រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជា និងបើកសិក្ខាសាលាពិភាក្សាលើ សេចក្តីព្រាងច្បាប់ស្តីពីប្រេងកាត ដែលមកពីគ្រប់ភាគីពាក់ព័ន្ធ នៅថ្ងៃទី៦ ខែមិថុនា ឆ្នាំ២០១៩ ។ នេះបើលោក ឈាង វុន ប្រធានគណៈកម្មការបរទេសសហប្រតិបតិ្តការ ឃោសនា និងព័ត៌មាននៃរដ្ឋសភា ។
លោកឈាង វុន បានឲ្យដឹងក្រោយកិច្ចប្រជុំគណៈកម្មាធិការអចិន្ត្រៃយ៍នា ព្រឹកថ្ងៃទី៥ខែមិថុនា យ៉ាងដូច្នេះថា ៖«ដូចអ្វីដែលយើងបានឃើញស្រាប់ គឺកម្ពុជាបានកំពុងតែមមាញឹកខិតខំប្រឹងប្រែង ដើម្បីធ្វើយ៉ាងណាទាញយកផលពីឡូប្រេងកាត ។ អីញ្ចឹងហើយឡូប្រេងកាតនេះសភាយើងយកចិត្តទុកដាក់ណាស់ ហើយយើងនឹងសិក្ខាសាលាធំមួយនៅថ្ងៃស្អែក ដើម្បីឲ្យមានការផ្តល់យោបល់ពីអ្នកសារព័ត៌មាន អង្គការសង្គមស៊ីវិល សមាជិកព្រឹទ្ធសភា រដ្ឋសភា មន្ត្រីជំនាញផងដែរ» ។
លោកឈាង វុន ក៏បានឲ្យដឹងថា នៅថ្ងៃទី១០ ខែមិថុនា គណៈកម្មជំនាញរដ្ឋសភានឹងចូលតំណាងរាជរដ្ឋាភិបាលមកពីក្រសួងរ៉ែ និងថាមពល ដែលដឹកនាំដោយលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ដើម្បីពិភាក្សាគ្នាមុននឹងដាក់ឲ្យសភាអនុម័ត ។ លោកបញ្ជាក់ថា៖«គណៈកម្មការទី៩ ដែលមានលោកជំទាវ និន សុផុន ជាប្រធាននឹងទទួលបន្ទុកលើកកិច្ចការនេះ ។ ដោយសារគណៈកម្មាធិការអចិន្ត្រៃយ៍ប្រគល់ភារកិច្ច នេះទៅឲ្យគណៈកម្មការទី៩នេះ ដើម្បីសិក្សា» ៕ កែសម្រួលដោយ ៖ សុឃាក់
ចែករំលែកព័តមាននេះ