ខេត្តព្រះសីហនុ ៖ ឃាតករសម្លាប់ក្មេងប្រុសស្រីទាំងពីរនាក់ គឺជាមុខសញ្ញាដ៏គ្រោះថ្នាក់មួយ និងបានប្រព្រឹត្តបទល្មើសជាបន្ដបន្ទាប់ពីអតីតកាល ព្រមទាំងគេចខ្លួនដូរដីបាត់ដំណឹង រហូតសមត្ថកិច្ចតាមខ្លួន ។ ពិតណាស់ ចំពោះទោសកំហុសដ៏ធ្ងន់ធ្ងរ ជននេះនឹងគ្មានវាសនារស់នៅក្រៅគុកអស់១ជីវិត ហើយចាប់ពីថ្ងៃនេះទៅនោះគឺជាប់គុកមួយជីវិតតាមមាត្រា២០០ នៃក្រមព្រហ្មទណ្ឌជាមិនខាន ។
លោកឧត្តមសេនីយ៍ទោ ជួន ណារិន្ទ បានថ្លែងបញ្ជាក់ប្រាប់ថា ឃាតកររូបនេះ មិនមែនទើបតែប្រព្រឹត្ត
បទល្មើសលើកទី១នេះទេ ដោយរូបគេធ្លាប់បានប្រព្រឹត្តបទល្មើសបែបនេះកាលពីអតីតកាលផងដែរ ក្នុងនោះរហូតមានការជាប់ពន្ធនាគារទៀតផង ។ លោកឧត្តមសេនីយ៍ស្នងការបានបញ្ជាក់ឲ្យដឹងថា អំឡុងឆ្នាំ២០០១-២០០២ ជននេះ បានចាប់រំលោភក្មេងស្រីនៅស្រុកកំណើត ប៉ុន្ដែមិនបានសម្រេច រួចហើយបានរត់គេចខ្លួនចេញពីស្រុកកំណើត ទៅធ្វើជាកម្មករសំណង់នៅព្រែកលៀប ហើយបានលួចខ្សែភ្លើងត្រូវបានម្ចាស់ប្តឹងចាប់ដាក់ពន្ធនាគារ ។
ក្រោយចេញពីពន្ធនាគារ ជននេះមិនបានទៅស្រុកកំណើតនោះទេ ព្រោះនៅទីនោះមានដីកាតុលាការចាប់ ខ្លួន បើហ៊ានទៅច្បាស់ជាចាប់ចូលគុកមិនខាន ។ ជននេះប ានទៅខេត្តពោធិ៍សាត់ ក៏មានប្រពន្ធ ដែលជាស្ដ្រីមេម៉ាយកូន៥នាក់ ។ បន្ទាប់មកពួកគេទាំងពីរនាក់ បានចេញមកធ្វើសំណង់នៅសង្កាត់ចោមចៅ ខណ្ឌពោធិ៍សែនជ័យ ហើយបានបន្ដទៅក្រុងបាវិត ខេត្តស្វាយរៀង កាលដើមឆ្នាំ២០១៨ ។
លោកឧត្តមសេនីយ៍បន្តថា នៅក្រុងបាវិត ជនម្នាក់នេះក៏បានចាប់រំលោភយុវតីម្នាក់ រួចគេចខ្លួនជាមួយប្រពន្ធមកធ្វើជាកម្មករសំណង់នៅ ក្នុងស្រុកព្រៃនប់ ខេត្តព្រះសីហនុ ។ ប្រតិបត្តិការបង្ក្រាបឃាតកករំណាចនេះ បានធ្វើឡើងដោយកម្លាំងនគរបាលនាយកដ្ឋាន នគរបាលព្រហ្មទណ្ឌក្រសួងមហាផ្ទៃដឹកនាំដោយលោកវរសេនីយ៍ឯក ជាវ វិបុល អនុប្រធាននាយកដ្ឋាន ដោយមានកិច្ចសហការពីនគរបាលខេត្តព្រះសីហនុ នគរបាលរាជធានីភ្នំពេញនគរបាលខេត្តស្វាយរៀង និងនគរបាលខេត្តព្រៃវែង ។
នៅអំឡុងពេលចុះប្រតិបត្តិការចាប់ជនដៃដល់រូបនេះ កម្លាំងសមត្ថកិច្ចបានតាមប្រមាញ់ប្រើពេល៣ថ្ងៃ នៅខេត្តព្រៃវែង មុនពេលឈានដល់ការឡោមព័ទ្ធផ្ទះជីដូនមួយរបស់ខ្លួន ដោយចាក់សោរពីក្រៅដើម្បីបន្លំភ្នែក ព្រោះផ្ទះនោះម្ចាស់ធ្វើចំណាកស្រុកមិនបាននៅផ្ទះទេ ។ ពេលចូលទៅបង្ក្រាបជនដៃដល់បានកាន់កាំបិតផ្គាក់មួយរហូតសមត្ថកិច្ចបង្ខំបាញ់ចំនួន៣គ្រាប់ ដើម្បីគំរាម ។ ប៉ុន្តែភ្លាមៗនោះជននេះបានរត់ឡើង ទៅលើដំបូលផ្ទះ ។ ដោយឃើញស្ថានភាពបែបនេះ លោក ជាវ វិបុល បានបញ្ចុះបញ្ចូលនិងលួងលោមរហូតចាប់វាយខ្នោះបានតែម្តង ។
សូមបញ្ជាក់ថា ឃាតកររូបនេះមានឈ្មោះពិតថា មាង វិចិត្រ មិនមែនឈ្មោះ ឈឹម វិចិត្រនោះទេ ត្រូវបានបញ្ជូនទៅស្នងការដ្ឋាននគរបាលខេត្តព្រះសីហនុ ដែលជាម្ចាស់ករណី នៅយប់ថ្ងៃទី២ មិថុនា ដើម្បីកសាងសំណុំរឿងបញ្ជូនទៅកាន់តុលាការផ្ដន្ទាទោសតាមច្បាប់ នៅថ្ងៃទី៤ មិថុនា ។ អំពើសម្លាប់យ៉ាងឃោឃៅនេះបានកើតឡើងនៅថ្ងៃទី២៩ ឧសភា ឆ្នាំ២០១៩កន្លងទៅ លើកុមារាជាប្អូនឈ្មោះ ផា សុខលី អាយុ២ឆ្នាំកន្លះ និងកុមារីជាបងឈ្មោះ ផា ស្រីល័ក្ខ អាយុ១០ឆ្នាំ ។
ព័ត៌មានចុងក្រោយបានឱ្យដឹងថា ជនតិរច្ឆានរំលោភសម្លាប់ក្មេង២នាក់បងប្អូន ត្រូវបាន បញ្ជូនទៅកាន់សាលាដំបូងខេត្ត នារសៀលថ្ងៃទី៤ មិថុនា ក្រោមការចោទប្រកាន់របស់សមត្ថកិច្ចលើបទល្មើសចំនួន២ ។ នេះបើយោងតាមការបញ្ជាក់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ក្នុងនោះបទល្មើសទី១-ចោទពីបទមនុស្សឃាតដោយចេតនា និងទី២-ចោទពីបទរំលោភសម្លាប់លើអនីតិជន ។
តាមប្រភពព័ត៌មាននាល្ងាចថ្ងៃដដែលឱ្យដឹងថា លោក ហួត វិចិត្រ ព្រះរាជអាជ្ញារងអមសាលាដំបូងខេត្ត នៅល្ងាចថ្ងៃដដែលបានចោទប្រកាន់ឃាតករកំណាចរំលោភសម្លាប់ក្មេងស្រី និងក្មេងប្រុសជាប្អូនចំនួន២បទល្មើស ។
លោក លឹម ប៊ុនហេង អ្នកនាំពាក្យអយ្យការអមសាលាដំបូងខេត្តព្រះសីហនុ បានឱ្យដឹងថាតំណាងអយ្យការបានចោទប្រកាន់ពីបទឃាតកម្មដោយមានស្ថានទម្ងន់ទោសទាក់ទងនឹងជនរងគ្រោះតាមមាត្រា២០២ ចំណុចទី១ នៃក្រមព្រហ្មទណ្ឌ និងបទឃាតកម្មដោយមានទារុណកម្ម អំពើឃោឃៅ និងរំលោភសេពសន្ថវៈ តាមមាត្រា២០៥នៃក្រមព្រហ្មទណ្ឌ ដែលជាទោសប្រឈមនឹងការជាប់គុក១ជីវិត ។
ជនត្រូវចោទនិងសំណុំរឿង ត្រូវបានបញ្ជូនទៅចៅក្រមស៊ើបសួរ ដេីម្បីសម្រេចឃុំខ្លួនដាក់ពន្ធនាគារបណ្តោះអាសន្ន ។ គិតត្រឹមវេលាម៉ោង៦ល្ងាចម្សិលមិញ ការសម្រេចរបស់ចៅក្រមនៅមិនទាន់ដឹងនៅឡើយទេ ៕ (សម្រួលដោយ៖ ស្រីណា)
ចែករំលែកព័តមាននេះ