សហរដ្ឋអាមេរិក-ចិន ៖ សហរដ្ឋអាមេរិកកាលពីថ្ងៃទី១មិថុនា បានអំពាវដល់ចិនឲ្យបញ្ឈប់ រំលោភបំពានអធិបតេយ្យភាពរបស់បណ្ដាប្រទេសជិតខាង ហើយព្រមានថាខ្លួននឹងវិនិយោគយ៉ាងច្រើនមហិមា ក្នុងរយៈពេល៥ឆ្នាំខាងមុខ ដើម្បីថែរក្សាឧត្ដមភាពយោធាក្នុងតំបន់។ នៅឯវេទិកាអន្តរជាតិស្ដីពីសន្តិសុខនៅសិង្ហបុរី លោកPATRICK…
សហរដ្ឋអាមេរិក-ចិន ៖ សហរដ្ឋអាមេរិកកាលពីថ្ងៃទី១មិថុនា បានអំពាវដល់ចិនឲ្យបញ្ឈប់ រំលោភបំពានអធិបតេយ្យភាពរបស់បណ្ដាប្រទេសជិតខាង ហើយព្រមានថាខ្លួននឹងវិនិយោគយ៉ាងច្រើនមហិមា ក្នុងរយៈពេល៥ឆ្នាំខាងមុខ ដើម្បីថែរក្សាឧត្ដមភាពយោធាក្នុងតំបន់។
នៅឯវេទិកាអន្តរជាតិស្ដីពីសន្តិសុខនៅសិង្ហបុរី លោកPATRICK SHANAHANរដ្ឋមន្ត្រីការពារប្រទេសស្ដីទីអាមេរិកថ្លែងថា ចិនអាចនិងត្រូវតែមានទំនាក់ទំនងសហប្រតិបត្តិការជាមួយ ប្រទេសឯទៀតៗក្នុងតំបន់។ ប៉ុន្តែឥរិបថដែលប៉ះពាល់ដល់អធិបតេយ្យភាពរបស់បណ្ដាប្រជាជាតិជិតខាង ហើយដែលសាបព្រោះការមិនទុកចិត្តចំពោះចេតនារបស់ចិនត្រូវតែបញ្ឈប់។ យើងនឹងមិនអាចធ្វើមិនដឹងមិនឮចំពោះឥរិយាបថចិនឡើយ។
វេទិកានៅសិង្ហ្បុរីស្ដីពីសន្តិសុខហៅSHANGRI LA DIALOGUE ជាវេទិកានៃការតស៊ូដណ្ដើមឥទ្ធិពលគ្នារវាងចិននិងអាមេរិក នៅអាសីុប៉ាសីុហ្វិក។ សហរដ្ឋអាមេរិកតែងចោទប្រកាន់ចិនជាពិសេសថា បានធ្វើយោធូបនីយកម្មលើប្រជុំកោះជាច្រើននៃសមុទ្រចិនខាងត្បូង ដែលទាមទារដោយតៃវ៉ាន់ ព្រុយណេ ម៉ាឡេសីុ ហ្វ៊ីលីពីននិងវៀតណាម។ អាមេរិកតែងធ្វើជាញឹកញាប់ប្រតិបត្តិការ ហៅសេរីភាពនៃការធ្វើនាវាចរណ៍ ក្នុងមហាសមុទ្រប៉ាសីុហ្វិក ដោយបញ្ជូនបណ្ដាយន្តហោះចម្បាំងឲ្យហោះហើរកាត់លើដែនអាកាសអន្តរជាតិ ឬដោយបញ្ជូននាវាចម្បាំងមកជិតប្រជុំកោះដែលមានជម្លោះ ក្នុងច្រកសមុទ្រតៃវ៉ាន់។
លោកPATRICK SHANAHANបន្តថា គម្រោងថវិការបស់មន្ទីរប៉ង់តាហ្គោន គ្រោងចំណាយក្នុងការស្រាវជ្រាវនិងការអភិវឌ្ឍន៍ក្នុងតំបន់ឥណ្ឌូ-ប៉ាស៊ីហ្វិក ប្រមាណជា១០៤ពាន់លានដុល្លារ។ លោកថាមន្ទីរប៉ង់តាហ្គោននឹងវិនិយោគច្រើនរយៈពេល៥ឆ្នាំខាងមុខនេះ ក្នុងកម្មវិធីសំខាន់ៗ សម្រាប់តំបន់ឥណ្ឌូ-ប៉ាសីុហ្វិកមួយដែលមានស្ថេរភាពនិងមានភាពប្រាកដនិយម។ លោកលើកជាពិសេសពីគម្រោងការពារប្រឆាំងមីសីុល ជាវិស័យដែលក្រុងប៉េកាំងបានវិនិយោគយ៉ាងច្រើនរយៈពេលប៉ុន្មានឆ្នាំចុងក្រោយនេះ៕ (កែសម្រួលដោយ ៖ បុប្ផា)
ចែករំលែកព័តមាននេះ