គណៈប្រតិភូអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ ដឹកនាំដោយឯកឧត្តមបណ្ឌិត គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានអញ្ជើញទៅចូលរួមសន្និសីទសន្តិសុខតំបន់អាស៊ី-ប៉ាស៊ីហ្វិករបស់អង្គការគយពិភពលោក…
គណៈប្រតិភូអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ ដឹកនាំដោយឯកឧត្តមបណ្ឌិត គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានអញ្ជើញទៅចូលរួមសន្និសីទសន្តិសុខតំបន់អាស៊ី-ប៉ាស៊ីហ្វិករបស់អង្គការគយពិភពលោក ស្តីពី “គំនិតផ្តួចផ្តើមប្រឆាំងនឹងអំពើភេរវកម្ម” ចាប់ពីថ្ងៃទី២៨ ដល់ថ្ងៃទី៣០ ខែឧសភា ឆ្នាំ២០១៩ នៅទីក្រុងក្យូតូ ប្រទេសជប៉ុន ដោយមានការចូលរួមពីគណៈប្រតិភូគយនៃប្រទេសជាសមាជិករបស់អង្គការគយពិភពលោកនៅតំបន់អាស៊ីប៉ាស៊ីហ្វិក ព្រមទាំងតំណាងគយសហរដ្ឋអាមេរិក, ចក្រភពអង់គ្លេស អង្គការគយពិភពលោក និងអង្គការអន្តរជាតិមួយចំនួនដូចជា UNOCT (UN Office for Counter Terrorism), UNODC, IATA, INTERPOL ជាដើម។
សន្និសីទនេះប្រព្រឹត្តទៅក្រោមអធីបតីភាពរបស់លោក Kunio Mikuriya អគ្គលេខាធិការនៃអង្គការគយពិភពលោក និង លោក Motoya Nakae អគ្គនាយកគយនៃរដ្ឋបាលគយជប៉ុន។ ក្នុងសុន្ទរកថាបើក លោក Kunio Mikuriya បានលើកឡើងពីការវិវត្តន៍គំនិតផ្ដួចផ្ដើមសន្តិសុខរបស់ WCO ដែលបានចាប់ផ្តើមពីកម្មវិធីក្របខណ្ឌស្តង់ដាសន្តិសុខនៃខ្សែចង្វាក់ផ្គត់ផ្គង់ពាណិជ្ជកម្មអន្តរជាតិ, កម្មវិធីសន្តិសុខជាសកលនៃការដឹកជញ្ជូនទំនិញតាមផ្លូវសមុទ្រ ផ្លូវអាកាស និងផ្លូវគោក។ លោកក៏បានលើកឡើងបន្ថែមអំពីសេចក្ដីសម្រេចរបស់ក្រុមប្រឹក្សាសន្តិសុខនៃអង្គការសហប្រជាជាតិ និងកិច្ចប្រជុំ G7 ដែលបានអនុម័តកម្មវិធីពង្រឹងសន្តិសុខ និងប្រឆាំងភេរវកម្មនៅក្នុងពិភពលោក ហើយអង្គការគយពិភពលោកមានតួនាទីយ៉ាងសំខាន់ក្នុងការអនុវត្តសេចក្ដីសម្រេច និងកម្មវិធីទាំងនោះ។
ជាក់ស្ដែង នៅឆ្នាំ២០១៧ ដោយមានការឧបត្ថម្ភមូលនិធិដោយរដ្ឋាភិបាលជប៉ុន (ប្រមាណ៧.២៥ លានដុល្លារសហរដ្ឋអាមេរិក) អង្គការគយពិភពលោកបានចាប់ផ្តើមអនុវត្តគម្រោង “សន្តិសុខអាស៊ី-ប៉ាស៊ីហ្វិក” ដោយបានផ្ដល់ការហ្វឹកហ្វឺន បំពាក់ឧបករណ៍ និងការកសាងសមត្ថភាពដល់រដ្ឋបាលគយចូលរួមក្នុងគម្រោងនេះ។ លោកក៏បានសន្និដ្ឋានថា គម្រោងសន្តិសុខអាស៊ី-ប៉ាស៊ីហ្វិករបស់អង្គការគយពិភពលោក អាចទទួលបានជោគជ័យទៅបាន ទាល់តែមានការចូលរួមយ៉ាងសកម្មរបស់រដ្ឋបាលគយនៅក្នុងតំបន់អាស៊ី-ប៉ាស៊ីហ្វិក និងស្ថាប័នអន្តរជាតិពាក់ព័ន្ធផងដែរ។
ទន្ទឹមនេះ លោក Motoya Nakae អគ្គនាយកគយជប៉ុន ក៏បានថ្លែងសុន្ទរកថា ស្វាគមន៍អ្នកចូលរួមទាំងអស់ និងសម្តែងអំណរគុណចំពោះ WCO ដែលបានសហការរៀបចំសន្និសីទដ៏មានសារសំខាន់នេះឡើង ដើម្បីបូកសរុបលទ្ធផលការអនុវត្តគម្រោងផង និងចែករំលែក និងផ្លាស់ប្ដូរបទពិសោធន៍ក្នុងការអនុវត្តគម្រោង “សន្តិសុខអាស៊ី-ប៉ាស៊ីហ្វិក” នេះផង ។ លោកបានលើកឡើងថា តួនាទីរបស់គយក្នុងការពង្រឹងសន្តិសុខ និងប្រឆាំងភេរវកម្មកាន់តែលេចធ្លោ ហើយត្រូវបន្តពង្រឹង និងពង្រីកតួនាទីនេះថែមទៀតដើម្បីឆ្លើយតបនឹងការមិនថយចុះនៃអំពើភរវកម្ម។
លោកបន្តថា ប្រទេសជប៉ុននឹងធ្វើជាម្ចាស់ផ្ទះនៃសន្និសីទអន្តរជាតិ និងព្រឹត្តិការណ៍សំខាន់ៗមួយចំនួនដូចជាកិច្ចប្រជុំ G20 នៅខែមិថុនាខាងមុខនេះ និងកីឡាអូឡាំពិក នៅទីក្រុងតូក្យូ ក្នុងឆ្នាំ២០២០ ហើយបានគូសបញ្ជាក់ថាសន្និសីទស្ដីពីសន្តិសុខនេះ គឺជាឱកាសដ៏ប្រសើរក្នុងការពង្រឹងកិច្ចសហប្រតិបត្តិការរវាងរដ្ឋបាលគយ និងអង្គការអន្តរជាតិពាក់ព័ន្ធក្នុងការទប់ស្កាត់, ប្រយុទ្ធប្រឆាំងអំពើភេរវកម្ម និងការពារសន្តិសុខនៅក្នុងប្រទេស និងសកលលោក ។
អង្គសន្និសីទបានស្ដាប់បទបង្ហាញ និងពិភាក្សាយ៉ាងផុសផុលលើប្រធានបទសំខាន់ៗមួយចំនួន ដូចជា៖ ១) បរិយាកាសសន្តិសុខជាសកល ២) ការគម្រាមកំហែងសន្តិសុខ និងតួនាទីរបស់រដ្ឋបាលគយ ៣) ការតាមដាន និងផ្លាស់ប្ដូរពត៌មានសម្ងាត់នៃសកម្មភាពរបស់ភេរវករ ៤)ការបំបែកនូវខ្សែចង្វាក់ផ្គត់ផ្គង់គ្រឿងបន្សំអាវុធ/គ្រឿងបំផ្ទុះបម្រើសកម្មភាពភេរវកម្ម ៥)ការគ្រប់គ្រងនិងត្រួតពិនិត្យព្រំដែនដើម្បីពង្រឹងសន្តិសុខ និង ៦)ចក្ខុវិស័យសម្រាប់អនាគតនៃតួនាទីរបស់គយក្នុងការពង្រឹងសន្តិសុខ និងប្រឆាំងភរវកម្ម ជាដើម ។
ឯកឧត្តម គុណ ញឹម បានធ្វើបទបង្ហាញអំពីលទ្ធផល និងបទពិសោធន៍នៃការអនុវត្តគម្រោង “សន្តិសុខអាស៊ី-ប៉ាស៊ីហ្វិក” ដោយរដ្ឋបាលគយកម្ពុជា ។ ឯកឧត្តមបានលើកឡើងថា ក្នុងបរិបទនៃការគម្រាមកំហែងជាសកលដោយអំពើភរវកម្ម រដ្ឋបាលគយកម្ពុជាមិនត្រឹមតែខិតខំប្រមូលចំណូលពន្ធ និងអាករចូលថវិកាជាតិតែប៉ុណ្ណោះទេ, ការងារសន្តិសុខក៏ជាផ្នែកមួយដ៏សំខាន់ក្នុងសរសរស្ដមទាំងបួននៃយុទ្ធសាស្ត្រកែទម្រង់ និងទំនើបកម្មគយឆ្នាំ២០១៩-២០២៣ របស់គយកម្ពុជាផងដែរ ហើយការចូលរួមអនុវត្តគម្រោង “សន្តិសុខអាស៊ី-ប៉ាស៊ីហ្វិក” ក៏ជាផ្នែកមួយនៃការអនុវត្តកម្មវិធីការងារ “ពង្រឹងសន្តិសុខ” របស់គយកម្ពុជា ដែលការងារនេះតម្រូវឲ្យមានកិច្ចសហប្រតិបត្តិការទាំងក្នុងក្របខណ្ឌជាតិ តំបន់ និងអន្តរជាតិ ។
ទន្ទឹមនេះ ឯកឧត្តមក៏បានលើកឡើងអំពីកិច្ចខិតខំប្រឹងប្រែងរបស់ប្រទេសកម្ពុជាក្នុងការប្រយុទ្ធប្រឆាំងនឹងការសំអាតប្រាក់ និងហិរញ្ញប្បទានភេវរកម្ម ។ ជាក់ស្ដែងរាជរដ្ឋាភិបាលបានដាក់ចេញនូវ ’យុទ្ធសាស្ត្រជាតិស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ២០១៩-២០២៣” ដែលក្នុងនោះមានការងារជាច្រើនត្រូវអនុវត្តដោយរដ្ឋបាលគយកម្ពុជា ។ ឯកឧត្តមក៏បានបញ្ជាក់ថា ក្នុងនាមជាសមាជិកអង្គការគយពិភពលោក កម្ពុជាប្តេជ្ញាចិត្តខ្ពស់ក្នុងការបន្តចូលរួមក្នុងកម្មវិធីសន្តិសុខអន្តរជាតិនានា ក្នុងបរិបទនៃការទប់ស្កាត់ និងប្រឆាំងភេរវកម្ម ដើម្បីពង្រឹងសន្តិសុខជាតិ តំបន់ និងពិភពលោក ។
គួរបញ្ជាក់ថា ក្រោមគម្រោង “សន្តិសុខអាស៊ី-ប៉ាស៊ីហ្វិក” ក្រៅពីការបណ្ដុះបណ្ដាលជំនាញបច្ចេកទេសពាក់ព័ន្ធនឹងការទប់ស្កាត់អំពើភេរវកម្ម រដ្ឋបាលគយកម្ពុជាក៏បានទទួលឧបករណ៍/សម្ភារៈមួយចំនួនពីអង្គការគយពិភពលោក ហើយឧបករណ៍/សម្ភារៈទាំងនោះបានដាក់ឲ្យប្រើប្រាស់នៅមាត់ច្រកសំខាន់ៗមួយចំនួន។ (កែសម្រួលដោយ ៖ បុប្ផា)
ចែករំលែកព័តមាននេះ