រាជធានីភ្នំពេញ ៖ បុរសរងគ្រោះជាជនជាតិចិនម្នាក់រត់ទាំងមានស្នាមរបួសជាច្រើនកន្លែង និងមានឈាមហូរស្រោចពេញខ្លួនរកអោយគេឯងជួយ ក្រោយពីរូបគេត្រូវបានបុរសជាជនជាតិចិនដូចគ្នាចំនួន៣នាក់បាននាំគ្នាដេញវាយតាមផ្លូវចាប់ក្រៀកយកដបវាយបែកក្បាល និង ចាក់ត្រូវជាច្រើនកន្លែង និងនាំគ្នាបម្រុងលើកដាក់រថយន្តម៉ាកហាយឡែនឌ័រមួយគ្រឿង តែត្រូវបានជនរងគ្រោះរើរត់រួចខ្លួននោះ ដែលហេតុការនេះបានបង្កការភ្ញាក់ផ្អើលកើតឡើង កាលពីវេលាម៉ោង១០និង៤៥នាទីព្រឹកថ្ងៃទី០៥ ខែមិថុនា ឆ្នាំ២០១៩ នៅចំណុចរបងខាងក្រោយស្ថានទូតរុស្ស៊ី ក្នុងសង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុគេបានឃើញបុរសជនជាតិចិនចំនួន២នាក់នាំគ្នារត់ដេញតាមវាយបុរសជាជនជាតិចិនដូចគ្នាម្នាក់ នៅតាមផ្លូវដោយមិនមានអ្នកណាម្នាក់បានដឹងថា ពួកគេឈ្លោះគ្នា និងដេញគ្នាមកពីទីណាឡើយ ។ លុះមកដល់ក្បែរហាងមួយកន្លែងពួកគេក៏តាមទាន់ និងចាប់បានដោយមានម្នាក់ចាប់ក្រៀកជាប់ និងម្នាក់ទៀតបានយកដបមួយទៅវាយសំពងលើក្បាល បណ្តាលអោយបែកហូរឈាម និងធ្វើអោយដបមួយនោះបែក ហើយក៏យកវាទៅចាក់ទៅលើភ្លៅ និងដងខ្លួនជនរងគ្រោះគ្មានត្រាប្រណី បណ្តាលអោយរងរបួសពេញខ្លួនប្រាណបន្ថែមទៀត ។
តាមប្រភពដដែលបានប្រាប់បន្តទៀតថា ក្រោយពីក្រុមជនជាតិចិនទាំង២នាំគ្នាវាយ និងចាក់ទៅលើបុរសរងគ្រោះជាជនជាតិចិនម្នាក់ បណ្តាលអោយរងរបួសយ៉ាងធ្ងន់ធ្ងររួចហើយ ពួកគេក៏បានទូរស័ព្ទហៅបក្សពួកជាជនជាតិចិនម្នាក់ទៀត បើករថយន្តម៉ាកហាយឡែនឌ័រ ពណ៌ក្រហម ពាក់ស្លាកលេខភ្នំពេញ ២S-៨០០៧ មួយគ្រឿងមកដល់ និងនាំគ្នាលើកជនរងគ្រោះ ដាក់លើរថយន្ត ។ តែត្រូវបានជនជាតិចិនជនរងគ្រោះរើរត់ទាំងខ្លួនមានស្នាមរបួស និងឈាមហូរស្រោចពេញខ្លួនប្រាណ ក្នុងបំណងរកអោយគេឯងជួយមកដល់ខាងក្រោយស្ថានទូតរុស្ស៊ីនេះ និងធ្វើអោយមានការភ្ញាក់ផ្អើលកើតឡើងតែម្តង រួចហើយក្រុមជនជាតិចិនជាជនដៃដល់ទាំង៣នាក់ក៏បាននាំគ្នាឡើងជិះរថយន្តម៉ាកហាយឡែនឌ័រមួយគ្រឿងនោះរត់គេចខ្លួនពីកន្លែងកើតហេតុបាត់ស្រមោលអស់ ។
ពាក់ព័ន្ធទៅនឹងករណីជនជាតិចិនវាយ និងចាក់គ្នា បណ្តាលអោយរងរបួសនេះដែរគេនៅមិនទាន់បានដឹងពីអត្តសញ្ញាណជនរងគ្រោះនៅឡើយ ហើយក៏មិនទាន់បានដឹងថា កើតឡើងដោយសារតែមូលហេតុអ្វីដែរ?។ ក្រោយពេលកើតហេតុ កម្លាំងមានសមត្ថកិច្ចមូលដ្ឋានខណ្ឌចំការមនក៏បានចុះមកដល់កន្លែងកើតហេតុ ដោយបានឃើញបុរសជនជាតិចិនរងគ្រោះរងរបួសធ្ងន់ធ្ងរពេកក៏បានហៅរថយន្តសាមុយរបស់មន្ទីរពេទ្យមិត្តភាពខ្មែរសូវៀតមកដឹកយកទៅសង្គ្រោះ ហើយក៏កំពុងតែធ្វើការស្រាវជ្រាវរកចាប់ខ្លួនក្រុមជនដៃដល់ជាជនជាតិចិនទាំង៣នាក់ ដើម្បីយកមកធ្វើការផ្តន្ទាទោសទៅតាមផ្លូវច្បាប់ជាបន្តទៅទៀតផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ