រាជធានីភ្នំពេញ ៖ ភ្លៀង១មេធំបានបង្អុរចុះលាយឡំ ដោយខ្យល់កន្ត្រាក់បោកបក់យ៉ាងខ្លាំងផង កាលពីវេលាម៉ោងប្រមាណ៥ និង៤០នាទីល្ងាចថ្ងៃទី៤ ខែមិថុនា បណ្ដាលឲ្យអគាររោងចក្រកាត់ដេរមួយកន្លែងយីហោ «FTEO» ស្ថិតនៅក្នុងភូមិត្រពាំងទួល…
រាជធានីភ្នំពេញ ៖ ភ្លៀង១មេធំបានបង្អុរចុះលាយឡំ ដោយខ្យល់កន្ត្រាក់បោកបក់យ៉ាងខ្លាំងផង កាលពីវេលាម៉ោងប្រមាណ៥ និង៤០នាទីល្ងាចថ្ងៃទី៤ ខែមិថុនា បណ្ដាលឲ្យអគាររោងចក្រកាត់ដេរមួយកន្លែងយីហោ «FTEO» ស្ថិតនៅក្នុងភូមិត្រពាំងទួល សង្កាត់កំបូល ខណ្ឌកំបូល ប៉ើងដំបូលធំៗចំនួន២ធ្លាក់មកដីរងការខូចខាតខ្ទេចខ្ទី ព្រមទាំងបណ្ដាលឲ្យកម្មការិនីជាង១០នាក់រងរបួសធ្ងន់និងស្រាល ។ មិនតែប៉ុណ្ណោះ បានបង្កឱ្យមានការប៉ះពាល់ដល់ម៉ាស៊ីនសង្វាក់ផលិតកម្មនិងវត្ថុធាតុដើម ព្រមទាំងខូចខាតផលិតផលសម្រេចជាច្រើនទៀតផង ។
ក្រោយពីជួបគ្រោះមហន្តរាយនេះ ថៅកែរោងចក្រត្រូវបង្ខំចិត្តបិទទ្វារជាបណ្ដោះអាសន្ន ដោយរង់ចាំធ្វើការជួសជុលឡើងវិញរួចរាល់សិន ទើបបើកទ្វារឲ្យកម្មករកម្មការិនីចូលធ្វើការបន្តទៀត ។ នៅក្នុងគ្រោះធម្ម ជាតិនេះដែរ ក៏បណ្ដាលឲ្យបង្គោលភ្លើងតង់ស្យុងមធ្យម(MV)ចំនួន១៧ដើម រួមនឹងបង្គោលភ្លើងបំភ្លឺផ្លូវ២ដើមទៀត ស្ថិតនៅតាមផ្លូវជាតិលេខ៤ ក្នុងភូមិថ្មដា និងភូមិស្ងួនពេជ្រ ក្នុងសង្កាត់កន្ទោក ខណ្ឌកំបូល បាក់ដួលរលំរាបដល់ដី ព្រមទាំងសង្កត់លើរថយន្តនិងតូបលក់ដូរជាច្រើនខ្នង ធ្វើឱ្យអ្នកលក់ដូរតាមចិញ្ចើមផ្លូវនោះនាំគ្នារត់ទាំងភ័យស្លន់ស្លោព្រលឹងចុងសក់ ជាពិសេសចរន្តអគ្គិសនីនៅក្នុងខណ្ឌកំបូល និងមួយផ្នែកនៅខណ្ឌពោធិ៍សែនជ័យត្រូវបានកាត់ផ្តាច់ពេញ១យប់ ។
កម្មកររោងចក្រ FTEO និយាយថា នៅរោងចក្រនេះមានកម្មករកម្មការិនីបម្រើការងារចំនួន៧០០នាក់ ហើយនាល្ងាចថ្ងៃនោះខណៈពួកគាត់កំពុងធ្វើការ ស្រាប់តែធ្លាក់ភ្លៀងដោយនាំមកជាមួយនូវខ្យល់កន្ត្រាក់បក់បោកយ៉ាងខ្លាំង លាយឡំជាមួយផ្គររន្ទះគួរឲ្យខ្លាចផងដែរ ប៉ុន្តែពួកគាត់មិនបានផ្អាកការងារឡើយ គឺនៅតែបន្តធ្វើការជាធម្មតា ។ លុះមួយសន្ទុះក្រោយមក ដោយសារមិនអាចទប់ទល់នឹងកម្លាំងខ្យល់បាន ដំបូលអគារចំនួន២របស់រោងចក្រនេះបានប៉ើងដូចក្រដាសធ្លាក់មកដី និងបណ្ដាលឲ្យត្រូវកម្មការិនីជាង១០នាក់រងរបួសធ្ងន់និងស្រាល ។ ហេតុការណ៍នេះ បានធ្វើឲ្យពួកគាត់ម្នាក់ៗភិតភ័យយ៉ាងខ្លាំងដោយអ្នកខ្លះនាំគ្នាស្រែកយំគួរឲ្យរន្ធត់ ព្រមទាំងរត់ចេញពីអគារខាងលើប្រសេចប្រសាចក្នុងស្ថានភាពជ្រួលច្របល់ ។
ប្រភពដដែលបន្តថា ពួកគាត់មិនបានដឹងថា អ្នករងរបួសនៅក្នុងហេតុការណ៍នេះត្រូវបាន បញ្ជូនទៅមន្ទីរពេទ្យណាខ្លះទេ ប៉ុន្តែអ្នកខ្លះរបួសបែកក្បាល និងខ្លះរបួសខ្លួនប្រាណ ហើយម្នាក់ៗទទឹកខ្លួនជោក ។ ចំណែកម៉ាសុីសង្វាក់ផលិតកម្ម រួមជាមួយវត្ថុធាតុដើមនិងផលិតផលសម្រេច ត្រូវទឹកភ្លៀងទទឹកនិងខូចខាត។ភ្លៀងបានអូសបន្លាយរហូតដល់យប់ទើបរាំង ចំណែកកម្មករទាំងអស់បាននាំគ្នាចាកចេញទៅផ្ទះទាំងភ្លៀងកំពុងធ្លាក់ និងផ្គររន្ទះលាន់ឮកក្រើកមេឃ ។ លុះដល់ព្រឹកឡើងថ្ងៃទី៥ ខែមិថុនា កម្មករកម្មការិនីបាននាំគ្នាទៅកាន់រោងចក្រ ប៉ុន្តែត្រូវបានថៅកែអនុញ្ញាតឲ្យឈប់សម្រាក និងត្រឡប់ទៅផ្ទះវិញ ដោយរោងចក្រត្រូវបិទទ្វារជាបណ្ដោះអាសន្នមិនកំណត់ពេល រង់ចាំការជួសជុលដំបូលអគារនិងម៉ាសុីនសង្វាក់ផលិតកម្មឡើងវិញរួចរាល់សិន ។
នៅក្នុងហេតុការណ៍នោះដែរ អ្នកលក់ដូរដែល នាំគ្នារត់ទាំងការភិតភ័យព្រលឹងចុងសក់បាននិយាយថា ខណៈភ្លៀងកំពុងធ្លាក់និងមានខ្យល់បក់បោកខ្លាំងនោះ ពួកគាត់កំពុងស្ថិតនៅក្នុងតូបលក់ដូរដែលពុំមែនជាសំណង់រឹងមាំឡើយ ស្ថិតនៅលើចិញ្ចើមផ្លូវក្រោមខ្សែភ្លើង ។ ការស្ថិតនៅក្នុងតូបពេលមានភ្លៀងធ្លាក់បែបនេះ គឺជាទម្លាប់របស់ពួកគាត់រាល់ថ្ងៃទៅហើយ ស្រាប់តែលើកនេះបង្គោលភ្លើងបានបាក់ជាបន្តបន្ទាប់ បណ្ដាលឲ្យតូបខ្លះត្រូវបង្គោលភ្លើងសង្កត់លើ និងតូបខ្លះទៀតត្រូវខ្សែភ្លើងសង្កត់ ក្រៅពីនេះក៏មានសង្កត់លើម៉ូតូសណ្ដោងរុឺម៉ក និងរថយន្តមួយចំនួនទៀតផងដែរ ។ ប៉ុន្តែជាគ្រោះល្អ មិនបណ្ដាលឲ្យមនុស្សណាម្នាក់រងរបួសឬក៏ស្លាប់ឡើយ តែម្នាក់ៗសុទ្ធតែភ័យខ្លាចាព្រោះតែខ្លាចចរន្តភ្លើងឆក់ស្លាប់ ។
ប្រភពខាងលើបានបញ្ជាក់ទៀតថា បង្គោលភ្លើងចំនួន១៧ដើមដែលបាក់រលំនោះមានឆ្អឹងដែកដែរ ប៉ុន្តែជាដែកសរសៃតូចៗ ហើយនៅលើបង្គោលមានខ្សែកាប្លិ៍ភ្លើងនិងខ្សែភ្លើងតូចធំរាប់សិបសរសៃតោង ប្រៀបដូចជាខ្សែពួរធំមួយ ។ ដូច្នេះ វាមានទម្ងន់ធ្ងន់ហើយនៅពេលខ្យល់កន្ត្រាក់បក់បោកខ្លាំង ជាហេតុធ្វើឲ្យមិនអាចទប់ទម្ងន់បាន ទើបបណ្តាលឲ្យបាក់និងដួលរលំជាបន្តបន្ទាប់បែបនេះតែម្ដង ។ តាមរយៈនៃការឃើញបង្គោលភ្លើងដែលបាក់បង្កប់សរសៃដែកតូចៗនេះ ក៏មានសំណួរពីប្រជាពលរដ្ឋទៅកាន់ក្រសួងសាធារណការក៏ដូចជាខាងអគ្គិសនីកម្ពុជាដែរថា តើបង្គោលភ្លើងទាំងអស់សុទ្ធតែបែបនេះឬ ?
រីឯនៅក្នុងភូមិសាស្ត្រខណ្ឌសែនសុខវិញ កាលពីល្ងាចថ្ងៃទី៤ ខែមិថុនានោះដែរ ខ្យល់កន្ត្រាក់បានបោកបក់ចំភូមិព្រៃមូល និងភូមិក្រាំងអង្គ្រង២ សង្កាត់ក្រាំងធ្នង់ បណ្តាលឱ្យបង្គោលភ្លើងជាច្រើនដើម និងផ្ទាំងប៉ាណូខ្លះបាក់ដួលរលំ ព្រមទាំងដំបូលផ្ទះមួយចំនួនរងការខូចខាត ។ លោក សុខ សារ៉ាត់ ចៅសង្កាត់រងទី១ សង្កាត់ក្រាំងធ្នង់ បានឱ្យដឹងថា បង្គោលភ្លើងចំនួន៥ដើម បានបាក់រលំ និង១ដើមទៀតទ្រេត និងផ្ទាំងប៉ាណូតូចៗមួយចំនួនទៀតបាក់ នៅភូមិព្រៃមូល ។
ក្រៅពីនេះ អគារឃ្លាំងមួយខ្នងនៅក្នុងភូមិក្រាំងអង្គ្រង២បានដួលរលំ តែម្ចាស់មិនអនុញ្ញាតឱ្យចូលថតយករូបភាពឡើយ ។ លោកចៅសង្កាត់រងទី១ បានឱ្យដឹងទៀតថា បន្ទាប់ពីមានភ្លៀងនិងខ្យល់កន្ត្រាក់ អាជ្ញាធរ បានទៅពិនិត្យស្ថានភាពទឹកជន់លិចនៅតាមដង ផ្លូវ ហើយសហការជាមួយប្រជាពលរដ្ឋកាយសំរាមចេញនៅតាមមាត់លូដែលស្ទះ ធ្វើឲ្យទឹកហូរស្រកអស់វិញមិនបង្កឲ្យទឹកជន់លិចលំនៅឋាន ៕
ចែករំលែកព័តមាននេះ