រាជធានីភ្នំពេញ ៖ វៀតណាមបានស្នើដល់កម្ពុជាជួយគាំពារដល់ជនអន្តោប្រវេសន៍ខុសច្បាប់របស់ខ្លួន ដែលកំពុងរស់នៅកម្ពុជា ខណៈដែលរាជរដ្ឋាភិបាលបានកំពុងធ្វើការបំលាស់ទីជនជាតិវៀតណាមដែលរស់នៅក្នុងបឹងទន្លេសាបខេត្តកំពង់ឆ្នាំង ។ នេះបើតាមលោក ឈាង វុន ។…
រាជធានីភ្នំពេញ ៖ វៀតណាមបានស្នើដល់កម្ពុជាជួយគាំពារដល់ជនអន្តោប្រវេសន៍ខុសច្បាប់របស់ខ្លួន ដែលកំពុងរស់នៅកម្ពុជា ខណៈដែលរាជរដ្ឋាភិបាលបានកំពុងធ្វើការបំលាស់ទីជនជាតិវៀតណាមដែលរស់នៅក្នុងបឹងទន្លេសាបខេត្តកំពង់ឆ្នាំង ។ នេះបើតាមលោក ឈាង វុន ។
លោកឈាង វុន ប្រធានគណៈកម្មការអន្តរជាតិសហប្រតិបត្តិការឃោសនា និងព័ត៌មានរដ្ឋសភាបានឲ្យដឹងក្នុងសន្និសិទ្ធសារព័ត៌មាន កាលពីថ្ងៃទី០១ ខែមិថុនានេះ នៅព្រលានយន្តហោះអន្តរជាតិភ្នំពេញថា ក្នុងជំនួបពិភាក្សាភាគីរវាងសម្តេច ហេង សំរិន ប្រធានរដ្ឋសភាកម្ពុជាជាមួយប្រធានរដ្ឋសភាវៀតណាម ភាគីបានស្នើដល់កម្ពុជាជួយសម្រួលដល់ជនអន្តោរប្រវេសន៍វៀតណាមខុសច្បាប់ ដែលកំពុងរស់នៅកម្ពុជាផងដែរ ។ លោកបន្តថា ក្នុងជំនួបនោះដែរប្រធានសភាទាំងពីរក៏បានពិភាក្សាពីបញ្ហាឆ្លងដែនរបស់ប្រជាពលរដ្ឋកម្ពុជាទៅវៀតណាមហើយពលរដ្ឋវៀតណាមមកកម្ពុជាផងដែរ ។ ដែលសំដៅឲ្យមានការសម្រួលគ្នាក្នុងន័យសេដ្ឋកិច្ចដូចជា ដឹកនាំទិញជាដើម ។
លោកបញ្ជាក់ថា ៖«ចំណុចសំខាន់មួយពាក់ព័ន្ធពលរដ្ឋវៀតណាមមករស់នៅកម្ពុជាកន្លងមកទៅដែលរាជរដ្ឋាភិបាលកម្ពុជាកំពុងតែធ្វើការផ្ទេរលំនៅឋានចេញពីបឹងទន្លេសាបមករស់នៅលើដីគោកផងដែរ» ។ លោកថា ក្នុងជំនួបនោះភាគីវៀតណាមបានស្នើឲ្យប្រធានរដ្ឋសភាធ្វើយ៉ាងណាឲ្យការផ្ទេរពលរដ្ឋវៀតណាមនេះឲ្យបានសមស្រប និងដោយរលូន ហើយភាគីបានវៀតណាមក៏បានលើកឡើងថា វៀតណាមត្រៀមខ្លួនក្នុងជួយកម្ពុជានូវចំណុចខ្វះខាតផងដែរ ។ ចំពោះការស្នើសុំរបស់ភាគីវៀតណាមស្នើសុំពាក់ព័ន្ធនឹងជនជាតិវៀតណាមនេះដែរ ជាការឆ្លើយតបសម្តេចហេង សំរិន បានលើកឡើងថា ការអនុវត្តពេលនេះកម្ពុជានឹងធ្វើតាមច្បាប់ របស់កម្ពុជា ហើយរាជរដ្ឋាភិបាលកំពុងធ្វើ ហើយចំពោះការអនុវត្ត គឺមិនមានករណីពិសេស ណាមួយទេ ចំពោះជនអន្តោប្រវេសន៍ដែលរស់នៅកម្ពុជាទាំងវៀតណាម និងជនជាតិផ្សេងៗទៀត ។ នេះបើតាមលោកឈាង វុន ។
លោកឈាង វុន ក៏បានលើកឡើងថា ក្នុងជំនួបនោះដែរភាគីវៀតណាមក៏បានលើកឡើង ដោយស្នើឲ្យកម្ពុជាគាំពារឲ្យបានល្អចំពោះជនជាតិវៀតណាម ដែលរស់នៅកម្ពុជាដែលខុសច្បាប់កន្លងទៅនេះ ហើយមានមួយចំនួនត្រូវបានដកទុកអត្តសញ្ញាដែលខុសច្បាប់ ដើម្បីឲ្យពួកគេស្នើសុំការស្នាក់នៅឡើងវិញ ជាអចិន្ត្រៃយ៍នោះបានធ្វើជាធម្មតា ។ លោកឈាង វុន បានប្រាប់សម្តេចប្រធានរដ្ឋសភាបញ្ជាក់ថា៖«យើងបានធ្វើដំណើរការនេះ ដោយរលូន មិនតែចំពោះជនជាតិរៀតណាមនោះទេ គឺធ្វើចំពោះជនបរទេសផ្សេងៗទៀត » ៕ កែសម្រួលដោយ ៖ សុឃាក់
ចែករំលែកព័តមាននេះ