រាជធានីភ្នំពេញ ៖ នៅក្នុងពិភពប្រដាល់ គេកត់សម្គាល់ថា មានការស្នងតំណងពីឳពុកដល់កូន ដោយក្នុងត្រកូលខ្លះគឺឳពុកក៏ល្បី ហើយកូនដែលបន្តស្នងអាជីពក៏ល្បីផងដែរ ។ ប៉ុន្តែក៏មានត្រកូលអ្នកប្រដាល់ខ្លះ ក្នុងពេលឳពុកប្រកួតគឺមិនល្បីនោះទេ ទាល់តែដល់ជំនាន់កូនៗមកស្នងតំណែងទើបមានការទទួលស្គាល់ធ្វើឱ្យមានការចាប់អារម្មណ៍ដល់ស្នាដៃរបស់ឳពុក ។
ជាក់ស្ដែងដូចជាត្រកូលអ្នកប្រដាល់ខាងក្រោមនេះ ដែលបានប្រឡូកក្នុងអាជីពវាយតប់លើសង្វៀនតាំងពីឳពុកដល់កូន៖ ឃីម ឌីម៉ា និងឃីម បូរ៉ា ៖ ២នាក់បងប្អូននេះបានក្លាយជាកីឡាករដែលមានកេរ្តិ៍បោះសំឡេងគួរឱ្យកត់សម្គាល់នាពេលចុងក្រោយ។ ពួកគេទាំង២គឺល្បីដូចគ្នា ដោយគ្រាន់តែ ឃីម ឌីម៉ា មានការទទួលស្គាល់ខ្លាំងជាង ដោយសារតែគេដណ្ដើមបានមេដាយមាសពីការប្រកួតសុីហ្គេមនាពេលកន្លងមកដោយដាក់ឈ្មោះថាឃុន ឌីម៉ា។ អ្នកស្នេហាវិស័យប្រដាល់សុទ្ធតែដឹងថា លោកបានក្លាយជាកីឡាករល្បីក្រោមការបង្វឹកផ្ទាល់របស់លោក អេង ប៊ុនឃីម ដែលជាម្ចាស់ក្លិប ប្រដាល់ និងជាឳពុកបង្កើត ។ មន្ត្រីគណៈកម្មការប្រដាល់បញ្ជាក់ថា លោក អេង ប៊ុនឃីម គឺជាអតីតអ្នកប្រដាល់ ប៉ុន្តែមកពីពេលលោកនៅប្រដាល់ហាក់មិនសូវល្បីខ្លាំងក្លា ទើបគេអាចនិយាយបានថា ក្នុងត្រកូលមួយនេះ កីឡាករជាកូនល្បីជាង ដែលខុសពីត្រកូលផ្សេងក្នុងពិភពប្រដាល់ដែលឳពុកល្បីឈ្មោះ ទើបកូនទទួលបានការចាប់អារម្មណ៍តាមក្រោយ។
អេ ភូថង ៖ ត្រកូលអ្នកប្រដាល់មួយនេះ លោក អេ ភូថង ល្បីខ្លាំងក្លានាំមុនគេទើបប្រទាញឱ្យអូត ភូថង ជាប្អូន និងកូនៗចំនួន២នាក់ទទួលបានការចាប់អារម្មណ៍ ។ ក្រោយពីលោក និងអូត ភូថង លាឈប់ពីប្រដាល់ កូនប្រុសស្រីរបស់លោកអេ ភូថង ២នាក់បានក្លាយជាអ្នកប្រដាល់អាជីព ដោយកូនស្រីឈ្មោះអេ យ៉ានុត បានក្លាយជាកីឡាការិនីល្បីឈ្មោះនាពេលបច្ចុប្បន្ន ។ កូនប្រុសរបស់លោក២នាក់ទៀត ក៏ចាប់ផ្ដើមប្រឡូកអាជីពជាអ្នកប្រដាល់ដែរ ដោយគ្រាន់តែពួកគេស្ថិតនៅវ័យក្មេង ហើយមិនទាន់មានឱកាសកសាងកេរ្តិ៍ឈ្មោះដើម្បីឱ្យល្បីដូចអេ យ៉ានុត និងឳពុក។
ឈុត សេរីវណ្ណថង ៖ កីឡាករដែលមានឈ្មោះបោះសំឡេងរូបនេះ ក៏មានឳពុកជាអ្នកប្រដាល់ផងដែរ ដោយគ្រាន់តែក្នុងជំនាន់ លោក ឈុត សារី ជាឳពុកនៅប្រដាល់ មិនសូវល្បីឈ្មោះខ្លាំងក្លា ដូចក្រោយពេលបង្កើតក្លិបប្រដាល់ និងមានកូនស្នងតំណែងប្រដាល់។
ម៉ន សាម៉េត-ម៉ន ព្រហ្មម៉ាញ ៖ ត្រកូលអ្នកប្រដាល់ទាំងពីរនេះ ក៏មានឳពុកជាអ្នកប្រដាល់ផងដែរ ដោយបច្ចុប្បន្នឳពុករបស់លោក គឺលោក ម៉ាង ម៉ន មិនត្រឹមតែបណ្ដុះកូនបង្កើតទាំង២ឱ្យមានឈ្មោះបោះសំឡេងនៅក្នុងពិភពប្រដាល់ប៉ុណ្ណោះទេ ពោលគឺមានកូនប្រុសផ្សេងទៀត ក៏ត្រូវបានបង្វឹកជាអ្នកប្រដាល់ផងដែរ ដោយគ្រាន់តែកូនប្រុសទាំងនោះបោះបង់ ។ មកដល់បច្ចុប្បន្នគេឃើញ ម៉ន ព្រហ្មម៉ាញ និង ម៉ន សាម៉េត នៅតែបន្តស្នងតំណែងរបស់ឳពុក ដែលកាលពីមុនក៏ជាអ្នកប្រដាល់ ។
ឈិន ក្វាន់ចៃ និងឈិន ក្វាន់ង៉ុយ ៖ ពីរនាក់ឳពុក-កូននេះ គឺជាត្រកូលអ្នកប្រដាល់គួរឱ្យសរសើរ ដោយលោក ឈិន ក្វាន់ចៃ កាលពីមុនគឺជាអ្នកប្រដាល់
ហើយក្រោយពេលលាឈប់ ក៏បណ្ដុះកូនប្រុសគឺ ឈិន ក្វាន់ង៉ុយឱ្យក្លាយជាអ្នកប្រដាល់អាជីពនិងបានបន្តតួនាទីជាគណៈកម្មការប្រដាល់ប្រចាំទូរទស្សន៍អាសុី
អាគ្នេយ៍ ដែលមានន័យថា មិនអាចផ្ដាច់ខ្លួនពីអាជីពដែលធ្លាប់ប្រឡូក។
សូត្រ ប៊ុនធី ៖ កីឡាកររូបនេះ ក៏មានឳពុកជាអតីតកីឡាករប្រដាល់ផងដែរ ដោយឳពុករបស់លោក គឺ សូត្រ ប៊ុនឃីម ក្រោយពេលលាឈប់ក៏សម្រេចចិត្តមកធ្វើគ្រូបង្វឹក ហើយបង្វឹកកូនប្រុស២រូប គឺ សូត្រ ប៊ុនធី និងសូត្រ ខេវិន ឱ្យក្លាយជាអ្នកប្រដាល់ ។ ក្រៅពីកីឡាករដែលបានរៀបរាប់ខាងលើក៏មានត្រកូលអ្នកប្រដាល់ផ្សេងទៀតបានបង្កើតខ្សែជីវិតស្រដៀងគ្នាផងដែរ ដោយគ្រាន់តែត្រកូលអ្នកប្រដាល់ខ្លះ លេចមុខបានតែមួយឆាវ ក៏លាឈប់ស្ងាត់បាត់ ហើយបើធៀបនឹងត្រកូលអ្នកប្រដាល់ខាងលើ គឺ មិនសូវមានស្នាដៃគួរ ឱ្យកត់សម្គាល់ប៉ុណ្ណោះ៕ កែសម្រួលដោយ ៖សុឃាក់
ចែករំលែកព័តមាននេះ