ខេត្តកណ្តាល ៖ ឪពុកនិងកូនត្រូវរថយន្តមួយគ្រឿងបើកបុក រួចបើកគេចទៅបាត់ តែជាអកុសលក៏ត្រូវរថយន្តមួយគ្រឿងផ្សេងទៀតមកពីក្រោយកិនស្លាប់ទាំងពីរនៅកន្លែងកើតហេតុតែម្តង។ ហេតុការណ៍គ្រោះថ្នាក់ចរាចរណ៍គួរឱ្យរន្ធត់ខាងលើនេះបានកើតឡើងកាលពីវេលាម៉ោង៤និង២០នាទីរសៀលថ្ងៃទី៣ ខែមិថុនា ឆ្នាំ២០១៩ លើកំណាត់ផ្លូវជាតិលេខ៤ ចន្លោះគីឡូម៉ែត្រលេខ២១-២២…
ខេត្តកណ្តាល ៖ ឪពុកនិងកូនត្រូវរថយន្តមួយគ្រឿងបើកបុក រួចបើកគេចទៅបាត់ តែជាអកុសលក៏ត្រូវរថយន្តមួយគ្រឿងផ្សេងទៀតមកពីក្រោយកិនស្លាប់ទាំងពីរនៅកន្លែងកើតហេតុតែម្តង។
ហេតុការណ៍គ្រោះថ្នាក់ចរាចរណ៍គួរឱ្យរន្ធត់ខាងលើនេះបានកើតឡើងកាលពីវេលាម៉ោង៤និង២០នាទីរសៀលថ្ងៃទី៣ ខែមិថុនា ឆ្នាំ២០១៩ លើកំណាត់ផ្លូវជាតិលេខ៤ ចន្លោះគីឡូម៉ែត្រលេខ២១-២២ មុខភូមិបែកចាន ឃុំបែកចាន ស្រុកអង្គស្នួល ខេត្តកណ្ដាល ។
ភាគីខាងម៉ូតូមួយគ្រឿងជិះគ្នា២នាក់ឪពុកនិងកូន ម៉ាកស៊ុយហ្ស៊ុយគីស្មាសវី ពណ៌ខ្មៅ ពាក់ផ្លាកលេខ ភ្នំពេញ ១BQ-៨៤៧៥ បើកបរដោយឈ្មោះពេជ្រ ឌីត ភេទប្រុស អាយុ២៩ឆ្នាំ មុខរបរជាងកញ្ចក់ ត្រូវជាឪពុក បានស្លាប់នៅនឹងកន្លែងកើតហេតុ និងអ្នករួមដំណើរត្រូវជាកូនឈ្មោះឌីត សេងហាក់ ភេទប្រុស អាយុ៧ឆ្នាំ បានស្លាប់នៅនឹងកន្លែងកើតហេតុ ។ ជនរងគ្រោះទាំង២នាក់ឪពុកនិងកូនមានទីលំនៅភូមិលាំងជ័យ ឃុំពោធិ៍ចំរើន ស្រុកបរសេដ្ឋ ខេត្តកំពង់ស្ពឺ ។
ចំណែកភាគីខាងរថយន្តមួយគ្រឿង ម៉ាកអាំងទែរណាស់ស្យូណាល់ ពណ៌បៃតងលាយស ពាក់ផ្លាកលេខ ភ្នំពេញ ៣E-៦២១៤ បើកបរដោយបុរសម្នាក់មិនស្គាល់អត្តសញ្ញាណ រត់គេចខ្លួនបាត់ ។
តាមប្រភពពីសាក្សីនៅកន្លែងកើតហេតុបានប្រាប់អោយដឹងថា មុនពេលកើតហេតុ គេឃើញ ឪពុកនិងកូនជាជនរងគ្រោះទាំង២នាក់ជិះម៉ូតូមួយគ្រឿង ធ្វើដំណើរមកពីទិសខាងកើត ទៅទិសខាងលិច (ភ្នំពេញទៅខេត្តព្រះសីហនុ) លុះមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿងមិនស្គាល់ម៉ាក បានបុកពីក្រោយ បណ្ដាលអោយម៉ូតូដួលទៅកណ្តាលផ្លូវ រួចរថយន្តបង្កបើកគេចបាត់ ស្របពេលនោះក៏មានរថយន្តមួយគ្រឿងផ្សេងទៀតម៉ាកអាំងទែរណាស់ស្យូណាល់ ពណ៍បៃតងលាយស បើកបរមកពីទិសខាងកើតទៅទិសខាងលិច ក្នុងទិសដៅស្របគ្នា បណ្ដាលអោយកិនចំក្បាលអ្នកបើកបរម៉ូតូ និងអ្នករួមដំណើរ បណ្ដាលអោយជនរងគ្រោះទាំង២នាក់ឪពុកនិងកូនស្លាប់នៅនឹងកន្លែងកើតហេតុតែម្ដង ។ ចំណែកអ្នកបើកបររថយន្តបានរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ ។
ក្រោយពេលកើតហេតុ សពជនរងគ្រោះទាំង២នាក់ឪពុកនិងកូនត្រូវបានកំលាំងជំនាញ ប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី។ ចំពោះរថយន្ត និងម៉ូតូត្រូវបានកម្លាំងជំនាញយកទៅរក្សាទុកនៅអធិការដ្ឋាននគបាលស្រុក ដើម្បីកសាងសំណុំរឿងតាមនីតិវិធីច្បាប់៕
ចែករំលែកព័តមាននេះ