រាជធានីភ្នំពេញ ៖ បុរសជាជាងបៀក និងបាញ់ថ្នាំផ្ទះម្នាក់ត្រូវបានចរន្តអគ្គីសនីឆក់បណ្ដាលឲ្យរងរបួសធ្ងន់និងបុរស២នាក់ទៀតរងរបួសស្រាល ខណៈដែលជនរងគ្រោះទាំងនោះលើកដែករន្ទាដើម្បីដាក់តឡើងឈរបៀកថ្នាំជញ្ជាំងផ្ទះមួយកន្លែងកៀកនឹងខ្សែកាប្លិ៍ ស្របពេលអគ្គិសនីដែលមានតង់ស្យុងខ្ពស់ ជាអកុសលដែកបានប៉ះជាមួយខ្សែកាប្លិ៍នោះបណ្ដាលឲ្យឆ្លងចរន្តផ្ទុះឆេះរងរបួស និងបង្កឲ្យមានការភ្ញាក់ផ្អើល កាលពីវេលាម៉ោង១០និង៣០នាទីព្រឹកថ្ងៃទី៣ ខែមិថុនា ឆ្នាំ២០១៩ នៅក្នុងការដ្ឋានសំណង់ផ្ទះល្វែងចិន ដែលមានទីតាំងស្ថិតនៅតាមបណ្ដោយផ្លូវ២០០៤ ភូមិតាងួន សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
បន្ទាប់ពីកើតហេតុ ជនរងគ្រោះត្រូវបានមិត្តភក្តិរួមការងារបញ្ជូនទៅកាន់មន្ទីរពេទ្យបង្អែកពោធិ៍ចិនតុង ប៉ុន្តែដោយសារតែរបួសធ្ងន់ធ្ងរពេក ទើបបញ្ជូនបន្តទៅកាន់មន្ទីរពេទ្យព្រះកុសុមៈនាព្រឹកដដែលនោះវិញ។
តាមប្រភពពីមិត្តភក្តិរួមការងារបានប្រាប់ឲ្យដឹងថា បុរសរងគ្រោះខាងលើឈ្មោះឡុង ណារិន អាយុ២៦ឆ្នាំមុខរបរជាងបៀកថ្នាំ មានស្រុកកំណើតនៅក្នុងឃុំចំណាលើ ស្រុកស្ទោង ខេត្តកំពង់ធំ ហើយជនរងគ្រោះទើបតែមកធ្វើការនៅទីនោះបានរយៈពេល៥ថ្ងៃប៉ុណ្ណោះក៏ស្រាប់តែជួបគ្រោះថ្នាក់បែបនេះតែម្ដង។
តាមប្រភពដដែលបានបន្តថា នៅមុនពេលកើតហេតុ បុរសរងគ្រោះខាងលើបានលើកដែកដើម្បីដាក់តរន្ទាឡើងឈរលើរន្ទារបៀក និងបាញ់ថ្នាំជញ្ជាំងផ្ទះដែលកំពុងសាងសង់កៀកនឹងខ្សែកាប្លិ៍មានចម្ងាយប្រមាណតែកន្លះម៉ែត្រប៉ុណ្ណោះ ។ ជាអកុសលដែកដែលគាត់លើកទៅនោះបានប៉ះជាមួយខ្សែកាប្លិ៍ស្រាតដែលមានតង់ស្យុងខ្ពស់ បង្កឲ្យឆ្លងចរន្តផ្ទុះឆេះជនរងគ្រោះ បណ្ដាលឲ្យរងរបួសរលាករលួយស្បែកធ្ងន់ធ្ងរ និងអ្នករួមការងារ២នាក់ទៀតរងរបួសស្រាល។
ក្រោយពេលកើតហេតុ ភ្លាមៗកម្លាំងនគរបាលប៉ុស្តិ៍កាកាប១ និងនគរបាលខណ្ឌពោធិ៍សែនជ័យបានចុះទៅធ្វើការត្រួតពិនិត្យកន្លែងកើតហេតុ ចំណែកជនរងគ្រោះត្រូវបានមិត្តភក្តិរួមការងារបញ្ជូនទៅកាន់មន្ទីរពេទ្យបង្អែកពោធិ៍ចិនតុង ប៉ុន្តែដោយសារតែរបួសធ្ងន់ធ្ងរពេក ទើបបញ្ជូនបន្តទៅកាន់មន្ទីរពេទ្យព្រះកុសុមៈនាព្រឹកដដែលនោះវិញ។
ដោយឡែកប្រភពមួយទៀតបាននិយាយថា សំណង់ផ្ទះខាងល្វែងខាងលើនោះគឺជាសំណង់របស់ជនជាតិចិន ដែលបានសាងសង់កៀកបំផុតទៅនឹងខ្សែកាប្លិ៍ ខុសបទដ្ឋានបច្ចេកទេសល្មើសទៅនឹងក្បួនខ្នាតរបស់ជំនាញអគ្គីសនី ដោយមានគម្លាតពីខ្សែកាបតង់ស្យុងខ្ពស់នោះមិនដល់១ម៉ែត្រផង ។ ហេតុនេះហើយទើបបង្កឲ្យមានគ្រោះថ្នាក់កើតឡើងបែបនេះ ដូច្នេះអាជ្ញាធរមូលដ្ឋានគួរតែពិនិត្យមើលផងដើម្បីចៀសវាងមានគ្រោះថ្នាក់ជាបន្តបន្ទាប់ទៀត៕ (កែសម្រួលដោយ ៖ ធីតា)
ចែករំលែកព័តមាននេះ