ខេត្តបាត់ដំបង ៖ ជនមិនស្គាល់មុខដែលអាចមានបក្សពួកលើសពី២នាក់បានធ្វើសកម្មភាពគាស់ផ្ទះប្រជាពលរដ្ឋចូលលួចលុយ និងគ្រឿងអលង្ការអស់គ្មានសល់ទាំងកណ្ដាលថ្ងៃ ខណៈម្ចាស់ផ្ទះបិទទ្វារទុកចោលរវល់ទៅចំការ ដែលគេសន្និដ្ឋានថា អាចកើតឡើងនៅចន្លោះពីម៉ោង១២ថ្ងៃត្រង់ដល់ម៉ោង៥ល្ងាច ថ្ងៃទី០១ មិថុនា ស្ថិតក្នុងភូមិជ្រៃកោង…
ខេត្តបាត់ដំបង ៖ ជនមិនស្គាល់មុខដែលអាចមានបក្សពួកលើសពី២នាក់បានធ្វើសកម្មភាពគាស់ផ្ទះប្រជាពលរដ្ឋចូលលួចលុយ និងគ្រឿងអលង្ការអស់គ្មានសល់ទាំងកណ្ដាលថ្ងៃ ខណៈម្ចាស់ផ្ទះបិទទ្វារទុកចោលរវល់ទៅចំការ ដែលគេសន្និដ្ឋានថា អាចកើតឡើងនៅចន្លោះពីម៉ោង១២ថ្ងៃត្រង់ដល់ម៉ោង៥ល្ងាច ថ្ងៃទី០១ មិថុនា ស្ថិតក្នុងភូមិជ្រៃកោង សង្កាត់ស្លាកែត ក្រុងបាត់ដំបង។ នេះបើតាមសេចក្ដីរាយការណ៍របស់សមត្ថកិច្ច។
បើតាមមន្ត្រីអធិការក្រុងបាត់ដំបងនិយាយថា ករណីគាស់ទម្លុះទម្លាយលំនៅឋានខាងលើនេះ កើតឡើងនៅពេលម្ចាស់ផ្ទះបិទទ្វារទុកចោលហើយរវល់ទៅចំការ លុះត្រឡប់មកវិញពេលល្ងាចទើបបានដឹង និងប្ដឹងទៅសមត្ថកិច្ចឲ្យជួយអន្តរាគមន៍។ ម្ចាស់ផ្ទះរងគ្រោះឈ្មោះជា កុសល ភេទប្រុស អាយុ៣១ឆ្នាំ មុខរបរធ្វើចំការ រស់នៅក្នុងភូមិ-សង្កាត់ខាងលើ។
មន្ត្រីដដែលប្រាប់ថា មន្ត្រីជំនាញចុះទៅកន្លែងកើតហេតុភ្លាមៗដើម្បីត្រូតពិនិត្យ ។ បើតាមការពិនិត្យជាក់ស្ដែង ជនដៃដល់ចូលទៅក្នុងរបង រួចគាស់ទ្វារចូលទៅខាងក្នុងផ្ទះ ក្រោយមកគាស់ទ្វារបន្ទប់ខាងក្នុងទៀតរើកកកាយលួចយកលុយ និងគ្រឿងអលង្ការអស់គ្មានសល់ រួចគេចខ្លួនបាត់ ដែលគេសង្ស័យថាអាចមានបក្សពួកយ៉ាងតិច២នាក់។
បើតាមម្ចាស់ផ្ទះរងគ្រោះថា គាត់មិននៅផ្ទះទេ ដោយបិទទ្វារទុកចោល ហើយរវល់ទៅចំការ លុះត្រឡប់មកវិញនៅពេលល្ងាច ស្រាប់តែឃើញទ្វារផ្ទះត្រូវគេគាស់ផ្ដាច់ ថែមទាំងបាត់លុយនិងគ្រឿងអលង្ការអស់គ្មានសល់ ទើបមានការភ្ញាក់ផ្អើល ហើយក៏រាយការណ៏ប្ដឹងទៅសមត្ថកិច្ចតែម្ដង។ ជាមួយនឹងគ្នានេះ ជនរងគ្រោះប្រាប់សមត្ថកិច្ចអំពីទ្រព្យសមប្បត្តិដែលបាត់បង់រួមមាន លុយខ្មែរ៣០លានរៀល, លុយដុល្លារ១០០ដុល្លារ, ខ្សែ.ក១ខ្សែ និងបណ្ដោងប្លាទីនដាំត្បូងពេជ្រ១ មានតំលៃសរុប១,៧៦០ដុល្លារ, ចិញ្ចៀនប្លាទីនដាំត្បូងពេជ្រ១ មានតំលៃ៦០០ដុល្លារ, ខ្សែដៃប្លាទីន១ខ្សែ មានតំលៃ៨៥០ដុល្លារ និងខ្សែ.កមាស១ខ្សែ មានតំលៃ២,៧០០ដុល្លារ។
ជុំវិញករណីនេះ លោកឧត្តមសេនីយ៍ត្រី ជេត វណ្ណនី ស្នងការរងខេត្តមានប្រសាសន៍ថា ពិតជាមានការគាស់ទម្លុះទម្លាយលំនៅឋានចូលលួចទ្រព្យសម្បត្តិរបស់ប្រជាពលរដ្ឋមែន ហើយជនដៃដល់អាចមានបក្ស២នាក់ ទើបអាចធ្វើសកម្មភាពនេះបាន។ ប៉ុន្តែលោកមិនទាន់អាចធ្វើការសន្និដ្ឋានឲ្យជាក់លាក់ទេ អំពីការកំណត់មុខសញ្ញាជនសង្ស័យ តែលោកគ្រាន់តែបង្ហើបឲ្យដឹងខ្លះៗថា អាចជាក្រុមដែលធ្លាប់ប្រព្រឹត្តកន្លងមក ដែលមានមធ្យោបាយដឹកជញ្ជូនបក្សពួកទម្លាក់ឲ្យធ្វើសកម្មភាពនេះ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព៕ (កែសម្រួលដោយ ៖ បុប្ផា)
ចែករំលែកព័តមាននេះ