រាជធានីភ្នំពេញ ៖ នៅថ្ងៃនេះស្ថានទូតម៉ាឡេស៊ីប្រចាំព្រះរាជាណាចក្រកម្ពុជាបានបើកទ្វាររង់ចាំមនុស្សគ្រប់គ្នាដែលនឹងអញ្ជើញចូលរួមក្នុងពិធីដ៏សំខាន់មួយរបស់សាសនិកអ៊ីស្លាម បន្ទាប់ពីបានបញ្ចប់ខែបួស រឺហៅថារ៉ាម៉ាដាន ដោយតមអាហាររយៈពេលមួយខែ ។ ពិធីនេះត្រូវបានគេហៅថា Hari Raya ហើយមិនប្រកាន់ជនជាតិឡើយ គឺសម្រាប់ប្រជាជនគ្រប់ជនជាតិគ្រប់ជាតិសាសន៍ទាំងអស់ ដើម្បីចូលរួមអបអររីករាយទាំងអស់គ្នា ។
លោក Eldeen Husaini Mohd Hashim ឯកអគ្គរដ្ឋទូតប្រទេសម៉ាឡេស៊ីប្រចាំព្រះរាជាណាចក្រកម្ពុជាបានមានប្រសាសន៍ថា អត្ថន័យនៃពិធីបុណ្យ Hari Raya គឺជាការប្រារព្ធរួមគ្នារវាងជនជាតិទាំងអស់នៅក្នុងប្រទេសម៉ាឡេស៊ី បន្ទាប់ពីពួកគេបញ្ចប់កម្មវិធីបួស តមអាហាររយៈពេលមួយខែ ចាប់ពីព្រះអាទិត្យរះ ដល់ព្រះអាទិត្យលិច ។ បន្ទាប់ពីនេះចប់ គឺគ្រប់ជនជាតិទាំងអស់នៅប្រទេសម៉ាឡេស៊ីនឹងប្រារព្ធរួមគ្នាមិនថា ជនជាតិម៉ាឡេស៊ី ឥណ្ឌា ឬចិនឡើយ ។
លោកបន្តថា ពិធីបុណ្យ Hari Raya មិនមែនធ្វើតែក្នុងប្រទេសម៉ាឡេស៊ីនោះទេ គឺនៅគ្រប់ស្ថានទូតទាំងអស់ នៅតាមបណ្ដាប្រទេសនានាលើពិភពលោកនឹងប្រារព្ធពិធីនេះដូចគ្នា ខុសតែថ្ងៃគ្នាប៉ុណ្ណោះ ជាក់ស្ដែងសម្រាប់ស្ថានទូតម៉ាឡេស៊ីប្រចាំកម្ពុជានឹងធ្វើឡើងនៅថ្ងៃទី ០៥ ខែមិថុនា ឆ្នាំ២០១៩ ដែលជាថ្ងៃទី១ នៃថ្ងៃចូលឆ្នាំរបស់ម៉ាឡេស៊ី ហើយស្ថានទូតនៅតាមប្រទេសផ្សេងទៀត គេប្រារព្ធនៅថ្ងៃបន្តបន្ទាប់ ដូចជា ក្រោយចូលឆ្នាំ២ ថ្ងៃឬ៣ថ្ងៃទៅតាមការកំណត់របស់ទូតនីមួយៗ ។ លោកបន្តថា៖ «សម្រាប់ស្ថានទូតម៉ាឡេស៊ីនៅក្នុងប្រទេសកម្ពុជានឹងនាំនូវអ្វីដែលប្លែកសម្រាប់ជូនទស្សនិកជនដែលបានអញ្ជើញមកចូលរួមតាមការអញ្ជើញរបស់យើងដូចជា មន្ត្រីរាជរដ្ឋាភិបាល អ្នកជំនួញ អ្នកសារព័ត៌មានជាដើម» ។
លោកបន្តទៀតថា យើងនឹងចែករំលែកនូវអ្វីដែលប្លែកដូចជា វប្បធម៌របស់ពួកយើង សម្លៀកបំពាក់ អាហារ និងសិល្បៈរបស់ពួកយើង ។ ក្នុងពិធីនេះដែរក៏ជាឱកាសក្នុងការផ្សព្វផ្សាយពីវប្បធម៌ ទេសចរណ៍ និងប្រពៃណីរបស់ប្រជាជនម៉ាឡេស៊ីជាដើម ។
លោកបន្ថែមថា នៅក្នុងពិធីបុណ្យមួយនេះនឹងទទួលបានជោគជ័យខ្ពស់ និងមានការគាំទ្រពី អ្នកចូលរួមដែលត្រូវបានអញ្ជើញផងដែរ ហើយនៅឆ្នាំបន្តបន្ទាប់ទៀតស្ថានទូតនឹងនាំមកនូវអ្វីដែលថ្មីប្លែកៗ ផ្ដល់ជូនប្រជាពលរដ្ឋនៅក្នុងប្រទេសកម្ពុជា ដើម្បីឱ្យបានយល់ដឹងបន្ថែមពីប្រទេសម៉ាឡេសស៊ី ដូចជាវប្បធម៌ ប្រពៃណី ម្ហូបអាហារម៉ាឡេស៊ីជាដើម ។
គួរបញ្ជាក់ថាពិធីបុណ្យ Hari Raya គឺជាឱកាសដ៏សំខាន់មួយ នៅក្នុងប្រតិទិនអ៊ីស្លាម ដែលបានប្រារព្ធដោយសាសនិក អ៊ីស្លាមទូទាំងពិភពលោក វាជាថ្ងៃបញ្ចប់នៃខែបួស ហៅថារ៉ាម៉ាដាន ។ ក្នុងអំឡុងបុណ្យរ៉ាម៉ានដាន សាសនិកអ៊ីស្លាមទូទាំងពិភពលោក ត្រូវតែតមអាហារ ក្នុងពេលថ្ងៃ គឺជាប់ពីព្រះអាទិត្យរះ ដល់ព្រះអាទិត្យលិច ក្នុងរយៈពេល៣០ថ្ងៃ ។ សាសនិកអ៊ីស្លាម ប្រើប្រតិទិនច័ន្ទគតិ ដើម្បីកំណត់ថ្ងៃសំខាន់ៗដូចជា Ramadan និងSyawal ដែលកើតឡើងក្នុងខែផ្សេងគ្នា ក្នុងប្រតិទិនគ្រីគូរៀនជារៀងរាល់ឆ្នាំ ។ នៅក្នុងខែ Syawal សាសនិកអ៊ីស្លាមភាគច្រើន បើកទ្វារផ្ទះរបស់ពួកគេទទួលស្វាគមន៍មនុស្សគ្រប់គ្នា ដោយមិនគិតពីជាតិសាសន៍ វប្បធម៌ និងតួនាទីឡើយ ដើម្បីចូលរួមសប្បាយរីករាយទាំងអស់គ្នា ។
ដោយឡែកស្ថានទូតម៉ាឡេស៊ី ក៏បើកទ្វារទទួលស្វាគមន៍ មនុស្សគ្រប់ទិសទីដោយមិនគិតពីសាសនា តួនាទី ឬប្រវត្តិឡើយ ដើម្បីពង្រឹងនូវការរួបរួមសហការ និងលើកកម្ពស់សមាហរណកម្មជាតិសាសន៍ក៏ដូចជា ការយល់ដឹងពីពិធីបុណ្យ និងវប្បធម៌ ៕កែសម្រួលដោយ ៖ សុឃាក់
ចែករំលែកព័តមាននេះ