ខេត្តព្រះសីហនុ ៖ ក្រោយពីទទួលព័ត៌មានជុំវិញការចាប់ខ្លួនឃាតករតិរច្ឆាន រំលោភសម្លាប់កុមារពីរនាក់បងប្អូនយ៉ាងសាហាវព្រៃផ្សៃ កាលពីថ្ងៃទី២៩ ឧសភា កន្លងមក នៅព្រឹកថ្ងៃទី៣ មិថុនា បានសង្កេតឃើញថា…
ខេត្តព្រះសីហនុ ៖ ក្រោយពីទទួលព័ត៌មានជុំវិញការចាប់ខ្លួនឃាតករតិរច្ឆាន រំលោភសម្លាប់កុមារពីរនាក់បងប្អូនយ៉ាងសាហាវព្រៃផ្សៃ កាលពីថ្ងៃទី២៩ ឧសភា កន្លងមក នៅព្រឹកថ្ងៃទី៣ មិថុនា បានសង្កេតឃើញថា បងប្អូនប្រជាពលរដ្ឋក្នុងភូមិកើតហេតុបានសម្តែងការខឹងសម្បាយ៉ាងខ្លាំង ដែលរលកនៃភ្លើងកំហឹងនេះអាចឆេះនេះ ទៅធ្វើត្រាប់ពីការរំលោភសម្លាប់នៅផ្ទះកើតហេតុ ក្នុងឃុំបិតត្រាង ស្រុកព្រៃនប់ ត្រូវបានលុបចោលភ្លាមៗ ព្រោះខ្លាចពលរដ្ឋដែលខឹងសម្បារាប់លានអង្សានោះចោមវាយសម្លាប់មិនអាចទប់បាន ។
អ្វីដែលត្រូវបានកត់សម្គាល់នោះ គឺនៅរសៀលថ្ងៃដដែល បងប្អូនប្រជាពលរដ្ឋដែលរង់ចាំមិនឃើញនាំខ្លួនឃាតករកំណាចទៅធ្វើត្រាប់ ក៏បានលើកគ្នាប្រមាណ៥០០នាក់ មកកាន់ស្នងការដ្ឋាននគរបាលខេត្ត ហើយទាមទារឱ្យសមត្ថកិច្ចបង្ហាញមុខឃាតករតិរច្ឆាន ដោយពួកគាត់ចង់មើលមុខមនុស្សចិត្តតិរច្ឆាននេះ តើមានមុខមាត់ដូចម្តេច និងលាយឡំដោយសម្រែកទាមទារឱ្យប្រមុខរាជរដ្ឋាភិបាលបង្កើតច្បាប់ប្រហារជិវិត លើបទល្មើសរំលោភសម្លាប់ ដើម្បីជាការព្រមានទៅលើមនុស្សផ្សេងទៀត កុំឱ្យប្រព្រឹត្តបែបនេះទៅថ្ងៃ ក្រោយ ។
ស្ថិតក្នុងចំណោមមនុស្សប្រមាណជាង៥០០នាក់ នាព្រឹកថ្ងៃទី៣ មិថុនា ឆ្នាំ២០១៩ ដែលត្រូវជាថ្ងៃនៃពិធីបុណ្យសពកុមារ២នាក់បងប្អូនគម្រប់៧ថ្ងៃ គេសង្កេតឃើញបងប្អូនប្រជាពលរដ្ឋ បានបង្ហាញទស្សនៈខឹងសម្បាដូចៗគ្នា ដោយពួកគាត់បានស្នើយ៉ាងទទូចដល់ប្រមុខរាជរដ្ឋាភិបាល ឱ្យបង្កើតច្បាប់ប្រហារជិវិត ចំពោះបទល្មើសរំលោភសម្លាប់បែបនេះលើជនល្មើស ដោយមិនត្រូវបន្ធូរបន្ថយទោសជាដាច់ខាត ។
នៅរសៀលថ្ងៃដដែលនេះផងដែរ ដោយសាររង់ចាំមិនឃើញនាំមកធ្វើត្រាប់ទើបក្រុមបងប្អូនប្រជាពលរដ្ឋ ដែលមានកំហឹងខ្លាំងទាំងនោះបានមកប្រមូលផ្តុំគ្នានៅស្នងការដ្ឋាននគរបាលខេត្តព្រះសីហនុ ដើម្បីស្នើសុំលោក ឧត្តមសេនីយ៍ទោ ជួន ណារិន្ទ ស្នងការនគរបាលខេត្តឱ្យបង្ហាញមុខ ជនតិរច្ឆាននេះផងដើម្បីឱ្យពួកគាត់រំសាយកំហឹង ក៏ដូចជាឱ្យពួកគាត់មានជំនឿចិត្តទៅលើការអនុវត្តន៍ច្បាប់ របស់សមត្ថកិច្ចក្នុងសំណុំ រឿងឃាតកម្មដ៏សាហាវឃោឃៅនេះផងដែរ ។
តាមសំណូមពរស្នើសុំមើលមុខឃាតករកំណាច លោកឧត្តមសេនីយ៍ស្នងការក៏បានបញ្ជាឱ្យនគរបាលក្រៀកឃាតករបណ្តើរមកឈរនៅក្នុងរបងដ៏រឹងមាំឱ្យមើលមុខប្រមាណជិត១០នាទីដែរ ទើបក្រុមប្រជាពលរដ្ឋបានអស់ចិត្ត ។ នៅចំពោះមុខបងប្អូនប្រជាពលរដ្ឋ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានថ្លែងប្រាប់ឲ្យដឹងថា បន្ទាប់ពីមានការណែនាំពីលោកនាយឧត្តមសេនីយ៍អគ្គស្នងការនគរបាលជាតិ សមត្ថកិច្ចមិនបានបញ្ជូនជនដៃដល់ទៅកាន់កន្លែងកើតហេតុដើម្បីធ្វើត្រាប់នោះទេ ព្រោះខ្លាចប្រជាពលរដ្ឋទប់កំហឹងមិនបាន អាចឈានទៅប្រព្រឹត្តអ្វីដែលខុសច្បាប់ ។
លោកឧត្តមសេនីយ៍ស្នងការបានបញ្ជាក់ទៀតថា «នៅពេលនេះ សមត្ថកិច្ចរបស់យើងសម្រេចដោយមិនបញ្ជូនជនសង្ស័យទៅធ្វើត្រាប់នៅកន្លែងកើតហេតុនោះឡើយ ដោយសារតែនៅទីនោះ មានប្រជាជនពី៥ទៅ៦០០នាក់ នឹងបន្ដមកថែមទៀតរង់ចាំ ដូច្នេះពួកគាត់អាចផ្ទុះកំហឹងខ្លាំង ឈានដល់ការវាយសម្លាប់ជនសង្ស័យនឹងអាចប៉ះពារជាមួយកងកម្លាំងសមត្ថកិច្ចយើងទៀតផង» ។
លោកឧត្តមសេនីយ៍ទោ ជួន ណារិន្ទ បានបញ្ជាក់ទៀតថា ជនសង្ស័យត្រូវបានលោកសួរនាំផ្ទាល់និងត្រៀមកសាងសំណុំរឿងបញ្ជូនទៅកាន់តុលាការ ។ (សម្រួលដោយ៖ ស្រីណា)
ចែករំលែកព័តមាននេះ