រាជធានីភ្នំពេញ៖ សព្វថ្ងៃនេះវាមិនមែនជារឿងចម្លែកទេដែលប្រទះឃើញនរណាម្នាក់មានស្នាមសាក់នៅលើដងខ្លួន ប៉ុន្តែអ្វីដែលសំខាន់នោះគឺស្នាមសាក់ទាំងនោះ ស្អាត ហើយសក្តិសមជាមួយបុគ្គលនោះដែរ ឬអត់ ។ សង្គមកាន់តែទាន់សម័យ ស្នាមសាក់ក៏កាន់តែពេញនិយម ហើយពេល ថ្មីៗនេះ គេសម្គាល់ឃើញថា តារាស្រីល្បីឈ្មោះជាច្រើនដួងបាននាំគ្នាចាក់សាក់តាមកន្លែងផ្សេងៗគ្នា ដើម្បីទាក់ទាញប្រជាប្រិយភាព ។
តារាសម្តែងកញ្ញាកែវ នីសា បានចាក់សាក់យ័ន្តនៅពីក្រោយខ្នង ដែលសាក់នេះនាងបានទៅចាក់ជាមួយគ្រូមន្តអាគមដ៏ល្បីនៅប្រទេសថៃ ។ យ័ន្តគាថានេះត្រូវបានតារាសម្តែងលំដាប់ហូលីវូដអ្នកនាងអេនចេលីណា ជោលី សាក់ផងដែរ ។
តារាសម្តែង និងបង្ហាញម៉ូដកញ្ញាទឹម រដ្ឋា បានចាក់សាក់ជាអក្សរចិនមួយជួរនៅលើខ្នង និងសាក់មួយកន្លែងទៀតនៅពីចង្កេះខាងក្រោយ ដូច្នេះហើយនាងចូលចិត្តស្លៀកឈុតវាលខ្នង និងថតរូបបង្ហាញស្នាមសាក់មួយនេះជាប្រចាំ ធ្វើឲ្យមហាជនចាប់អារម្មណ៍ ។
តារាសម្តែងកូនកាត់នាងម៉ៃយ៉ា ក៏មានស្នាមសាក់នៅកណ្តាលខ្នងផងដែរដែលគេអាចមើលឃើញនៅពេលនាងពាក់អាវវាលបញ្ចេញសាច់ខ្នង ។ ស្នាមសាក់នៅកញ្ចឹងករបស់ម៉ៃយ៉ា មានរាងជារង្វង់មូល និងមានអក្សរដូចជាយ័ន្តផងដែរ ។ មហាជនពោលសរសើរថាស្នាមសាក់នេះស្រស់ស្អាត និងពេញនិយមដូចតារាបស្ចិមប្រទេស ។
តារាសម្តែងអ្នកនាងស្វែង សុជាតា ក៏មានស្នាមសាក់លើខ្នងដ៏កម្រមួយ ដោយស្នាមសាក់នេះ គឺជាការសាក់យ័ន្តអាគមបែបព្រហ្មញ្ញ សាសនា ដើម្បីការពារខ្លួន មិនមែនដើម្បីលំអខ្លួននោះទេ ។
ពេជ្រ អាវីហ្សា បានរំលេចស្នាមសាក់ផ្នែកខាងក្រោយនៃស្មារបស់ខ្លួនដោយមើលទៅជាប្រភេទសាក់បែបខ្មែរ ហើយតាំងពីចាក់សាក់មកនាងរមែងរំលេចឱ្យគេឃើញគ្រប់សកម្មភាពទៅណាមកណា ។ តារាចម្រៀងកញ្ញាទេព បូព្រឹក្ស ក៏មានស្នាមសាក់នៅត្រង់ស្មា និងកញ្ចឹងកដែរ ។ ស្នាមសាក់របស់នាងមិនខុសពីតារាផ្សេងទៀតឡើយ ពោលគឺជាការលម្អខ្លួនមួយបែប ក្នុងនាមជាតារាចម្រៀងយុវវ័យ ។
តារាសម្តែងនាងសឿន ផានផាភួង បានចាក់សាក់រំលេចឈ្មោះរបស់នាងនៅលើស្មាខាងក្រោយ ។ តារាស្រីម្នាក់នេះតាំងពីឡើងកូដមកលេងខ្លួនគួរឲ្យទាក់ទាញខុសពី ដំបូងៗ ។ ផាភួង និយាយថានាងសាក់នេះគ្រាន់តែមើលទៅឲ្យប្លែក ណាមួយនេះជាឈ្មោះត្រកូលរបស់នាង ទើបគិតថាមិនខុសអ្វី ណាមួយសមស្របតាមការពេញនិយមនាពេលបច្ចុប្បន្នផងដែរ ។
តារាចម្រៀងកញ្ញាសួស វីហ្សា មានស្នាមសាក់តូចមួយនៅត្រង់កដៃសម្រាប់បង្ហាញពីភាពស្រស់ស្អាតរបស់ខ្លួន និងជាការលម្អទៅតាមតារា ផ្សេងៗទៀតដែលកំពុងពេញនិយមនៅក្នុងការសាក់នេះ ។
ជាការកត់សម្គាល់ក្រៅពីតារាទាំងណោះគេក៏ឃើញតារាល្បីជាច្រើនទៀតដែរបានសាក់លើដងខ្លួន ដូចជាសូដា នីតា, ញឹម ចាន់ថន និងតូតា ជាដើម ។ ការសាក់របស់ពួកគេនោះគឺធ្វើឡើងតាមចំណង់ចំណូលចិត្ត រៀងៗខ្លួន ៕ (កែសម្រួលដោយ ៖ បុប្ផា)
ចែករំលែកព័តមាននេះ