យោងតាមមន្ត្រីយោធានៅខ្សែបន្ទាត់ព្រំដែនតំបន់ប្រាសាទព្រះវិហារបានឱ្យដឹងនៅរសៀលថ្ងៃទី៩ មីនា ២០១១ ថា មានយន្តហោះសៀម២គ្រឿងបានហោះឆ្វែលចុះ ឆ្វែលឡើង ជាច្រើនលើកក្នុងទឹកដីថៃនៅទល់មុខប្រាសាទព្រះវិហារកាលពីវេលាម៉ោងប្រមាណជាង១១និង១២ថ្ងៃត្រង់ថ្ងៃពុធនេះ ។ បើតាមអ្នកឆ្លើយឆ្លងព័ត៌មាន កោះសន្តិភាពប្រចាំតំបន់ព្រំដែនប្រាសាទព្រះវិហារ បានបញ្ជាក់ឱ្យដឹងដែរថា កាលពីថ្ងៃអង្គារម្សិលមិញក៏មានឧទ្ធម្ភាគចក្រសៀមធុនធំមួយគ្រឿងដឹកមន្ត្រីក្រសួងការបរទេស និងមន្ត្រីយោធាជាន់ខ្ពស់ថៃជាច្រើនរូបបានចុះចតនៅភូមិស្រល់ចម្ងាយប្រមាណ១២គីឡូម៉ែត្រ ពីមុខប្រាសាទព្រះវិហាររបស់ខ្មែរ នៅវេលាម៉ោង៩ព្រឹក ហើយបានបន្តដំណើរចូលទៅកាន់ផ្ទះក្រហម រហូតដល់ម៉ោង១២និង១៩នាទីថ្ងៃត្រង់ទើបត្រឡប់ទៅវិញ ។
ទាក់ទងទៅនឹងយន្តហោះសៀម២គ្រឿងដែលហោះនៅថ្ងៃទី៩ មីនា នេះ ពុំមានប្រភពណាមួយបញ្ជាក់ថា តើយន្តហោះនេះជាប្រភេទយន្តហោះអ្វីនោះទេ ហើយក៏ពុំដឹងពីគោលបំណងច្បាស់លាស់ពីការហោះក្រឡឹងឆ្វែលចុះឆ្វែលឡើងនោះដែរ ។ ទោះជាយ៉ាងណាស្ថានភាពយោធាបានវិលទៅរកប្រក្រតីភាពឡើងវិញ ហើយនៅថ្ងៃពុធនេះ បន្ទាប់ពីមានភាពតានតឹងស្ទើរ២៤ម៉ោងចាប់ពីរសៀលថ្ងៃចន្ទ រហូតដល់វេលារសៀលថ្ងៃអង្គារម្សិលមិញនោះរួចមក ប៉ុន្តែភាពធូរស្រាលនេះកម្ពុជានៅតែប្រុងជើងការណ៍ខ្ពស់ក្នុងការការពារបូរណភាពទឹកដីដដែលមិនឱ្យសត្រូវសៀមឈ្លានពានរំលោភបំពានបានជាដាច់ខាត ។
គួរបញ្ជាក់ដែរថា ភាពតានតឹងកើតឡើងវិញជាថ្មីចាប់តាំងពីរសៀលថ្ងៃទីចន្ទ រហូតមកដល់រសៀលថ្ងៃអង្គារម្សិលមិញនេះ គឺកើតឡើងខណៈពេលដែលទាហានសៀមបានបង្កើនកម្លាំងទ័ពយ៉ាងច្រើនចូលមកកាន់តំបន់ជួរមុខក្នុងទឹកដីរបស់គេ នៅទល់មុខនឹងប្រាសាទព្រះវិហារ កន្លែងដែលទាហានសៀមប៉ុនប៉ងធ្វើផ្លូវតម្រង់ចូលមកកាន់ចំណុចសំបុកឃ្មុំក្នុងទឹកដីកម្ពុជានោះ។ ជាមួយគ្នានេះដែរ ទាហានសៀមក៏បានដឹកជញ្ជូនឈើ ដែក ស៊ីម៉ង់ត៍ និងសម្ភារជាច្រើនរថយន្តព្រមទាំងគ្រឿងចក្រមកដាក់នៅចំណុចស្រះត្រាវ ក្បែរច្រកទ្វារដែកក្នុងទឹកដីរបស់គេ និងសាងសង់លេណដ្ឋានជាច្រើនទៀតផងដែរ ៕
ចែករំលែកព័តមាននេះ