រាជធានីភ្នំពេញ ៖ សំណុំរឿងជនត្រូវចោទឈ្មោះ យិន ហេង ហៅចំប៉ីខ្មៅ ភេទទី៣ ពាក់ព័ន្ធនឹងបទញុះញង់ឲ្យមានការរើសរើង ត្រូវបានសាលាដំបូងរាជធានីភ្នំពេញ លើកយកមកបើកសវនាការកាលពីព្រឹកថ្ងៃទី៤…
រាជធានីភ្នំពេញ ៖ សំណុំរឿងជនត្រូវចោទឈ្មោះ យិន ហេង ហៅចំប៉ីខ្មៅ ភេទទី៣ ពាក់ព័ន្ធនឹងបទញុះញង់ឲ្យមានការរើសរើង ត្រូវបានសាលាដំបូងរាជធានីភ្នំពេញ លើកយកមកបើកសវនាការកាលពីព្រឹកថ្ងៃទី៤ ខែមិថុនា តែចុងបញ្ចប់លោក ម៉ៅ ស៊ីណា ចៅក្រមជំនុំជម្រះ បានលើកពេលប្រកាសសាលក្រមផ្តន្ទាទោសជនជាប់ចោទទៅថ្ងៃទី២០ ខែមិថុនាខាងមុខ ។ នៅចំពោះមុខអង្គសវនាការ ចំប៉ីខ្មៅបានសារភាពកំហុស និងលើកដៃប្រណមសុំទោសប្រជាពលរដ្ឋខ្មែរទាំងអស់ ចំពោះការប្រើប្រាស់ពាក្យសម្តីមិនសមរម្យ ដែលហាក់ដូចជាទើបដឹងកំហុស និងមិនខុសពីពាក្យថា «ពេលឃើញក្តារមឈូសទើបស្រក់ទឹកភ្នែក» ។
គួរបញ្ជាក់ថា ចំបុីខ្មៅ ត្រូវបានលោកពេជ្រ វេជ្ជធរ ចៅក្រមសុើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្ន កាលពីល្ងាចថ្ងៃទី៦ ខែកុម្ភៈ ឆ្នាំ២០១៨ បន្ទាប់ពីតំណាងអយ្យការបានចោទប្រកាន់ជាផ្លូវការរួចមក ។ ជនសង្ស័យឈ្មោះ យិន ហេង ហៅចំបុីខ្មៅ អាយុ២៣ឆ្នាំ កើតនៅភូមិអណ្តូងពោធិ៍សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ជាជនល្បីម្នាក់ក្នុងបណ្តាញសង្គមហ្វេសប៊ុកពាក់ព័ន្ធនឹងរឿងជេរប្រមាថជាតិសាសន៍ខ្មែរ ។
នៅថ្ងៃទី៦ ខែកុម្ភៈ ឆ្នាំ២០១៨ ជននេះត្រូវបានលោក លី សុផាន់ណា ព្រះរាជអាជ្ញារងអមសាលាដំបូងរាជធានីភ្នំពេញ សម្រេចធ្វើការចោទប្រកាន់ពីបទញុះញង់ឲ្យមានការរើសអើង យោងតាមមាត្រា៤៩៤
និង៤៩៦ នៃក្រមព្រហ្មទណ្ឌដែលតាមមាត្រានេះតម្រូវឲ្យផ្តន្ទាទោសជនជាប់ចោទពី១ឆ្នាំទៅ៣ឆ្នាំ ។ ជន សង្ស័យត្រូវបាននគរបាលចាប់ខ្លួន កាលពីល្ងាចថ្ងៃទី៥ ខែកុម្ភៈ ឆ្នាំ២០១៨ នៅហាងកាហ្វេមួយកន្លែងក្នុងទឹកដីខណ្ឌដូនពេញ ។
អង្គហេតុដែលសមត្ថកិច្ចចាប់ខ្លួនចំបុីខ្មៅនេះ គឺកាលពីវេលាម៉ោងប្រមាណ៥និង២៥នាទីល្ងាចថ្ងៃទី៤ ខែកុម្ភៈ ឆ្នាំ២០១៨ នៅមុខព្រះបរមរាជវាំង ចំបីុខ្មៅបានបង្ហោះសារជាអក្សរលើទំព័រហ្វេសសប៊ុកដែលឈ្មោះ ចំប៉ីខ្មៅ (Chom pey Khmao) ថា ជូនទៅពូជអាខ្មែរតិរច្ឆាន៣នាក់ ដែលជិះម៉ូតូមកខោកក្បាលខ្លួនតាមផ្លូវ និងមានភ្ជាប់ឃ្លីបវីដេអូមានរយៈពេល១នាទី៥៣វិនាទី ដោយជេរក្រុមជនបង្កដែលបានខោកក្បាលខ្លួន៦ក្រញរនោះ ។
ក្រោយពេលមានការបង្ហោះសារវីដេអូខ្លីលើបណ្តាញសង្គមហ្វេសប៊ុក ដោយប្រើភាសាដៀលត្មះពូជសាសន៍ជាតិខ្មែរធ្ងន់ៗបែបនេះ ក៏មានបណ្តាញសង្គមជាច្រើនបានប្រតិកម្មតបវិញ ដោយមានការថ្កោលទោស និងទាមទារឲ្យសមត្ថ កិច្ចស្វែងរកចាប់ខ្លួនជននេះឲ្យខាងតែបាន ដើម្បីនាំយកមកផ្ដន្ទាទោសតាមច្បាប់ និងឲ្យសមនឹងកំហុសដែលខ្លួនបានប្រព្រឹត្ត ។ ជនឈ្មោះ យិន ហេង ហៅចំបុីខ្មៅនេះ ធ្លាប់បានមើលងាយជាតិសាសន៍ខ្មែរជាច្រើនលើកមកហើយ ដែលធ្វើឲ្យមានការក្តៅក្រហាយពីសំណាក់មហាជន តាំងពីពេលដែលអង្គការយូណេស្កូចុះបញ្ជីទទួលស្គាល់ល្ខោនខោលជាបេតិកភណ្ឌពិភពលោកមកម្ល៉េះ ។
នៅព្រឹកថ្ងៃទី១៥ ខែកុម្ភៈ ចៅក្រមសើុបសួរតម្រូវឲ្យអនុរក្សពន្ធនាគារនាំចំបុីខ្មៅមកសាកសួរឡើងវិញ ដែលទំនងជាថ្ងៃឃុំខ្លួនបណ្តោះអាសន្ន មិនទាន់បានសួរគ្រប់ជ្រុងជ្រោយនៅឡើយ ទើបបានជាតម្រូវនាំមកសាកសួរដើម្បីបិទការសើុបអង្កេត និងដាក់ទៅជំនុំជម្រះលើអង្គសេចក្តីនាពេលនេះ ៕
ចែករំលែកព័តមាននេះ