រាជធានីភ្នំពេញ ៖ បុរសម្នាក់ជាជនជាតិអាមេរិក កំពុងតែដើរសំដៅទៅសណ្ឋាគារ ស្រាប់តែមានជនសង្ស័យម្នាក់ជាភេទទី៣ ជិះម៉ូតូមកដល់ធ្វើសកម្មភាពឆក់ទូរស័ព្ទដៃបានសម្រេច ហើយត្រូវជនរងគ្រោះទាញដួលម៉ូតូចាប់បានប្រគល់ឱ្យសមត្ថកិច្ចប៉ុស្តិ៍ផ្សារកណ្តាល1ដើម្បីសួរនាំ បង្កឱ្យមានការភ្ញាក់ផ្អើលកាលពីម៉ោង2រំលងអធ្រាត្រឈានចូលថ្ងៃទី1 ខែមិថុនា ឆ្នាំ2019តាមបណ្តោយផ្លូវ១៥៤កែងផ្លូវ១៣ នៅចំណុចរបងតេ៣ចាស់ ស្ថិតក្នុងសង្កាត់ជ័យជំនះ ខណ្ឌដូនពេញ ។
សាក្សីឃើញបានឱ្យដឹងថា មុនកើតហេតុ គេឃើញបុរសជនរងគ្រោះម្នាក់ជាជនជាតិអាមេរិកមិនស្គាល់អត្តសញ្ញាណនោះទេ បានដើរតាមបណ្តោយផ្លូវ១៥៤ ពីកើតទៅលិច ខណៈពេល មកដល់ចំណុចកើតហេតុ ជនរងគ្រោះដើរបណ្តើរចុចទូរស័ព្ទដៃបណ្តើរ គោលបំណងទៅសណ្ឋាគារដែលគាត់ស្នាក់នៅ ។
ប្រភពដដែលបន្តថា ខណៈពេលនោះស្រាប់តែលេចមុខជនសង្ស័យម្នាក់ជាភេទទី3 ជិះម៉ូតូអាយខុន ពណ៌ទឹកក្រូច ពាក់ស្លាកលេខភ្នំពេញ 1CV5117 ជិះទៅជិតជនរងគ្រោះ រួចឆក់ទូរស័ព្ទដៃមិនស្គាល់ម៉ាកពីជនរងគ្រោះសម្រេច ហើយត្រូវជនរងគ្រោះទាញផ្តួលម៉ូតូ ទើបមានប្រជាពលរដ្ឋនាំគ្នាជួយចាប់វាយមួយដៃមួយជើង បណ្តាលឲ្យរងរបួសយ៉ាងដំណំ រួចហើយប្រគល់ឱ្យសមត្ថកិច្ចយកទៅសួរនាំនៅប៉ុស្តិ៍ផ្សារកណ្តាល១ ។ តែករណីខាងលើនេះ មិនមែនកើតហេតុនៅប៉ុស្តិ៍ផ្សារកណ្តាល1 ក៏ប្រគល់ជនសង្ស័យទៅប៉ុស្តិ៍ជ័យជំនះវិញ ដើម្បីចាត់ការតាមច្បាប់ ។
តាមចម្លើយរបស់ជនសង្ស័យបានសារភាពថា «ខ្លួនមិនបានឆក់ទូរស័ព្ទដៃនោះទេ គ្រាន់តែស្រវឹងស្រាជិះបុកជនរងគ្រោះ ហើយគាត់ចោទថា ចោរឆក់ទូរស័ព្ទដៃតែម្តង» ។ ក្រោយពេលកើតហតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍ជ័យជំនះ ដើម្បីឱ្យសមត្ថកិច្ចកសាងសំណុំរឿងបញ្ជូនទៅកាន់អធិការដ្ឋានដើម្បីចាត់ការទៅតាមនីតិវីធី ៕ (កែសម្រួលដោយ ៖ បុប្ផា)
ចែករំលែកព័តមាននេះ