រាជធានីភ្នំពេញ ៖ បុរសជាអ្នករត់ម៉ូតូកង់បីម្នាក់ត្រឡប់មកដល់ផ្ទះវិញ ស្រាប់តែឃើញទ្វារចំហ ហើយអីវ៉ាន់ក្នុងផ្ទះរាយប៉ាយ ដោយសារត្រូវជនសង្ស័យធ្វើសកម្មភាពគាស់ផ្ទះបានសម្រេចរួចរើកកាយរបស់របរពេញផ្ទះ ប៉ុន្តែមិនបានបាត់បង់របស់របរមានតម្លៃនោះទេ ។
ហេតុការណ៍ខាងលើនេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី៤ ខែមិថុនា ឆ្នាំ២០១៩ តាមបណ្តោយផ្លូវ១១៨ នៅចំណុចផ្ទះជាន់ទី១ ផ្ទះលេខ៣២អឺអង ស្ថិតនៅក្នុងសង្កាត់ផ្សារថ្មីទី១ ខណ្ឌដូនពេញ ។
តាមប្រភពព័ត៌មានពីជនរងគ្រោះជាម្ចាស់ផ្ទះឈ្មោះយិន រត្ន័ថា ភេទប្រុស អាយុ៣៥ឆ្នាំ មុខរបរជាអ្នករត់ម៉ូតូកង់បី ស្នាក់នៅចំណុចកើតហេតុខាងលើ បានអោយដឹងថា មុនពេលកើតហេតុ ជារៀងរាល់ម៉ោង៦ព្រឹក គាត់បានដឹកប្រពន្ធនិងកូនប្រុសតូចអាយុជាង៣ខួប ចេញទៅច្បារអំពៅ ដោយអោយប្រពន្ធនៅផ្ទះម្តាយ ហើយគាត់ចេញទៅរត់ម៉ូតូកង់បី រហូតដល់ម៉ោងជាង៨យប់ ទើបត្រឡប់មកផ្ទះវិញ ។
តាមប្រភពដដែលបានបន្តថា លុះដល់វេលាកើតហេតុ គាត់ជាមួយនឹងប្រពន្ធបានធ្វើដំណើរមកដល់ផ្ទះ ស្រាប់តែប្រទះឃើញទ្វារផ្ទះចំហមួយចំហៀង ហើយនៅក្នុងផ្ទះវិញមានសភាពរាយប៉ាយតាំងពីពូក និងទូត្រូវបានជនសង្ស័យធ្វើសកម្មភាពគាស់ផ្ទះចូលលួច ប៉ុន្តែសំណាងល្អដែលគាត់មិនបានដាក់ទ្រព្យសម្បត្តិមានតំលៃនៅក្នុងផ្ទះនោះទេ គឺមានតែពូក កង្ហារ និងចានឆ្នាំងតែប៉ុណ្ណោះ ។
តាមប្រភពដដែលបានបន្តទៀតថា គាត់សូមផ្តាំផ្ញើដល់បងប្អូនប្រជាពលរដ្ឋមេត្តាប្រុងប្រយ័ត្នទាំងអស់គ្នា មុនពេលចេញទៅក្រៅ ឬមួយក៏ទុកផ្ទះចោល ហើយគាត់ក៏សំណូមពរដល់សមត្ថកិច្ចប៉ុស្តិ៍ផ្សារថ្មី១ជួយស្រាវជ្រាវតាមចាប់ខ្លួនជនសង្ស័យយកមកផ្តន្ទាទោសតាមច្បាប់ផងដែរ ។
ក្រោយពេលកើតហេតុ ជនរងគ្រោះនិយាយថាចាំព្រឹកថ្ងៃទី៥ មិថុនា នឹងទៅដាក់ពាក្យបណ្តឹងនៅប៉ុស្តិ៍ផ្សារថ្មី១ ៕ (កែសម្រួលដោយ ៖ ធីតា)
ចែករំលែកព័តមាននេះ