រាជធានីភ្នំពេញ ៖ ម៉ូតូមួយគ្រឿងម៉ាកយ៉ាម៉ាហាបេស ត្រូវអគ្គីភ័យឆាបឆេះរងការខូចខាតយ៉ាងដំណំ បន្ទាប់ពីម្ចាស់ម៉ូតូបានដោះខ្សែប៊ុយហ្ស៊ី រួចធាក់បញ្ឆេះក៏ប៉ះជាមួយនឹងសាំង បណ្តាលឲ្យឆាបឆេះយ៉ាងសន្ធោសន្ធៅ បង្កការភ្ញាក់ផ្អើលដល់ប្រជាពលរដ្ឋដែលរស់នៅក្បែរកន្លែងកើតហេតុនាំគ្នាចេញមកជួយពន្លត់កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៥ ខែមិថុនា ឆ្នាំ២០១៩ ត្រង់ចំណុចខាងមុខឃ្លាំងលក់រថយន្ត២៦៦ តាមបណ្ដោយផ្លូវ២៧១កែងនិងផ្លូវ១៥៦ ស្ថិតក្នុងសង្កាត់ទឹកល្អក់ទី២ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសមិនស្គាល់អត្តសញ្ញាណម្នាក់បើកបរម៉ូតូមួយគ្រឿងម៉ាកយ៉ាម៉ាហាបេស ពណ៌ក្រហម ពាក់ស្លាកលេខ ម៧១៥៨ ភព១ ធ្វើដំណើរតាមបណ្ដោយផ្លូវ២៧១ ក្នុងទិសដៅពីត្បូងទៅជើង លុះមកដល់ចំណុចកើតហេតុ ម៉ូតូខាងលើក៏បានឈប់ចតអែបទៅចិញ្ចើមផ្លូវ ពេលនោះគេឃើញអ្នកបើកបរម៉ូតូក៏បានឱនទៅឆ្កឹះឆ្កៀលម៉ាស៊ីនម៉ូតូ ទំនងជាខូច តែមិនដឹងថាម៉ូតូខាងលើខូចអ្វីនោះទេ។
តាមប្រភពដដែលបានបន្តថា បន្ទាប់មកអ្នកបើកបរម៉ូតូខាងលើក៏បានឡើងទៅធាក់ដើម្បីបញ្ឆេះម៉ាស៊ីន ក៏ស្រាប់តែលេចចេញជាអណ្ដាតភ្លើងឆាបឆេះម៉ូតូខាងលើយ៉ាងសន្ធោសន្ធៅតែម្តង។ ភ្លាមៗនោះ អ្នកបើកម៉ូតូខាងលើក៏ប្រញាប់ប្រញាល់រត់ទៅដួសទឹកមកជះពន្លត់ដែរ តែមិនរលត់នោះទេ បន្ទាប់មកក៏មានប្រជាពលរដ្ឋដែលរស់នៅក្បែរកន្លែងកើតហេតុបាននាំគ្នាយកបំពង់ពន្លត់អគ្គិភ័យមកបាញ់ពន្លត់អស់ចំនួន២បំពង់ធ្វើឱ្យភ្លើងក៏រលត់ទៅវិញ តែបណ្តាលឲ្យម៉ូតូមួយគ្រឿងខាងលើរងការខូចខាតត្រូវភ្លើងឆេះអស់ពាក់កណ្តាលផ្នែកខាងមុខ ប៉ុន្តែមិនបង្កឲ្យនរណាម្នាក់រងរបួស ឬឆេះរាលដាលដល់ផ្ទះប្រជាពលរដ្ឋនោះទេ។
បើតាមប្រភពពីអ្នកបើកបរម៉ូតូមួយគ្រឿងម៉ាកយ៉ាម៉ាហាបេសខាងលើបានរៀបរាប់ប្រាប់ទាំងក្តីសោកស្តាយថា នៅមុនពេលកើតហេតុ ម៉ូតូរបស់គាត់ គឺមានបញ្ហាខូចបេនសាំង ហើយគាត់ក៏យកមកអោយជាងដែលនៅក្បែរកន្លែងកើតហេតុជួយធ្វើការជួសជុលផងដែរ។
តាមប្រភពពីបុរសជាម្ចាស់ម៉ូតូបានបន្តថា បន្ទាប់ពីជាងធ្វើការជួសជុលរួចរាល់ហើយ គាត់ក៏ជិះម៉ូតូមួយគ្រឿងនេះធ្វើដំណើររហូតមកដល់ចំណុចកើតហេតុ ស្រាប់តែបេនសាំងដែលជាងទើបតែបានជួសជុលរួចនោះវាធ្លាយសាំងចេញមកខាងក្រៅ ពេលនោះគាត់ក៏បានឈប់ម៉ូតូចុះជួសជុលដោយខ្លួនឯងរហូតលែងមានសាំងធ្លាយចេញមកក្រៅ។ ភ្លាមៗនោះគាត់ក៏បានឡើងធាក់បញ្ឆេះម៉ាស៊ីនម៉ូតូ ដើម្បីបន្តដំណើរទៅមុខទៀត ប៉ុន្តែធាក់បញ្ឆេះមិនដំណើរការសោះ។ បន្ទាប់មក គាត់ក៏បានដកខ្សែប៊ុយហ្ស៊ីដើម្បីបញ្ឆោតភ្លើង រួចគាត់ក៏ធ្វើការធាក់បញ្ឆេះម្តងទៀត ធ្វើឲ្យចរន្តអគ្គិសនីដែលចេញពីខ្សែប៊ុយហ្ស៊ីឆ្លងទៅប៉ះជាមួយនឹងសាំងដែលធ្លាយចេញពីបេនសាំង បង្កជាអណ្ដាតភ្លើង បណ្តាលឱ្យឆាបឆេះម៉ូតូរបស់គាត់រងការខូចខាតយ៉ាងដំណំតែម្ដង។
ក្រោយពេលកើតហេតុ ក៏មានសមត្ថកិច្ចមូលដ្ឋានបានចុះមកដល់កន្លែងកើតហេតុ ដោយពិនិត្យឃើញថា មិនបានបង្កឲ្យមានការឆាបឆេះរាលដាលដល់ផ្ទះប្រជាពលរដ្ឋ ទើបសមត្ថកិច្ចយល់ព្រមអោយបុរសជាម្ចាស់ម៉ូតូធ្វើការដឹកម៉ូតូដែលរងការខូចខាតចេញពីកន្លែងកើតហេតុបាត់ទៅ៕
ចែករំលែកព័តមាននេះ