ខេត្តកំពង់ឆ្នាំង ៖ ត្រាក់ទ័រចំនួន១៣គ្រឿង ក្នុងចំណោម១៤គ្រឿង (១គ្រឿងចាប់ហើយលែងវិញ) ត្រូវបានសមត្ថកិច្ច និងមន្ត្រីជំនាញជលផលបានចាប់ជា បន្តបន្ទាប់ក្នុងរយៈពេលរដូវប្រាំងកន្លងទៅនេះ ហើយត្រាក់ទ័រទាំងនោះត្រូវបានរក្សាទុកនៅសាលាស្រុក និងអធិការដ្ឋាន នគរបាលស្រុកកំពង់លែង ដើម្បីចាត់ការតាមផ្លូវច្បាប់ ។ ដែលនេះសបញ្ជាក់ថា បទល្មើសលួចឈូសឆាយដីព្រៃលិចទឹក ក្នុងភូមិសាស្ត្រស្រុកកំពង់លែង នៅតែមានសកម្មភាព ឥតឈប់ឈរពី១ឆ្នាំទៅ១ឆ្នាំ បើទោះបីមានការទប់ស្កាត់ពីអាជ្ញាធរ និងមន្ត្រីជំនាញយ៉ាងណាក្តី ។
ក្នុងករណីបង្ក្រាបត្រាក់ទ័រ ដែលតែងតែលួចចូលឈូសឆាយដីព្រៃលិចទឹកនេះដែរ លោក លី ឡា ខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានអោយដឹងនៅរសៀលថ្ងៃទី៣ ខែមិថុនានេះថា ត្រាក់ទ័រទាំង១៣គ្រឿងនេះ ត្រូវបានសមត្ថកិច្ចនគរបាលសហការជាមួយមន្ត្រីជំនាញជលផលធ្វើការចាប់ឃាត់ជាបន្តបន្ទាប់ ក្នុងរដូវប្រាំងកន្លងទៅនេះ ។
ការបង្ក្រាបនេះបានធ្វើឡើងនៅ ឃុំច្រណូក ឃុំដារ ឃុំស្វាយរំពារ ឃុំសំរោងសែន និងឃុំមួយចំនួនទៀត ក្នុងភូមិសាស្ត្រ ស្រុកកំពង់លែង ដែលមានព្រៃលិចទឹកដូចជា ចំណុចគោកព្រះ ព្រំប្រទល់ខេត្តកំពង់ធំជាដើម ។ លោកបានបញ្ជាក់ថា ក្នុងចំណោមត្រាក់ទ័រទាំងនោះមាន១០ គ្រឿងត្រូវបានចាប់មុនពេលមានវិធានការដាក់ស្លាកលេខសម្គាល់លើត្រាក់ទ័រនីមួយៗ ។ ចំណែក៣គ្រឿងទៀតត្រូវបានចាប់ បន្ទាប់ពីបានដាក់ស្លាកលេខសម្គាល់រួច ។
នាយខណ្ឌរដ្ឋបាលជលផលរូបនោះបានបញ្ជាក់ពីមូលហេតុនៃការដាក់ស្លាកលេខសំគាល់នេះថា គឺដោយសារមានការស្នើសុំពីប្រជាពលរដ្ឋ ក្នុងស្រុកកំពង់លែង ដើម្បីដាក់ត្រាក់ទ័រឈូសឆាយពង្រាបដីស្រែរបស់ពួកគាត់ ហើយអាជ្ញាធរ បានអនុញ្ញាត្តិ តែទន្ទឹមនេះអាជ្ញាធរខេត្តបានបង្កើតគណៈកម្មការចម្រុះច្រើនក្រុម ដើម្បីតាមឃ្លាំមើលការងារឈូសឆាយដីស្រែរបស់ពួកគាត់ ដែលបានស្នើសុំនេះ ។ ដោយហេតុនេះហើយទើបអាជ្ញាធរ ដាក់លេខសំគាល់តាមត្រាក់ទ័រទាំងនោះក្នុងគោលបំណងគ្រប់គ្រងត្រាក់ទ័រអោយបានច្បាស់លាស់ ព្រោះត្រាក់ទ័រនីមួយៗ មានលេខសំគាល់ងាយស្រួលចំណាំ ត្រាក់ទ័រនៅតំបន់ណា គឺនៅភូមិសាស្ត្រនោះ មិនអាចឆ្លងពីឃុំមួយទៅឃុំមួយបានទេ ម្យ៉ាងវិញទៀតការពារក្រែងពួកគាត់ឈូសហួសគោលដៅដែលបានស្នើសុំដោយទៅបំពានព្រៃលិចទឹកបន្ថែម ។
ជាក់ស្តែង ដូចត្រាក់ទ័រដែលមានលេខសំគាល់ ទាំង៣គ្រឿង គឺចាប់ដោយសង្ស័យថា បានឈូសហួសដែនកំណត់ដែលបានស្នើសុំ ។ ប្រភពពីខាងក្រៅបានអោយដឹងថា ក្នុងស្រុកកំពង់លែង បច្ចុប្បន្នមានត្រាក់ទ័រមិនតិចជាង១រយគ្រឿងទេ ដែលកំពុងមានសកម្មភាពឈូសឆាយដី ស្របច្បាប់ និងដីព្រៃលិចទឹកខុសច្បាប់ក្នុងនោះក៏មានមេឃុំ មួយរូបកំពុងរត់ការត្រាក់ទ័រអោយឈូសឆាយដី៣ទៅ៤គ្រឿងផងដែរ ។ ហើយករណីនេះប្រជាពលរដ្ឋដែលជិតស្និត និងការងាររត់ការដាក់ត្រាក់ទ័រអោយឈួសពង្រាបដីស្រែរបស់ប្រជាពលរដ្ឋ គឺខ្លះឈួសដីស្រែមែន ប៉ុន្តែខ្លះបន្លំឈូសបំពានដីព្រៃលិចទឹកជាប់ក្បាលស្រែពីមួយឆ្នាំទៅមួយឆ្នាំម្តងបន្តិចៗរហូតបានដី២-៣ ហិកតា ដូចជា ដីព្រៃលិចទឹកនៅចំណុចគោកព្រះ ព្រំប្រទល់កំពង់ធំ បានក្លាយជាដីស្រែយ៉ាងល្វឹងល្វឺយទៅហើយ ៕ កែសម្រួលដោយ ៖សុឃាក់
ចែករំលែកព័តមាននេះ