការប្តេជ្ញាយក វិញ្ញាបនបត្រ BRC ដែលជាស្ដង់ដាខ្ពស់បំផុត ក្នុងពេលខាងមុខនេះ៕
https://www.facebook.com/kiriromfoodproduction/ ។ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ