រាជធានីភ្នំពេញ ៖ យុវជនម្នាក់ជាបងជីដូនមួយ និងយុវជនម្នាក់ទៀតជាប្អូនជីដូនមួយបានផឹកស្រាក្រឡុកអស់២ថូ នៅម្តុំផ្សារទំនើបមួយកន្លែង លុះស្រវឹងស្រឿងៗក៏ឱ្យគេគិតលុយ រួចអ្នកទាំងបានចាកចេញដោយជិះម៉ូតូម្នាក់មួយគ្រឿងតាមពីក្រោយគ្នាទៅរកទិញបាយហូប លុះពេលធ្វើដំណើរដល់ផ្លូវបំបែកជាបួន ស្រាប់តែជនរងគ្រោះដែលត្រូវជាបងជីដូនមួយនោះជិះម៉ូតូលឿនពេកបត់ឆ្វេងមិនបន្ថយល្បឿនក៏ជ្រុលទៅកៀរនឹងខឿនតាមចិញ្ចើមផ្លូវមុខសាលាមត្តេយ្យចតុមុខ បណ្ដាលអោយដួលបោកក្បាលស្លាប់ ក្រោយពេលបញ្ជូនទៅសង្គ្រោះនៅមន្ទីរពេទ្យ។
ហេតុការណ៍ខាងលើនេះដែលបានកើតឡើងកាលពីវេលាម៉ោង១១យប់ថ្ងៃទី៣១ ខែឧសភា នៅតាមបណ្តោយផ្លូវ៥១ កែងនឹងផ្លូវ២៤០ ទល់មុខនឹងសាលាមត្តេយ្យចតុមុខ សង្កាត់ចតុមុខ ខណ្ឌដូនពេញ។
ជនរងគ្រោះដែលស្លាប់ឈ្មោះ នី ជីមី ភេទប្រុស អាយុ២៣ឆ្នាំ ជាបុគ្គលិកសណ្ឋាគារ ស្នាក់នៅផ្ទះលេខ៤៩E ផ្លូវលេខ១១៨ សង្កាត់ផ្សារកណ្ដាលទី១ ខណ្ឌដូនពេញ ជាអ្នកបើកបរម៉ូតូមួយគ្រឿងម៉ាក ហុងដាធុនសេ១២៥ ស៊េរីឆ្នាំ២០១៦ ពាក់ស្លាកលេខ ភ្នំពេញ ១CK-១០៦៨ ។
តាមប្រភពព័ត៌មានពីប្អូនប្រុសជីដូនមួយរបស់ជនរងគ្រោះឈ្មោះ អេង ស៊ាវធាន បានប្រាប់អោយដឹងថា មុនកើតហេតុ គាត់និងបងជីដូនមួយ(ជនរងគ្រោះដែលស្លាប់)បាននាំគ្នាអង្គុយផឹកស្រាក្រឡុក អស់២ថូ ក្នុងហាងមួយកន្លែងនៅម្តុំផ្សារទំនើប លុះស្រវឹងស្រឿងៗក៏ឱ្យគេគិតលុយ រួចពួកគាត់ទាំង២នាក់ចេញទៅផ្ទះ វិញ។
តាមប្រភពដដែលបានបន្តថា ភ្លាមៗនោះជនរងគ្រោះប្រាប់ថា «ឃ្លានបាយទៅរកទិញបាយហូបសិន» បន្ទាប់មកពួកគាត់ក៏នាំគ្នាជិះម៉ូតូចេញមករៀងខ្លួន ដោយជនរងគ្រោះជិះម៉ូតូមួយគ្រឿងម៉ាកហុងដាឌ្រីម ចំណែកគាត់ជិះម៉ូតូមួយគ្រឿងម៉ាកស្គូពី ស៊េរីឆ្នាំ២០១៨ តែជនរងគ្រោះបើកបរម៉ូតូក្នុងល្បឿនលឿនចេញទៅមុន លុះគាត់ជិះម៉ូតូតាមពីក្រោយរហូតមកដល់ផ្លូវ២៤០ ក្នុងទិសដៅពីកើតទៅលិច មកដល់ផ្លូវបំបែកជាបួន ស្រាប់តែជនរងគ្រោះបានបត់ឆ្វេងចូលផ្លូវ៥១ យ៉ាងលឿនដោយមិនបន្ថយល្បឿនកាច់ចង្កូតមិនទាន់ បណ្ដាលអោយជ្រុលទៅកៀរនឹងឃឿនចិញ្ចើមផ្លូវនៅមុខសាលាមត្តេយ្យ បណ្ដាលអោយដួលម៉ូតូបោកជនរងគ្រោះនឹងថ្នល់រងរបួសធ្ងន់ធ្ងរសន្លប់ស្ដូកស្ដឹង ។
ភ្លាមៗនោះគាត់ក៏បានហៅរថយន្តសង្គ្រោះបន្ទាន់មកដឹកជនរងគ្រោះទៅព្យាបាលនៅមន្ទីរពេទ្យកាល់ម៉ែតដែរ តែដោយសាររបួសធ្ងន់ធ្ងរពេក ជនរងគ្រោះក៏បានស្លាប់នៅតាមផ្លូវពេលបញ្ជូនទៅមន្ទីរពេទ្យ។
ក្រោយកើតហេតុ បន្ទាប់ពីសមត្ថកិច្ចជំនាញមូលដ្ឋានធ្វើការវាស់វែងរួចរាល់ក៏ប្រគល់សពជនរងគ្រោះទៅអោយសាច់ញាតិមកទទួលយកទៅធ្វើបុណ្យនៅស្រុកកំណើតតាមប្រពៃណី ចំណែកម៉ូតូរបស់រងគ្រោះត្រូវបានសាច់ញាតិយកត្រឡប់ទៅវិញផងដែរ ៕
ចែករំលែកព័តមាននេះ