សហរដ្ឋអាមេរិក ៖ ក្នុងសន្និសីទសារព័ត៌មានមួយ ជនរងគ្រោះទាំង១២នាក់ត្រូវបានបង្ហាញអត្តសញ្ញាណ កាលពីថ្ងៃទី១មិថុនា ដោយអាជ្ញាធរ ក្រុងVIRGINIA BEACH រដ្ឋវៀរជីនៀ ដោយនាឱកាសនោះគេបានបញ្ចាំងរូបថតអ្នកទាំងនេះលើអេក្រង់មួយ។
នាថ្ងៃទី១មិថុនាប្រជាជនក្រុងVIRGINIA BEACH បាននាំគ្នាទៅគោរពវិញ្ញាណក្ខ័ន្ធមនុស្សទាំង១២នាក់ ដែលត្រូវស្លាប់កាលពីថ្ងៃទី៣១ឧសភា ដោយសារការបាញ់ប្រហារដ៏សែនទារុណមួយ ពីសំណាក់និយោជិតក្រុងនោះម្នាក់ ហើយទាមទារកុំឲ្យសោកនាដកម្មបៀបនេះកើតមានទៀត។ ពួកអ្នកសើុបអង្កេតប៉ុនប៉ងកំណត់ពីមូលហេតុនៃការបាញ់ប្រហារនេះ។ រូបរបស់ជនរងគ្រោះត្រូវបានបង្ហាញតាមអេក្រង់បន្តបន្ទាប់គ្នា អមនឹងប្រវត្តិរូបសង្ខេបរបស់ពួកគេ។
ក្នុងចំណោមជនរងគ្រោះទាំង១២នាក់ មាននារី៥នាក់និងបុរស៧នាក់ សុទ្ធតែជានិយោជិតសាលាក្រុងVIRGINIA BEACH ដូចខ្មាន់កាំភ្លើងដែរលើកលែងតែម្នាក់ប៉ុណ្ណោះ។ ទីក្រុងកម្សាន្តមាត់សមុទ្រនោះដែលមានប្រជាជន៤៥០.០០០នាក់ ស្ថិតនៅភាគខាងត្បូងក្រុងវ៉ាសិុនតោន ដែលនៅទីនោះក៏មានមូលដ្ឋានកងម៉ារីនអាមេរិកសំខាន់មួយផងដែរ។
អាជ្ញាធរមូលដ្ឋានកាលពីថ្ងៃទី១មិថុនា បានកំណត់អត្តសញ្ញាណខ្នាន់កាំភ្លើងដែលត្រូវប៉ូលិសបាញ់ស្លាប់។ ជននោះមានឈ្មោះថាDEWAYNE CRADDOCK ជាបុរសអាយុប្រមាណជា៤០ឆ្នាំម្នាក់ ធ្វើការក្នុងសាលាក្រុងនេះប្រមាណជា១៥ឆ្នាំមកហើយ ខាងផ្នែកសាធារណៈការ។ រូបគេជាអតីតទាហានម្នាក់នៃកងទ័ពអាមេរិក។ នាវេលាម៉ោងប្រមាណជា១៦ម៉ោងក្នុងស្រុក ជននេះបានចូលក្នុងអគារសាលាក្រុងVIRGINIA BEACH មុនពេលបាញ់ប្រហារទាំងងងឹតងងុល នៅតាមជាន់នានាលើមនុស្សម្នាដែលប្រទះឃើញ។
បន្ទាប់មកជននេះបានបាញ់តតាំងជាមួយកងកម្លាំងប៉ូលិស ដែលលើកមកដល់ប៉ុន្មាននាទីក្រោយមក ហើយរូបគេត្រូវប៉ូលិសបាញ់ស្លាប់។ នេះជាការអះអាងរបស់លោកJAMES CERVERAប្រមុខប៉ូលិសក្រុងVIRGINIA BEACH។ ក្រៅពីអ្នកស្លាប់មនុស្ស៣នាក់ទៀតរងរបួសធ្ងន់ ហើយស្ថិតក្នុងស្ថានភាពធ្ងន់ធ្ងរ រួចអ្នករបួសម្នាក់ទៀតពុំមានអ្វីគួរឲ្យបារម្ភឡើយ។
ហើយប្រធានាធិបតីអាមេរិក លោកដូណាល់ត្រាំក្នុងសេចក្ដីប្រកាសមួយ បញ្ជាឲ្យបង្ហូតទង់ជាតិត្រឹមពាក់កណ្ដាលដង រហូតដល់ថ្ងៃទី៤មិថុនានៅសេតវិមាន និងលើគ្រប់អគាររដ្ឋនិងយោធារបស់ប្រទេស៕ (កែសម្រួលដោយ ៖ បុប្ផា)
ចែករំលែកព័តមាននេះ