រាជធានីភ្នំពេញ ៖ យ៉ាងហោចណាស់មនុស្សប្រុសស្រីបានស្លាប់ ដោយសាររន្ទះបាញ់ និងខ្យល់កន្ទ្រាក់៣២នាក់ និងគោក្របីងាប់៤២ក្បាល និងខូចខាតផ្ទះសម្បែងធ្ងន់ធ្ងរជិត៤០០ខ្នង ក្នុងរយៈពេលមួយខែ គឺខែឧសភា ឆ្នាំ២០១៩នេះ…
រាជធានីភ្នំពេញ ៖ យ៉ាងហោចណាស់មនុស្សប្រុសស្រីបានស្លាប់ ដោយសាររន្ទះបាញ់ និងខ្យល់កន្ទ្រាក់៣២នាក់ និងគោក្របីងាប់៤២ក្បាល និងខូចខាតផ្ទះសម្បែងធ្ងន់ធ្ងរជិត៤០០ខ្នង ក្នុងរយៈពេលមួយខែ គឺខែឧសភា ឆ្នាំ២០១៩នេះ បើយោងតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ ។
របាយការណ៍គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងទៀតថា៖ ការទទួលរងគ្រោះដោយខ្យល់កន្ត្រាក់ក្នុងខែឧសភាកើតមានចំនួន៨៨លើក នៅរាជធានីខេត្ត ទូទាំងប្រទេស ចំណែកការខូចខាតមានផ្ទះរលំ និងខូចធ្ងន់ធ្ងរ ៣៩០ខ្នង, របើកដំបូល និងខូចខាតមធ្យមចំនួន៣,៣៨៥ខ្នង, របើកដំបូលសាលារៀន និងទីចាត់ការ២៤អគារ, របើកដំបូលរោងម៉ាស៊ីនកិនស្រូវ៥ , អគាររដ្ឋបាល៦, ព្រះវិហារ និងសាលាឆាន់៤, ប្រជាពលរដ្ឋរងគ្រោះស្លាប់១ម្នាក់ និងរបួស៣០នាក់។
ចំពោះមនុស្សរងគ្រោះដោយសាររន្ទះបាញ់បានស្លាប់៣១នាក់ (ស្រី១៣) របួស២៥នាក់ ងាប់គោក្របី៤២ក្បាល និងខូចខាតផ្ទះ៤ខ្នង ។ ដោយឡែកជំងឺឆ្លងក្នុងរយៈពេល៤ខែកន្លងមកមាន ជំងឺគ្រុនឈាមបានកើតមានប្រមាណ៨,០០០ករណី និងមានរងគ្រោះស្លាប់ចំនួន១០នាក់ នៅទូទាំងប្រទេស ដែលស្ថិតក្នុងកម្រិតកើនឡើងមួយធៀបនឹងឆ្នាំកន្លងមក ហើយក្នុងនេះក្រសួងសុខាភិបាលបានចេញសេចក្តីក្រើនរំលឹកស្តីពីវិធានការ ការពារជំងឺគ្រុនឈាម ក្នុងខែមីនា ដោយសារមានការសន្និដ្ឋានថា ជំងឺគ្រុនឈាមនឹងមានការកើនឡើងក្នុងឆ្នាំនេះ ។
ជំងឺប៉េស្តជ្រូកអាហ្វ្រិក ដែលបានកើតមានពីអំឡុងខែមីនា និងខែមេសាកន្លងមកនៅក្នុងឃុំសោមធំ ស្រុកអូរយ៉ាដាវ ខេត្តរតនគីរី បណ្តាលឲ្យជ្រូកងាប់ និងកំទេចចោលប្រមាណ១,០០០ក្បាល មានសភាពស្ងប់ស្ងាត់ បន្ទាប់ពីក្រសួងជំនាញ បានចេញប្រកាសកំណត់តំបន់ផ្ទុះជំងឺ ដោយការចាត់វិធានការទប់ស្កាត់ចលនាជ្រូក និងផលិតផលមានដើមកំណើតពីសត្វជ្រូកចេញពីខេត្ត និងទប់ស្កាត់ការរាលដាលជំងឺបន្ត ។
ទន្ទឹមនេះដែររងគ្រោះដោយអគ្គិភ័យក្នុងខែឧសភាបានកើតមានចំនួន៦៥លើក នៅរាជធានី-ខេត្តចំនួន២១ មានការខូចខាតដោយឆេះផ្ទះចំនួន៥៨ខ្នង, តូបលក់ដូរ៧៣, រោងចក្រ០២កន្លែង , ស្ថានីយប្រេងឥន្ធនៈ០២កន្លែង , សាឡង់ដឹកប្រេង ១, ព្រៃរនាម៤០ហិកតា , ចំការកៅស៊ូ និងប្រេងខ្យល់១២ហិកតា , ឆេះខូចរថយន្ត៩គ្រឿង, ម៉ូតូ៩គ្រឿង, ស្រូវ០២តោន និងប្រេងឥន្ធនៈ៣៦ម៉ឺនលីត្រ ។
គួរបញ្ជាក់ផងថា ក្រសួងធនធានទឹក និងឧតុនិយមបានចេញសេចក្តីប្រកាសព័ត៌មានជុំវិញបញ្ហាអាកាសធាតុនៅកម្ពុជា ដោយបញ្ជាក់ថា ចាប់ពីថ្ងៃទី០៥ ដល់ ១១ ខែមិថុនា ឆ្នាំ២០១៩ នៅកម្ពុជាភ្លៀងនឹងធ្លាក់ក្នុងកម្រិតពីមធ្យមទៅបង្គួរ កន្លែងខ្លះអាចខ្លាំងជាលក្ខណៈឡូកាល់ ។ ក្រសួងធនធានទឹកបានបញ្ជាក់ថា នៅឆ្នាំ២០១៩ ជាឆ្នាំ El Nino ដែលកម្ពុជាបាននឹងកំពុងទទួលនូវឥទ្ធិពលនេះ ហើយរហូតមកដល់ពេលនេះ ឥទ្ធិពលនេះមិនទាន់បញ្ចប់នៅឡើយទេ គ្រាន់តែឥទ្ធិពលមានការថមថយចុះបន្តិចប៉ុណ្ណោះ ។ ជាមួយគ្នានេះក្រសួងបានអំពាវនាវដល់ប្រជាពលរដ្ឋសូមប្រុងប្រយ័ត្នខ្ពស់ចំពោះបាតុភូតផ្គររន្ទះ និងខ្យល់កន្ត្រាក់ ៕ កែសម្រួលដោយ ៖ សុឃាក់
ចែករំលែកព័តមាននេះ