រាជធានីភ្នំពេញ ៖ ស្ត្រីម្នាក់សង្ឃ័យស្រវឹងស្រាថ្នាំហើយតូចចិត្តរឿងសុំលុយចំនួន១០ដុល្លារពីបុរសជាគូស្នេហ៍ មិនបាន ក៏សំរេចចិត្តចង.ករួចធ្វើឲ្យដាច់ខ្សែធ្លាក់ស្លាប់ ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៥នឹង៣០នាទីល្ងាចថ្ងៃទី២ ខែមិថុនា ឆ្នាំ២០១៩ នៅក្នុងបន្ទប់ជួលមួយកន្លែង ស្ថិតក្នុងភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ។
ជនរងគ្រោះដែលស្លាប់ឈ្មោះ កែវ គ្រឹស្នា ភេទស្រី អាយុ៣៣ឆ្នាំ មុខរបរនៅផ្ទះ មានស្រុកកំណើតនៅខេត្តតាកែវ មានប្តីមិនទាន់រៀបការឈ្មោះ មឿន រ៉ាវី អាយុ៣៣ឆ្នាំ មុខរបរកម្មករសំណង់ ស្នាក់នៅបន្ទប់ជួលកើតហេតុខាងលើ មានស្រុកកំណើតនៅភូមិធ្នង់ ឃុំស្មោងខាងជើង ស្រុកកំចាយមាស ខេត្តព្រៃវែង ។
បើតាមប្រភពពីបុរសជាគូស្នេហ៍របស់ស្ត្រីរងគ្រោះឈ្មោះ មឿន រ៉ាវី ដែលរស់នៅជាមួយគ្នាដូចប្តីប្រពន្ធ បាននិយាយថា គាត់និងស្ត្រីរងគ្រោះមានទំនាក់ទំនងស្នេហាជាមួយគ្នាជាង៨ខែមកហើយ គាត់ជាបុរសពោះម៉ាយ មានកូនប្រុសម្នាក់រស់នៅស្រុកកំណើតរបស់គាត់ ចំណែកស្ត្រីរងគ្រោះជាស្ត្រីមេម៉ាយមានកូនស្រីភ្លោះ២នាក់ ហើយកូនរបស់នាងរស់នៅជាមួយបងស្រីរបស់នាងនៅម្តុំផ្លូវ២០០៤ ភូមិត្រពាំងល្វា សង្កាត់កាកាបទី១ ខណ្ឌពោធិ៍សែនជ័យ។
តាមប្រភពដដែលបានបញ្ជាក់បន្តថា ពួកគាត់ទាំង២នាក់បានស្រលាញ់គ្នា ហើយរស់នៅជាមួយគ្នាមិនបានរៀបការ ឬសែនព្រេនត្រឹមត្រូវឡើយ ហើយឪពុកម្ដាយទាំងសងខាងក៏មិនទាន់បានដឹងនៅឡើយដែរ សូម្បីតែទូរស័ព្ទក៏ពួកគាត់ទាំង២មិនមានប្រើដែរ ដោយសារជីវភាពទីទាល់ក្រ ។
តាមប្រភពដដែលបានបញ្ជាក់បន្តទៀតថា នៅមុនពេលកើតហេតុហេតុ ស្ត្រីរងគ្រោះបានខ្ចីទូរស័ព្ទរបស់អ្នកជិតខាងដើម្បីទាក់ទងទៅបងស្រីនៅម្តុំផ្លូវ២០០៤ ភូមិត្រពាំងល្វា តែបងស្រីរបស់ស្ត្រីរងគ្រោះខឹងមិននិយាយស្ដី ហើយបន្ទាប់មកស្ត្រីរងគ្រោះបានសុំលុយគាត់ចំនួន១០ដុល្លារដើម្បីទៅសួរបងស្រីដែលរស់នៅផ្លូវ២០០៤ ដើម្បីសួរហេតុផល តែនៅពេលនោះ គាត់អត់មានលុយ ព្រោះមិនទាន់បើកលុយ ហើយស្ត្រីខាងលើបាននិយាយថា «គ្រាន់តែលុយ១០ដុល្លារសោះ សុំមិនបានដែរ» ។ លុះពេលហូបបាយថ្ងៃត្រង់ហើយ គាត់ចេញទៅធ្វើការបាត់ ចំណែកស្ត្រីរងគ្រោះបានផឹកស្រាថ្នាំហើយតូចចិត្តក៏ដាច់ចិត្តចងកសម្លាប់ខ្លួន ដោយយកក្រែមសរសេរបណ្តាំនៅលើឥដ្ឋការ៉ូក្នុងបន្ទប់ ហើយចាក់សោពីខាងក្នុងបន្ទប់ផងដែរ។
តាមប្រភពដដែលបានបន្តទៀតថា លុះដល់វេលាកើតហេតុខាងលើ ពេលគាត់ត្រឡប់មកពីធ្វើការវិញ ដោយឃើញបន្ទប់ជាប់សោពីខាងក្នុង ពេលនោះគាត់បានគាស់បង្អួច ហើយស្ត្រីម្នាក់នៅបន្ទប់ក្បែរនោះបានឃើញស្ត្រីរងគ្រោះដួលនៅលើឥដ្ឋការ៉ូ ដោយសង្ស័យថា ស្ត្រីរងគ្រោះបានចងកសម្លាប់ខ្លួន ព្រោះឃើញខ្សែជាប់នៅឥដ្ឋខ្យល់ រួចក៏នាំគ្នាផ្អើលឆោឡោ និងប្តឹងសមត្ថកិច្ចអោយចុះមកពិនិត្យកន្លែងកើតហេតុភ្លាមៗផងដែរ។
ក្រោយពេលកើតហេតុ សមត្ថកិច្ចជំនាញបានធ្វើកោសល្យវិច័យ និងបានឱ្យដឹងថា ស្ត្រីរងគ្រោះខាងលើស្លាប់ដោយសារចងក ហើយដាច់ខ្សែធ្លាក់មកក្រោមស្លាប់តែម្ដង។ បន្ទាប់ពីពិនិត្យរួច សមត្ថកិច្ចជំនាញមិនបានប្រគល់សពអោយទៅបុរសដែលជាគូស្នេហ៍នោះឡើយ ដោយសមត្ថកិច្ចបានយកសពស្ត្រីរងគ្រោះខាងលើយកទៅតម្កល់ទុកនៅវត្តពោធិ៍ចិនតុង រង់ចាំបងប្អូន និងសាច់ញាតិពិតប្រាកដមកទទួលយក ទើបសមត្ថកិច្ចប្រគល់ឱ្យ ៕ (កែសម្រួលដោយ ៖ ធីតា)
ចែករំលែកព័តមាននេះ